Глава 
46

Быт.46  с толкованием

1
Востав же Израиль сам и вся сущая его, прииде ко кладязю Клятвенному и пожре жертву Богу отца своего Исаака.

Быт.46:1  с толкованием

2
Рече же Бог ко Израилю в видении нощию, глаголя: Иакове, Иакове. Он же рече: что есть?

Быт.46:2  с толкованием

3
Он же рече ему: Аз есмь Бог отцев твоих, не убойся изыти во Египет: в язык бо велий сотворю тя тамо:

Быт.46:3  с толкованием

4
и Аз сниду с тобою во Египет, и Аз возведу тя до конца: и Иосиф возложит руки своя на очи твои.

Быт.46:4  с толкованием

5
Воста же Иаков от кладязя Клятвеннаго, и взяша сынове Израиля отца своего, и стяжание, и жены своя на колесницы, яже посла Иосиф, взяти его:

Быт.46:5  с толкованием

6
и вземше имения своя и все стяжание, еже стяжаша в земли Ханаанстей, внидоша во Египет Иаков и все семя его с ним:

Быт.46:6  с толкованием

7
сынове и сынове сынов его с ним, дщери и дщери дщерей его, и все семя свое введе во Египет.

Быт.46:7  с толкованием

8
Сия же имена сынов Израилевых вшедших во Египет купно со Иаковом отцем своим: Иаков и сынове его: первенец Иаковль Рувим.

Быт.46:8  с толкованием

9
Сынове же Рувимли: Енох и Фаллос, Асрон и Харми.

Быт.46:9  с толкованием

10
Сынове же Симеони: Иемуил и Иамин, и Аод и Ахин, и Саар и Саул, сын Хананитидин.

Быт.46:10  с толкованием

11
Сынове же Левиини: Гирсон, Кааф и Мерарий.

Быт.46:11  с толкованием

12
Сынове же Иудины: Ир и Авнан, и Силом и Фарес и Зара: умроша же Ир и Авнан в земли Ханаани. Быша же сынове Фаресу: Есром и Иемуил.

Быт.46:12  с толкованием

13
Сынове же Иссахаровы: Фола и Фуа, и Асум и Самвран.

Быт.46:13  с толкованием

14
Сынове же Завулони: Серед и Аллон и Ахоил.

Быт.46:14  с толкованием

15
Сии сынове Лиини, ихже роди Иакову в Месопотамии Сирстей, и Дину дщерь его: всех душ сынов и дщерей тридесять три.

Быт.46:15  с толкованием

16
Сынове же Гадовы: Сафон и Ангис, и Саннис и Фасован, и Аидис и Ароидис и Ареилис.

Быт.46:16  с толкованием

17
Сынове же Асировы: Иемна и Ессуа, и Иеул и Вариа, и Сара сестра их. Сынове же Вариины: Ховор и Мелхиил.

Быт.46:17  с толкованием

18
Сии сынове Зелфины, юже даде Лаван Лии, дщери своей, яже роди сих Иакову, шестьнадесять душ.

Быт.46:18  с толкованием

19
Сынове же Рахили, жены Иаковли: Иосиф и Вениамин.

Быт.46:19  с толкованием

20
Быша же сынове Иосифу в земли Египетстей, ихже роди ему Асенефа, дщи Петефриа жреца Илиопольска, Манассию и Ефрема. Быша же сынове Манассиины, ихже роди ему наложница Сира, Махира. Махир же роди Галаада. Сынове же Ефраима, брата Манассиина: Суталаам и Таам. Сынове же Суталаамли, Едом.

Быт.46:20  с толкованием

21
Сынове же Вениамини: Вала и Ховор и Асфил. Быша же сынове Валовы: Гира и Ноеман, и Анхис и Рос, и Мамфим и Офимим. Гира же роди Арада.

Быт.46:21  с толкованием

22
Сии сынове Рахилины, ихже роди Иакову, всех душ осмьнадесять.

Быт.46:22  с толкованием

23
Сынове же Дановы: Асом.

Быт.46:23  с толкованием

24
Сынове же Неффалимли: Асиил и Гони, и Иссаар и Селлим.

Быт.46:24  с толкованием

25
Сии сынове Валлины, юже даде Лаван Рахили дщери своей, яже роди сих Иакову: всех душ седмь.

Быт.46:25  с толкованием

26
Всех же душ вшедших со Иаковом во Египет, яже изыдоша из чресл его, кроме жен сынов Иаковлих, всех душ шестьдесят шесть.

Быт.46:26  с толкованием

27
Сынове же Иосифовы, иже быша ему в земли Египетстей, душ девять: всех душ дому Иаковля, яже приидоша со Иаковом во Египет, душ седмьдесят пять.

Быт.46:27  с толкованием

28
Иуду же посла пред собою ко Иосифу срести его у Иройска града в земли Рамессийстей.

Быт.46:28  с толкованием

29
Впряг же Иосиф колесницы своя, изыде во сретение Израилю, отцу своему, ко Ироону граду: и явився ему, нападе на выю его и плакася плачем великим.

Быт.46:29  с толкованием

30
И рече Израиль ко Иосифу: да умру отныне, понеже видех лице твое: еще бо ты еси жив.

Быт.46:30  с толкованием

31
Рече же Иосиф ко братии своей: шед повем фараону и реку ему: братия моя и дом отца моего, иже быша в земли Ханаани, приидоша ко мне:

Быт.46:31  с толкованием

32
они же суть мужие пастуси, мужие бо скотопитателие быша: и скоты, и волы, и вся своя приведоша:

Быт.46:32  с толкованием

33
аще убо призовет вас фараон и речет вам: что дело ваше есть?

Быт.46:33  с толкованием

34
Рцыте: мужие скотопитателие есмы, раби твои, издетска даже до ныне, и мы и отцы наши: да вселитеся в земли Гесем аравийстей: мерзость бо есть Египтяном всяк пастух овчий.

Быт.46:34  с толкованием

Глава 
47

Быт.47  с толкованием

1
Пришед же Иосиф, поведа фараону глаголя: отец мой и братия моя, и скоти и волове их, и вся сущая их приидоша из земли Ханаани: и се, суть в земли Гесем.

Быт.47:1  с толкованием

2
От братий же своих поя пять мужей и постави их пред фараоном.

Быт.47:2  с толкованием

3
И рече фараон к братиям Иосифовым: что дело ваше? Они же реша фараону: пастуси овчии, раби твои, и мы и отцы наши отдетска и доселе.

Быт.47:3  с толкованием

4
Рекоша же фараону: обитати в земли приидохом, несть бо пажити скотом раб твоих: одоле бо глад на земли Ханаани: ныне убо да вселимся раби твои в земли Гесем.

Быт.47:4  с толкованием

5
И рече фараон Иосифу, глаголя: отец твой и братия твоя приидоша к тебе:

Быт.47:5  с толкованием

6
се, земля Египетская пред тобою есть: на лучшей земли посели отца твоего и братию твою, да вселятся в земли Гесем: аще же веси, яко суть в них мужие сильнии, постави их старейшины скотом моим. (приидоша же во Египет ко Иосифу Иаков и сынове его: и услыша фараон царь Египетский).

Быт.47:6  с толкованием

7
Введе же Иосиф Иакова отца своего и постави его пред фараоном, и благослови Иаков фараона.

Быт.47:7  с толкованием

8
Рече же фараон ко Иакову: колико лет дний жития твоего?

Быт.47:8  с толкованием

9
И рече Иаков фараону: дние лет жития моего, яже обитаю, сто тридесять лет: малы и злы быша дние лет жития моего: не достигоша во дни лет жития отец моих, яже дни обиташа.

Быт.47:9  с толкованием

10
И благословив Иаков фараона, отиде от него.

Быт.47:10  с толкованием

11
И всели Иосиф отца своего и братию свою, и даде им обдержание в земли Египетстей, на лучшей земли, в земли Рамессийстей, якоже повеле фараон.

Быт.47:11  с толкованием

12
И деляше Иосиф пшеницу отцу своему и братии своей и всему дому отца своего по числу лиц.

Быт.47:12  с толкованием

13
Пшеницы же не бяше во всей земли, одоле бо глад зело: скончавашеся же земля Египетская и земля Ханааня от глада.

Быт.47:13  с толкованием

14
Собра же Иосиф все сребро обретшееся в земли Египетстей и в земли Ханаани, за пшеницу, юже куповаху, и размеряше им пшеницу, и внесе Иосиф все сребро в дом фараонов.

Быт.47:14  с толкованием

15
И оскуде все сребро от земли Египетския и от земли Ханаанския: приидоша же вси Египтяне ко Иосифу, глаголюще: даждь нам хлебы, и вскую умираем пред тобою? Скончася бо сребро наше.

Быт.47:15  с толкованием

16
Рече же им Иосиф: пригоните скоты вашя, и дам вам хлебы за скоты вашя, аще скончася сребро ваше.

Быт.47:16  с толкованием

17
Пригнаша же скоты своя ко Иосифу, и даде им Иосиф хлебы за кони и за овцы, и за волы и за ослы, и прекорми их хлебами за вся скоты их в том лете.

Быт.47:17  с толкованием

18
Прейде же то лето, и приидоша к нему во второе лето и рекоша ему: да не како погибнем от господина нашего? Аще бо скончася сребро наше, и имение и скоты пред тобою, господине, и не остася нам пред господином нашим, точию едино тело и земля наша:

Быт.47:18  с толкованием

19
да не умрем убо пред тобою, и земля опустеет, купи нас и землю нашу хлебами: и будем мы и земля наша раби фараону: даждь семя, да посеем и живи будем, и не умрем, и земля не опустеет.

Быт.47:19  с толкованием

20
И купи Иосиф всю землю Египетскую фараону: продаша бо Египтяне землю свою фараону, ибо одоле им глад: и бысть земля фараону.

Быт.47:20  с толкованием

21
И люди поработи ему в рабы, от края предел Египетских даже до краев,

Быт.47:21  с толкованием

22
кроме земли жреческия токмо, тоя бо не купи Иосиф: даянием бо даде в дар жерцем фараон, и ядяху даяние, еже даде им фараон: сего ради не продаша земли своея.

Быт.47:22  с толкованием

23
Рече же Иосиф всем Египтяном: се, купих вас и землю вашу днесь фараону: возмите себе семена и сейте на земли:

Быт.47:23  с толкованием

24
и будут плоды ея, и да дасте пятую часть фараону, четыри же части будут вам самем в семена земли и на препитание вам и всем сущым в домех ваших.

Быт.47:24  с толкованием

25
И рекоша: оживил ны еси, обретохом благодать пред господином нашим, и будем раби фараону.

Быт.47:25  с толкованием

26
И устави им Иосиф заповедь даже до сего дне на земли Египетстей пятую часть даяти фараону, кроме земли жреческия: та точию не бяше фараоня.

Быт.47:26  с толкованием

27
Вселися же Израиль в земли Египетстей, на земли Гесем, и наследствоваше ю: и возрастоша, и умножишася зело.

Быт.47:27  с толкованием

28
Поживе же Иаков в земли Египетстей седмьнадесять лет: и быша дние Иаковли лет жизни его, сто четыредесять седмь лет.

Быт.47:28  с толкованием

29
Приближишася же дние Израилю еже умрети, и призва сына своего Иосифа и рече ему: аще обретох благодать пред тобою, подложи руку твою под стегно мое и сотвориши надо мною милость и истину, еже не погребсти мене во Египте,

Быт.47:29  с толкованием

30
но да почию со отцы моими: и изнесеши мя из Египта, и погребеши мя во гробе их. Он же рече: аз сотворю по словеси твоему.

Быт.47:30  с толкованием

31
Рече же: кленися мне. И клятся ему. И поклонися Израиль на конец жезла его.

Быт.47:31  с толкованием

Глава 
48

Быт.48  с толкованием

1
Бысть же по глаголех сих, и поведано бысть Иосифу, яко отец твой изнемогает: и поим два сына своя, Манассию и Ефрема, прииде ко Иакову.

Быт.48:1  с толкованием

2
Поведаша же Иакову, глаголюще: се, сын твой Иосиф грядет к тебе. И укрепився Израиль седе на одре,

Быт.48:2  с толкованием

3
и рече Иаков ко Иосифу: Бог мой явися мне в Лузе, в земли Ханаани, и благослови мя

Быт.48:3  с толкованием

4
и рече ми: се, Аз возращу тя и умножу тя, и сотворю тя в собрания языков: и дам ти землю сию и семени твоему по тебе во одержание вечное.

Быт.48:4  с толкованием

5
Ныне убо два сына твоя, иже быша тебе в земли Египетстей прежде пришествия моего к тебе во Египет, мои суть: Ефрем и Манассиа, аки Рувим и Симеон будут мне:

Быт.48:5  с толкованием

6
сыны же, яже аще родиши по сих, будут тебе: во имя братии своея призовутся ко жребиям оных:

Быт.48:6  с толкованием

7
аз же егда идях от Месопотамии Сирския, умре Рахиль мати твоя в земли Ханаани, приближающуся ми ко ипподрому Хаврафы земли, еже приити во Ефрафу: и погребох ю на пути ипподрома: сей есть Вифлеем.

Быт.48:7  с толкованием

8
Видев же Израиль сыны Иосифовы, рече: что тебе сии?

Быт.48:8  с толкованием

9
Рече же Иосиф отцу своему: сынове мои суть, яже даде ми Бог зде. И рече Иаков: приведи ми я, да благословлю их.

Быт.48:9  с толкованием

10
Очи же Израилю тяжко видеста от старости, и не можаше видети: и приближи их к нему, и лобза их, и объят я.

Быт.48:10  с толкованием

11
И рече Израиль ко Иосифу: се, лица твоего не лишихся, и се, показа ми Бог и семя твое.

Быт.48:11  с толкованием

12
И отведе их Иосиф от колен его, и поклонишася ему лицем до земли.

Быт.48:12  с толкованием

13
Поим же Иосиф два сына своя, Ефрема в десницу, прямо левицы Израиля, Манассию же в левую, прямо десницы Израилевы, приближи их к нему.

Быт.48:13  с толкованием

14
Простер же Израиль руку десную, возложи на главу Ефремлю, сей же бяше менший, а левую на главу Манассиину, пременив руце,

Быт.48:14  с толкованием

15
и благослови я и рече: Бог, Емуже благоугодиша отцы мои пред ним, Авраам и Исаак, Бог, Иже питает мя измлада даже до дне сего,

Быт.48:15  с толкованием

16
Ангел, иже мя избавляет от всех зол, да благословит детища сия, и прозовется в них имя мое, и имя отец моих, Авраама и Исаака, и да умножатся во множество многое на земли.

Быт.48:16  с толкованием

17
Видев же Иосиф, яко возложи отец его руку десную свою на главу Ефремлю, тяжко ему явися: и прия Иосиф руку отца своего отяти ю от главы Ефремли на главу Манассиину,

Быт.48:17  с толкованием

18
и рече Иосиф отцу своему: не тако, отче: сей бо (есть) первенец, возложи руку десную твою на главу его.

Быт.48:18  с толкованием

19
И не хотяше, но рече: вем, чадо, вем: и сей будет в люди, и сей вознесется: но брат его менший болий его будет, и семя его будет во множество языков.

Быт.48:19  с толкованием

20
И благослови я в том дни, глаголя: в вас благословится Израиль, глаголюще: да сотворит тя Бог якоже Ефрема и яко Манассию. И постави Ефрема вышше Манассии.

Быт.48:20  с толкованием

21
Рече же Израиль Иосифу: се, аз умираю, и будет Бог с вами, и возвратит вас от земли сея на землю отец ваших:

Быт.48:21  с толкованием

22
аз же даю ти Сикиму избранную свыше братии твоея, юже взях из руки Аморрейски мечем моим и луком.

Быт.48:22  с толкованием

Глава 
49

Быт.49  с толкованием

1
Призва же Иаков сыны своя и рече им: соберитеся, да возвещу вам, что срящет вас в последния дни:

Быт.49:1  с толкованием

2
соберитеся и послушайте мене, сынове Иаковли, послушайте Израиля, послушайте отца вашего.

Быт.49:2  с толкованием

3
Рувим, первенец мой, ты крепость моя и начало чад моих: жесток терпети и жесток упорник:

Быт.49:3  с толкованием

4
досадил еси яко вода, да не воскипиши: возшел бо еси на ложе отца твоего, тогда осквернил еси постелю, идеже возшел еси.

Быт.49:4  с толкованием

5
Симеон и Левий братия совершиста обиду от воли своея:

Быт.49:5  с толкованием

6
в совет их да не приидет душа моя, и к собранию их да не прилепятся внутренняя моя: яко во гневе своем избиста человеки, и в похоти своей пререзаста жилы юнца:

Быт.49:6  с толкованием

7
проклята ярость их, яко упорна, и гнев их, яко ожесточися: разделю их во Иакове и разсею их во Израили.

Быт.49:7  с толкованием

8
Иудо, тебе похвалят братия твоя, руце твои на плещу враг твоих: поклонятся тебе сынове отца твоего:

Быт.49:8  с толкованием

9
скимен львов Иуда: от леторасли, сыне мой, возшел еси: возлег уснул еси яко лев и яко скимен: кто возбудит его?

Быт.49:9  с толкованием

10
Не оскудеет князь от Иуды и вождь от чресл его, дондеже приидут отложеная Ему, и Той чаяние языков:

Быт.49:10  с толкованием

11
привязуяй к лозе жребя свое и к винничию жребца осляте своего, исперет вином одежду свою и кровию гроздия одеяние свое:

Быт.49:11  с толкованием

12
радостотворны очи его паче вина, и белы зубы его паче млека.

Быт.49:12  с толкованием

13
Завулон при мори вселится, и той на пристанищи кораблей, и прострется даже до Сидона.

Быт.49:13  с толкованием

14
Иссахар доброе возжела, почивая посреде пределов,

Быт.49:14  с толкованием

15
и видев покой, яко добр, и землю, яко тучна, подложи рамы свои на труд, и бысть муж земледелец.

Быт.49:15  с толкованием

16
Дан судити имать люди своя, яко и едино племя во Израили,

Быт.49:16  с толкованием

17
и да будет Дан змий на пути, седяй на распутии, угрызая пяту конску:

Быт.49:17  с толкованием

18
и падет конник вспять, спасения ждый Господня.

Быт.49:18  с толкованием

19
Гад, искушение искусит его: он же искусит того при ногах.

Быт.49:19  с толкованием

20
Асир, тучен его хлеб, и той даст пищу князем.

Быт.49:20  с толкованием

21
Неффалим стебль распущающаяся, издаяй во отрасли доброту.

Быт.49:21  с толкованием

22
Сын возращен Иосиф, сын возращен мой ревностный, сын мой юнейший, ко мне обратися:

Быт.49:22  с толкованием

23
на негоже советующе укоряху и наляцаху нань господие стреляний,

Быт.49:23  с толкованием

24
и сотрошася с крепостию луки их, и разслабеша жилы мышцей рук их, рукою сильнаго Иакова: оттуду укрепися Израиль от Бога отца твоего,

Быт.49:24  с толкованием

25
и поможе тебе Бог мой, и благослови тя благословением небесным свыше и благословением земли и имущия вся: благословения ради сосцев и ложесн,

Быт.49:25  с толкованием

26
благословения отца твоего и матере твоея: преодоле паче благословения гор пребывающих и благословения холмов вечных: будут на главе Иосифове и на версе (главы) братий, имиже обладаше.

Быт.49:26  с толкованием

27
Вениамин волк хищник, рано яст еще и на вечер дает пищу.

Быт.49:27  с толкованием

28
Вси сии сынове Иаковли дванадесять: и сия глагола им отец их, и благослови их: коегождо по благословению его благослови их,

Быт.49:28  с толкованием

29
и рече им: аз прилагаюся к людем моим: погребите мя со отцы моими в пещере, яже есть в селе Ефрона Хеттеанина,

Быт.49:29  с толкованием

30
в пещере Сугубей, яже прямо Мамврии в земли Ханаани, юже стяжа Авраам пещеру у Ефрона Хеттеанина в стяжание гроба.

Быт.49:30  с толкованием

31
Тамо погребоша Авраама и Сарру жену его, тамо погребоша Исаака и Ревекку жену его, тамо погребоша Лию,

Быт.49:31  с толкованием

32
в стяжании села и пещеры, яже есть в нем у сынов Хеттеовых.

Быт.49:32  с толкованием

33
И преста Иаков завещая сыном своим, и возложив Иаков нозе свои на одр умре, и приложися к людем своим.

Быт.49:33  с толкованием

Глава 
50

Быт.50  с толкованием

1
И припад Иосиф на лице отца своего, плакася (горько) о нем и облобыза его:

Быт.50:1  с толкованием

2
и повеле Иосиф рабом своим погребателем погребсти отца своего. И погребоша погребателие Израиля.

Быт.50:2  с толкованием

3
И исполнишася ему четыредесять дний: тако бо исчисляются дние погребения: и плакася его Египет седмьдесят дний.

Быт.50:3  с толкованием

4
Егда же преидоша дние плача, глагола Иосиф ко вельможам фараоновым, глаголя: аще обретох благодать пред вами, рцыте о мне во ушы фараону, глаголюще:

Быт.50:4  с толкованием

5
отец мой закля мя прежде скончания (своего), глаголя: во гробе, егоже ископах себе в земли Ханаани, тамо мя погреби: ныне убо возшед погребу отца моего и возвращуся. И рекоша фараону по словеси Иосифову.

Быт.50:5  с толкованием

6
И рече фараон ко Иосифу: взыди, погреби отца твоего, якоже закля тя.

Быт.50:6  с толкованием

7
И взыде Иосиф погребсти отца своего. И совзыдоша с ним вси раби фараони и старейшины дому его, и вси старейшины земли Египетския,

Быт.50:7  с толкованием

8
и весь дом Иосифов и братия его, и весь дом отца его и сродницы его: овцы же и волы оставиша в земли Гесем.

Быт.50:8  с толкованием

9
И совзыдоша с ним и колесницы и конницы, и бысть полк велик зело.

Быт.50:9  с толкованием

10
И приидоша на Гумно Атадово, еже есть об он пол Иордана, и рыдаша его рыданием велиим и крепким зело: и сотвори плачь отцу своему седмь дний.

Быт.50:10  с толкованием

11
И видеша жителие земли Ханаанския плачь на Гумне Атадове и реша: плачь велик сей есть Египтяном. Сего ради наречеся имя месту тому плачь Египетск, еже есть об он пол Иордана.

Быт.50:11  с толкованием

12
И сотвориша ему тако сынове его, якоже заповеда им.

Быт.50:12  с толкованием

13
И взяша его сынове его в землю Ханааню и погребоша его в пещере Сугубей, юже стяжа Авраам пещеру в стяжание гроба от Ефрона Хеттеанина, прямо Мамврии.

Быт.50:13  с толкованием

14
И возвратися Иосиф во Египет, сам и братия его и вси совозшедшии погребсти отца его.

Быт.50:14  с толкованием

15
Видевше же братия Иосифовы, яко умре отец их, реша: да не когда воспомянет злобу нашу Иосиф и воздаянием воздаст нам за вся злая, яже показахом ему.

Быт.50:15  с толкованием

16
И пришедше ко Иосифу рекоша: отец твой закля прежде кончины своея, глаголя:

Быт.50:16  с толкованием

17
тако рцыте Иосифу: остави им неправду и грех их, яко лукавая тебе показаша: и ныне приими неправду рабов Бога отца твоего. И плакася Иосиф, глаголющим им к нему.

Быт.50:17  с толкованием

18
И пришедше к нему рекоша: се, мы тебе раби.

Быт.50:18  с толкованием

19
И рече к ним Иосиф: не бойтеся, Божий бо есмь аз:

Быт.50:19  с толкованием

20
вы совещасте на мя злая, Бог же совеща о мне благая, дабы было якоже днесь, и препиталися бы людие мнози.

Быт.50:20  с толкованием

21
И рече им: не бойтеся, аз препитаю вас и домы вашя. И утеши их, и глагола им по сердцу их.

Быт.50:21  с толкованием

22
И вселися Иосиф во Египте сам и братия его и весь дом отца его: и поживе Иосиф лет сто десять.

Быт.50:22  с толкованием

23
И виде Иосиф Ефремли дети до третияго рода: и сынове Махира сына Манассиина родишася при бедрех Иосифовых.

Быт.50:23  с толкованием

24
И рече Иосиф братии своей, глаголя: аз умираю, посещением же посетит вас Бог и изведет вас от земли сея в землю, о нейже клятся Бог отцем нашым Аврааму, Исааку и Иакову.

Быт.50:24  с толкованием

25
И закля Иосиф сыны Израилевы, глаголя: в посещении, имже посетит вас Бог, совознесите и кости моя отсюду с вами.

Быт.50:25  с толкованием

26
И скончася Иосиф сый лет ста десяти: и погребоша его, и положиша в раце во Египте.

Быт.50:26  с толкованием