Предисловие

В лето второе царства Артаксеркса великаго, в первый день месяца Нисана, сон виде Мардохей сын Иаиров, Семеев, Кисеев, от племене Вениаминя, человек Иудеанин, обитаяй в Сусех граде, человек велик, служа во дворе цареве: бе же от плененных, ихже плени Навуходоносор царь Вавилонский от Иерусалима, со Иехониею царем Иудейским. И сицево его соние: и се, глас ужасный, громи и трус и смятение на земли: и се, два змиа велика произыдоста, готова оба между собою братися, и бысть глас их велик, и гласом их уготовася всяк язык на брань, да истребят язык праведных: и се, день тмы и мрака, скорбь и теснота, и озлобление и смятение велие на земли, и возмутися всяк язык праведен боящеся злобы их, и уготовашася на погибель, и возопиша ко Господу: от вопля же их бысть аки от малаго источника река велия, вода многа: и свет и солнце возсия, и смиреннии вознесошася и поядоша славных. И возбнув Мардохей видевый соние сие, и еже Бог восхоте сотворити, содержаше соние сие в сердцы, и во всяцем словеси хотяше разумети е даже до нощи. И пребываше Мардохей во дворе со Гавафом и Фарром двема евнухома царевыма, иже стрежаста двор: и слыша разглаголствия их, и советы их исиыта, и разуме, яко готовят руце свои возложити на царя Артаксеркса: и сказа царю о них. И испыта царь дву евнуху своею, и исповедавша повешена быста. И написа царь словеса сия на память, и Мардохей написа о словесех сих. И повеле царь Мардохею служити во дворе и даде ему дары за сие. И бе Аман Амадафов Вугеанин славен пред царем и восхоте озлобити Мардохеа и людий его дву ради евнуху цареву.