Глава 
1

Иак.1  с толкованием

1
Иаков, Богу и Господу Иисусу Христу раб, обеманадесяте коленома, иже в разсеянии, радоватися.

Иак.1:1  с толкованием

2
Всяку радость имейте, братие моя, егда во искушения впадаете различна,

Иак.1:2  с толкованием

3
ведяще, яко искушение вашея веры соделовает терпение:

Иак.1:3  с толкованием

4
терпение же дело совершенно да имать, яко да будете совершенни и всецели, ни в чемже лишени.

Иак.1:4  с толкованием

5
Аще же кто от вас лишен есть премудрости, да просит от дающаго Бога всем нелицеприемне и не поношающаго, и дастся ему.

Иак.1:5  с толкованием

6
Да просит же верою, ничтоже сумняся: сумняйся бо уподобися волнению морскому, ветры возметаему и развеваему.

Иак.1:6  с толкованием

7
Да не мнит бо человек он, яко приимет что от Бога.

Иак.1:7  с толкованием

8
Муж двоедушен неустроен во всех путех своих.

Иак.1:8  с толкованием

9
Да хвалится же брат смиренный в высоте своей,

Иак.1:9  с толкованием

10
богатый же во смирении своем, зане якоже цвет травный мимоидет:

Иак.1:10  с толкованием

11
возсия бо солнце со зноем, и изсуши траву, и цвет ея отпаде, и благолепие лица ея погибе: сице и богатый в хождении своем увядает.

Иак.1:11  с толкованием

12
Блажен муж, иже претерпит искушение: зане искусен быв, приимет венец жизни, егоже обеща Бог любящым Его.

Иак.1:12  с толкованием

13
Никтоже искушаемь да глаголет, яко от Бога искушаемь есмь: Бог бо несть искуситель злым, не искушает же Той ни когоже,

Иак.1:13  с толкованием

14
кийждо же искушается, от своея похоти влекомь и прельщаемь:

Иак.1:14  с толкованием

15
таже похоть заченши раждает грех, грех же содеян раждает смерть.

Иак.1:15  с толкованием

16
Не льститеся, братие моя возлюбленная:

Иак.1:16  с толкованием

17
всяко даяние благо и всяк дар совершен свыше есть, сходяй от Отца светов, у Негоже несть пременение, или преложения стень.

Иак.1:17  с толкованием

18
Восхотев бо породи нас словом истины, во еже быти нам начаток некий созданием Его.

Иак.1:18  с толкованием

19
Темже, братие моя возлюбленная, да будет всяк человек скор услышати и косен глаголати, косен во гнев,

Иак.1:19  с толкованием

20
гнев бо мужа, правды Божия не соделовает.

Иак.1:20  с толкованием

21
Сего ради отложше всяку скверну и избыток злобы, в кротости приимите всажденное слово, могущее спасти душы вашя.

Иак.1:21  с толкованием

22
Бывайте же творцы слова, а не точию слышатели, прельщающе себе самех.

Иак.1:22  с толкованием

23
Зане аще кто есть слышатель слова, а не творец, таковый уподобися мужу смотряющу лице бытия своего в зерцале:

Иак.1:23  с толкованием

24
усмотри бо себе и отиде, и абие забы, каков бе.

Иак.1:24  с толкованием

25
Приникий же в закон совершен свободы, и пребыв, сей не слышатель забытлив быв, но творец дела, сей блажен в делании своем будет.

Иак.1:25  с толкованием

26
Аще кто мнится верен быти в вас, и не обуздовает языка своего, но льстит сердце свое, сего суетна есть вера.

Иак.1:26  с толкованием

27
Вера бо чиста и нескверна пред Богом и Отцем сия есть, еже посещати сирых и вдовиц в скорбех их, (и) нескверна себе блюсти от мира.

Иак.1:27  с толкованием

Глава 
2

Иак.2  с толкованием

1
Братие моя, не на лица зряще имейте веру Господа нашего Иисуса Христа славы.

Иак.2:1  с толкованием

2
Аще бо внидет в сонмище ваше муж, злат перстень нося, в ризе светле, внидет же и нищь в худе одежди,

Иак.2:2  с толкованием

3
и воззрите на носящаго ризу светлу, и речете ему: ты сяди зде добре: и нищему речете: ты стани тамо, или сяди зде на подножии моем:

Иак.2:3  с толкованием

4
и не разсмотристе в себе, и бысте судии помышлений злых.

Иак.2:4  с толкованием

5
Слышите, братие моя возлюбленная, не Бог ли избра нищыя мира сего богаты в вере и наследники Царствия, еже обеща любящым Его?

Иак.2:5  с толкованием

6
Вы же укористе нищаго. Не богатии ли насилуют вам, и тии влекут вы на судища?

Иак.2:6  с толкованием

7
Не тии ли хулят доброе имя нареченное на вас?

Иак.2:7  с толкованием

8
Аще убо закон совершаете царский, по Писанию: возлюбиши искренняго своего якоже себе самаго, добре творите:

Иак.2:8  с толкованием

9
аще же на лица зрите, то грех содеваете, обличаеми от закона якоже преступницы.

Иак.2:9  с толкованием

10
Иже бо весь закон соблюдет, согрешит же во единем, бысть всем повинен.

Иак.2:10  с толкованием

11
Рекий бо: не прелюбы сотвориши, рекл есть и: не убиеши. Аще же не прелюбы сотвориши, убиеши же, был еси преступник закона.

Иак.2:11  с толкованием

12
Тако глаголите и тако творите, яко законом свободным имущии суд прияти.

Иак.2:12  с толкованием

13
Суд бо без милости не сотворшему милости: и хвалится милость на суде.

Иак.2:13  с толкованием

14
Кая польза, братие моя, аще веру глаголет кто имети, дел же не имать? Еда может вера спасти его?

Иак.2:14  с толкованием

15
Аще же брат или сестра нага будета и лишена будета дневныя пищи,

Иак.2:15  с толкованием

16
речет же има кто от вас: идита с миром, грейтася и насыщайтася? Не даст же има требования телеснаго: кая польза?

Иак.2:16  с толкованием

17
Такожде и вера, аще дел не имать, мертва есть о себе.

Иак.2:17  с толкованием

18
Но речет кто: ты веру имаши, аз же дела имам: покажи ми веру твою от дел твоих, и аз тебе покажу от дел моих веру мою.

Иак.2:18  с толкованием

19
Ты веруеши, яко Бог един есть: добре твориши: и беси веруют, и трепещут.

Иак.2:19  с толкованием

20
Хощеши же ли разумети, о, человече суетне, яко вера без дел мертва есть?

Иак.2:20  с толкованием

21
Авраам отец наш не от дел ли оправдася, вознес Исаака сына своего на жертвенник?

Иак.2:21  с толкованием

22
Видиши ли, яко вера поспешествоваше делом его, и от дел совершися вера?

Иак.2:22  с толкованием

23
И совершися Писание глаголющее: верова же Авраам Богови, и вменися ему в правду, и друг Божий наречеся.

Иак.2:23  с толкованием

24
Зрите ли убо, яко от дел оправдается человек, а не от веры единыя?

Иак.2:24  с толкованием

25
Такожде же и Раав блудница не от дел ли оправдася, приемши сходники и иным путем изведши их?

Иак.2:25  с толкованием

26
Якоже бо тело без духа мертво есть, тако и вера без дел мертва есть.

Иак.2:26  с толкованием

Глава 
3

Иак.3  с толкованием

1
Не мнози учителие бывайте, братие моя, ведяще, яко болшее осуждение приимем,

Иак.3:1  с толкованием

2
много бо согрешаем вси. Аще кто в слове не согрешает, сей совершен муж, силен обуздати и все тело.

Иак.3:2  с толкованием

3
Се бо и конем узды во уста влагаем, да повинуются нам, и все тело их обращаем:

Иак.3:3  с толкованием

4
се, и корабли велицы суще и от жестоких ветров заточаеми, обращаются малым кормилцем, аможе стремление правящаго хощет:

Иак.3:4  с толкованием

5
такожде же и язык мал уд есть, и вельми хвалится. Се мал огнь, и коль велики вещи сожигает.

Иак.3:5  с толкованием

6
И язык огнь, лепота неправды: сице и язык водворяется во удех наших, скверня все тело, и паля коло рождения нашего, и опаляяся от геенны:

Иак.3:6  с толкованием

7
всяко бо естество зверей же и птиц, гад же и рыб, укрощается и укротится естеством человеческим,

Иак.3:7  с толкованием

8
языка же никтоже может от человек укротити: не удержимо бо зло, исполнь яда смертоносна.

Иак.3:8  с толкованием

9
Тем благословляем Бога и Отца, и тем кленем человеки бывшыя по подобию Божию:

Иак.3:9  с толкованием

10
от техже уст исходит благословение и клятва. Не подобает, братие моя возлюбленная, сим тако бывати.

Иак.3:10  с толкованием

11
Еда ли источник от единаго устия источает сладкое и горькое?

Иак.3:11  с толкованием

12
Еда может, братие моя, смоковница маслины творити, или виноградная лоза смоквы? Такожде ни един источник слану и сладку творит воду.

Иак.3:12  с толкованием

13
Кто премудр и худог в вас, да покажет от добраго жития дела своя в кротости и премудрости.

Иак.3:13  с толкованием

14
Аще же зависть горьку имате и рвение в сердцах ваших, не хвалитеся, ни лжите на истину:

Иак.3:14  с толкованием

15
несть сия премудрость свыше низходящи, но земна, душевна, бесовска:

Иак.3:15  с толкованием

16
идеже бо зависть и рвение, ту нестроение и всяка зла вещь.

Иак.3:16  с толкованием

17
А яже свыше премудрость, первее убо чиста есть, потом же мирна, кротка, благопокорлива, исполнь милости и плодов благих, несуменна и нелицемерна.

Иак.3:17  с толкованием

18
Плод же правды в мире сеется творящым мир.

Иак.3:18  с толкованием

Глава 
4

Иак.4  с толкованием

1
Откуду брани и свары в вас? Не отсюду ли, от сластей ваших, воюющих во удех ваших?

Иак.4:1  с толкованием

2
Желаете, и не имате: убиваете и завидите, и не можете улучити: сваряетеся и борете, и не имате, зане не просите:

Иак.4:2  с толкованием

3
просите, и не приемлете, зане зле просите, да в сластех ваших иждивете.

Иак.4:3  с толкованием

4
Прелюбодее и прелюбодейцы, не весте ли, яко любы мира сего вражда Богу есть, иже бо восхощет друг быти миру, враг Божий бывает.

Иак.4:4  с толкованием

5
Или мните, яко всуе Писание глаголет: к зависти желает дух, иже вселися в ны?

Иак.4:5  с толкованием

6
Болшую же дает благодать: темже глаголет: Господь гордым противится, смиренным же дает благодать.

Иак.4:6  с толкованием

7
Повинитеся убо Богу, противитеся же диаволу, и бежит от вас.

Иак.4:7  с толкованием

8
Приближитеся Богу, и приближится вам: очистите руце, грешницы, исправите сердца ваша, двоедушнии:

Иак.4:8  с толкованием

9
постраждите и слезите и плачитеся: смех ваш в плачь да обратится, и радость в сетование:

Иак.4:9  с толкованием

10
смиритеся пред Господем, и вознесет вы.

Иак.4:10  с толкованием

11
Не оклеветайте друг друга, братие: оклеветаяй бо брата, или осуждаяй брата своего, оклеветает закон и осуждает закон: аще же закон осуждаеши, неси творец закона, но судия.

Иак.4:11  с толкованием

12
Един есть Законоположник и Судия, могий спасти и погубити: ты же кто еси осуждаяй друга?

Иак.4:12  с толкованием

13
Слышите ныне, глаголющии: днесь или утре пойдем во он град, и сотворим ту лето едино, и куплю деем и приобретение:

Иак.4:13  с толкованием

14
иже не весте, что утре случится: кая бо жизнь ваша, пара бо есть, яже вмале является, потом же исчезает.

Иак.4:14  с толкованием

15
Вместо еже бы глаголати вам: аще Господь восхощет, и живи будем, и сотворим сие или оно:

Иак.4:15  с толкованием

16
ныне же хвалитеся в гордынех ваших: всяка хвала такова зла есть.

Иак.4:16  с толкованием

17
Ведущему убо добро творити, и не творящему, грех ему есть.

Иак.4:17  с толкованием

Глава 
5

Иак.5  с толкованием

1
Приидите ныне, богатии, плачитеся и рыдайте о лютых скорбех ваших грядущих на вы.

Иак.5:1  с толкованием

2
Богатство ваше изгни, и ризы вашя молие поядоша.

Иак.5:2  с толкованием

3
Злато ваше и сребро изоржаве, и ржа их в послушество на вас будет, и снесть плоти вашя аки огнь: егоже снискасте в последния дни.

Иак.5:3  с толкованием

4
Се, мзда делателей делавших нивы вашя, удержаная от вас, вопиет, и вопиения жавших во ушы Господа Саваофа внидоша.

Иак.5:4  с толкованием

5
Возвеселистеся на земли, и насладистеся: упитасте сердца ваша аки в день заколения.

Иак.5:5  с толкованием

6
Осудисте, убисте Праведнаго: не противится вам.

Иак.5:6  с толкованием

7
Долготерпите убо, братие моя, до пришествия Господня. Се земледелец ждет честнаго плода от земли, долготерпя о нем, дондеже приимет дождь ран и позден:

Иак.5:7  с толкованием

8
долготерпите убо и вы, утвердите сердца ваша, яко пришествие Господне приближися.

Иак.5:8  с толкованием

9
Не воздыхайте друг на друга, братие, да не осуждени будете: се, Судия пред дверьми стоит.

Иак.5:9  с толкованием

10
Образ приимите, братие моя, злострадания и долготерпения пророки, иже глаголаша именем Господним.

Иак.5:10  с толкованием

11
Се, блажим терпящыя. Терпение Иовле слышасте, и кончину Господню видесте, яко многомилостив есть Господь и щедр.

Иак.5:11  с толкованием

12
Прежде же всех, братие моя, не кленитеся ни небом, ни землею, ни иною коею клятвою: буди же вам еже ей, ей, и еже ни, ни: да не в лицемерие впадете.

Иак.5:12  с толкованием

13
Злостраждет ли кто в вас? Да молитву деет: благодушствует ли кто? Да поет.

Иак.5:13  с толкованием

14
Болит ли кто в вас, да призовет пресвитеры Церковныя, и да молитву сотворят над ним, помазавше его елеем во имя Господне:

Иак.5:14  с толкованием

15
и молитва веры спасет болящаго, и воздвигнет его Господь: и аще грехи сотворил есть, отпустятся ему.

Иак.5:15  с толкованием

16
Исповедайте убо друг другу согрешения и молитеся друг за друга, яко да исцелеете: много бо может молитва праведнаго поспешествуема.

Иак.5:16  с толкованием

17
Илиа человек бе подобострастен нам, и молитвою помолися, да не будет дождь, и не одожди по земли лета три и месяц шесть:

Иак.5:17  с толкованием

18
и паки помолися, и небо дождь даде, и земля прозябе плод свой.

Иак.5:18  с толкованием

19
Братие, аще кто в вас заблудит от пути истины, и обратит кто его,

Иак.5:19  с толкованием

20
да весть, яко обративый грешника от заблуждения пути его спасет душу от смерти и покрыет множество грехов.

Иак.5:20  с толкованием