Глава 
16


1
Отвещав же Иов, рече:


2
слышах сицевая многа, утешителие зол вси.


3
Что бо? Еда чин есть во словесех ветра? Или кую ти пакость сотворит, яко отвещаеши?


4
И аз якоже вы возглаголю: аще бы душа ваша подлежала вместо моея, тогда наскочил бых на вы словесы, покиваю же на вы главою моею.


5
Буди же крепость во устех моих, движения же устен не пощажу.


6
Аще бо возглаголю, не возболю ли язвою? Аще же и умолчу, чим менше уязвен буду?


7
Ныне же преутруждена мя сотвори, буя, согнивша, и ят мя.


8
В послушество бых, и воста во мне лжа моя, противно лицу моему отвеща.


9
Гневен быв низложи мя, возскрежета зубы на мя, стрелы разбойников Его нападоша на мя.


10
Остротою очес наскака, мечем порази мя в колена: вкупе же потекоша на мя:


11
предаде бо мя Господь в руки неправедных, нечестивым же поверже мя.


12
Мирствующа разсыпа мя, взяв мя за власы оборва, постави мя аки примету.


13
Обыдоша мя копиями бодуще во истесы моя, не щадяще: излияша на землю желчь мою,


14
низложиша мя труп на труп, текоша ко мне могущии,


15
вретище сошиша на кожу мою, и мощь моя на земли угасе.


16
Чрево мое сгоре от плача, на веждах же моих стень смертная,


17
неправедно же ни едино бе в руку моею: молитва же моя чиста.


18
Земле, да не покрыеши над кровию плоти моея, ниже да будет место воплю моему.


19
И ныне се, на небесех Послух мой, Свидетель же ми во вышних.


20
Да приидет моя мольба ко Господу, пред Нимже да каплет око мое.


21
Буди же обличение мужу пред Господем, и сыну человеческому ко ближнему его.


22
Лета же изочтеная приидоша, и путем, имже не возвращуся, пойду.


Глава 
17


1
Тлею духом носимь, прошу же гроба и не улучаю.


2
Молю болезнуя, и что сотворю? Украдоша же ми имение чуждии.


3
Кто есть сей? Рукою моею связан да будет.


4
Яко сердце их сокрыл еси от мудрости, сего ради да не вознесеши их.


5
Части возвестит злобы: очи же на сынех истаяста.


6
Положил же мя еси в притчу во языцех, смех же бых им.


7
Ослепоста бо от гнева очи мои, повоеван бых вельми от всех:


8
чудо объя истинных о сем, праведник же на беззаконника да востанет:


9
да содержит же верный путь свой, чистый же рукама да приимет дерзость.


10
Но обаче вси належите и приидите, не бо обретаю в вас истины.


11
Дние мои преидоша в течении, расторгошася же удове сердца моего.


12
Нощь в день преложих: свет близ от лица тмы.


13
Аще бо стерплю, ад ми есть дом, в сумраце же постлася ми постеля.


14
Смерть назвах отца моего быти, матерь же и сестру ми гной.


15
Где убо еще есть ми надежда, или благая моя узрю?


16
Или со мною во ад снидут, или вкупе в персть снидем.


Глава 
18


1
Отвещав же Валдад Савхейский, рече:


2
доколе не престанеши? Пожди, да и мы возглаголем.


3
И почто аки четвероножная умолчахом пред тобою?


4
Пребысть ти гнев. Что бо? Аще ты умреши, не населенна ли будет поднебесная? Или превратятся горы из оснований?


5
И свет нечестивых угаснет, и не произыдет их пламень:


6
свет его тма в жилищи, светилник же в нем угаснет:


7
да уловят меншии имения его, погрешит же его совет:


8
ввержена же бысть нога его в пругло, мрежею да повиется:


9
да приидут же нань пругла, укрепит нань жаждущих:


10
скрыся в земли уже его, и ятие его на стези.


11
Окрест да погубят его болезни: мнози же окрест ног его обыдут во гладе теснем:


12
падение же ему уготовано велико.


13
Поядены же да будут плесны ног его, красная же его да пояст смерть.


14
Отторжено же буди от жития его изцеление, да имет же его беда виною царскою.


15
Да вселится в храмине его в нощи его, посыпана да будут лепотная его жупелом:


16
под ним корения его да изсохнут, свыше же нападет пожатие его.


17
Память его да погибнет от земли, и (не) будет имя его на лицы внешнем:


18
да отринет его от света во тму:


19
не будет знаемь в людех его, ниже спасен в поднебесней дом его:


20
но в своих ему поживут инии, над ним воздохнуша последнии, первых же объя чудо.


21
Сии суть домове неправедных, сие же место неведущих Бога.


Глава 
19


1
Отвещав же Иов, рече:


2
доколе притрудну творите душу мою и низлагаете мя словесы? Уразумейте токмо, яко Господь сотвори мя сице.


3
Клевещете на мя, не стыдящеся мене належите ми.


4
Буди, яко воистинну аз прельстихся, и у мене водворяется погрешение, глаголати словеса, яже не подобаше, словеса же моя погрешают, и не во время:


5
буди же, яко на мя величаетеся, наскакаете же ми поношением:


6
разумейте убо, яко Господь есть иже смяте мя и ограду Свою на мя вознесе.


7
Се, смеюся поношению, не возглаголю: возопию, и нигдеже суд.


8
Окрест огражден есмь и не могу прейти: пред лицем моим тму положи,


9
славу же с мене совлече и отя венец от главы моея:


10
растерза мя окрест, и отидох: посече же яко древо надежду мою.


11
Люте же гнева употреби на мя и возмне мя яко врага.


12
Вкупе же приидоша искушения Его на мя, на путех же моих обыдоша мя наветницы.


13
Братия моя отступиша от мене, познаша чуждих паче мене, и друзие мои немилостиви быша:


14
не снабдеша мя ближнии мои, и ведящии имя мое забыша мя.


15
Соседи дому и рабыни моя, (яко) иноплеменник бых пред ними:


16
раба моего звах, и не послуша, уста же моя моляхуся:


17
и просих жену мою, призывах же лаская сыны подложниц моих:


18
они же мене в век отринуша, егда востану, на мя глаголют.


19
Гнушахуся мене видящии мя, и ихже любих, восташа на мя.


20
В кожи моей согниша плоти моя, кости же моя в зубех содержатся.


21
Помилуйте мя, помилуйте мя, о, друзие! Рука бо Господня коснувшаяся ми есть.


22
Почто мя гоните якоже и Господь? От плотей же моих не насыщаетеся?


23
Кто бо дал бы, да напишутся словеса моя, и положатся оная в книзе во век?


24
И на дщице железне и олове, или на камениих изваяются?


25
Вем бо, яко присносущен есть, иже имать искупити мя,


26
(и) на земли воскресити кожу мою терпящую сия, от Господа бо ми сия совершишася,


27
яже аз в себе свем, яже очи мои видеста, а не ин: вся же ми совершишася в недре.


28
Аще же и речете: что речем противу ему? И корень словесе обрящем в нем.


29
Убойтеся же и вы от меча: ярость бо на беззаконныя найдет, и тогда увидят, где есть их вещество.


Глава 
20


1
Отвещав же Софар Минейский, рече:


2
не тако мнех сия тебе рещи противу, и не разумеете паче нежели и аз.


3
Наказание срамления моего услышу, и дух от разума отвещавает ми.


4
Еда сих не уразумел еси от века, отнележе положен человек бысть на земли?


5
Веселие бо нечестивых падение страшно, обрадование же беззаконных пагуба.


6
Аще взыдут на небо дары его, жертва же его облаков коснется:


7
егда бо мнится уже утвержден быти, тогда в конец погибнет. Видевшии же его рекут: где есть?


8
Якоже сон отлетевый не обрящется, отлете же аки мечтание нощное.


9
Око призре, и не приложит, и ктому не познает его место его.


10
Сынов его да погубят меншии, и руце его возжгут болезни.


11
Кости его наполнишася грехов юности его и с ним на персти уснут.


12
Аще усладится во устех его злоба, скрыет ю под языком своим:


13
не пощадит ея, и не оставит ея, и соберет ю посреде гортани своего,


14
и не возможет помощи себе: желчь аспидов во чреве его.


15
Богатство неправедно собираемо изблюется, из храмины его извлечет его Ангел.


16
Ярость же змиеву да ссет, да убиет же его язык змиин.


17
Да не узрит отдоения скотов, ниже прибытка меда и масла кравия.


18
Вотще и всуе трудися, богатство, от негоже не вкусит, якоже клоки не сожваемы и не поглощаемы.


19
Многих бо немощных домы сокруши, жилище же разграби и не постави.


20
Несть спасения имению его, в вожделении своем не спасется.


21
Несть останка брашну его, сего ради не процветут ему благая.


22
Егда же мнит уже исполнь быти, оскорбится, всяка же беда нань приидет.


23
Аще како либо исполнит чрево свое, напустит нань ярость гнева, одождит на него болезни:


24
и не спасется от руки железа, да устрелит его лук медян,


25
и да пройдет сквозе тело его стрела: звезды же в жилищих его: да приидут нань страси,


26
и всяка тма на нем да пребудет: да пояст его огнь нераздеженый, да озлобит же пришлец дом его:


27
и да открыет небо беззакония его, и земля да востанет нань:


28
да извлечет дом его пагуба до конца, день гнева да приидет нань.


29
Сия часть человека нечестиваго от Господа и стяжание имений его от Надзирателя.