Глава 
6


1
Отвещав же Иов, рече:


2
аще бы кто веся извесил гнев мой, болезни же моя взял бы на мерило вкупе,


3
то песка морскаго тяжчайшии были бы: но, якоже мнится, словеса моя зла суть.


4
Стрелы бо Господни в теле моем суть, ихже ярость испивает кровь мою: егда начну глаголати, бодут мя.


5
Что бо? Еда вотще возревет дивий осел, разве брашна прося? Или возревет гласом вол, в яслех имеяй брашно?


6
Снестся ли хлеб без соли? Или есть вкус во тщих словесех?


7
Не может бо утишитися душа моя: смрад бо зрю брашна моя, якоже воню львову.


8
Аще бо дал бы, да приидет прошение мое, и надежду мою дал бы Господь.


9
Начен Господь да уязвляет мя, до конца же да не убиет мя.


10
Буди же ми град гроб, на егоже стенах скаках в нем: не пощажу: не солгах бо во словесех святых Бога моего.


11
Кая бо крепость моя, яко терплю? Или кое ми время, яко терпит моя душа?


12
Еда крепость камения крепость моя? Или плоти моя суть медяны?


13
Или не уповах на него? Помощь же от мене отступи,


14
отречеся от мене милость, посещение же Господне презре мя.


15
Не воззреша на мя ближнии мои: якоже поток оскудеваяй, или якоже волны преидоша мя:


16
иже мене бояхуся, ныне нападоша на мя:


17
якоже снег или лед смерзлый, егда истает теплоте бывшей, не ктому познавается, что бе:


18
тако и аз оставлен есмь от всех, погибох же и бездомок бых:


19
видите пути Феманския, на стези Савонския смотрящии,


20
и студа исполнени будут на грады и на имения надеющиися.


21
Ныне же и вы наидосте на мя немилостивно: убо видевше мой струп убойтеся.


22
Что бо? Еда что у вас просих, или вашея крепости требую,


23
да спасете мя от врагов, или из руки сильных избавите мя?


24
Научите мя, аз же умолчу: аще что погреших, скажите ми.


25
Но, якоже мнится, зла (суть) мужа истиннаго словеса, не от вас бо крепости прошу:


26
ниже обличение ваше словесы мя утолит, ниже бо вещания вашего словес стерплю.


27
Обаче яко на сира нападаете, наскачете же на друга вашего.


28
Ныне же воззрев на лица ваша, не солжу.


29
Сядите ныне, и да не будет неправедно, и паки ко праведному снидитеся.


30
Ибо несть в языце моем неправды, и гортань мой не разуму ли поучается?


Глава 
7


1
Не искушение ли житие человеку на земли, и якоже наемника повседневнаго жизнь его?


2
Или якоже раб бояйся господа своего и улучив сень? Или якоже наемник ждый мзды своея?


3
Такожде и аз ждах месяцы тщы, нощи же болезней даны ми суть.


4
Аще усну, глаголю: когда день? Егда же востану, паки: когда вечер? Исполнен же бываю болезней от вечера до утра.


5
Месится же мое тело в гнои червей, обливаю же грудие земли, гной стружа.


6
Житие же мое есть скоряе беседы, погибе же во тщей надежди.


7
Помяни убо, яко дух мой живот, и ктому не возвратится око мое видети благая.


8
Не узрит мене око видящаго мя: очи Твои на мне, и ктому несмь,


9
якоже облак очищен от небесе: аще бо человек снидет во ад, ктому не взыдет,


10
ни возвратится во свой дом, ниже имать его познати ктому место его.


11
Убо ниже аз пощажу уст моих, возглаголю в нужди сый, отверзу уста моя горестию души моея сотеснен.


12
Еда море есмь, или змий, яко учинил еси на мя хранение?


13
Рекох, яко утешит мя одр мой, произнесу же ко мне на едине слово на ложи моем:


14
устрашаеши мя сониями и видениями ужасаеши мя:


15
свободиши от духа моего душу мою, от смерти же кости моя.


16
Не поживу бо во век, да долготерплю: отступи от мене, тще бо житие мое.


17
Что бо есть человек, яко возвеличил еси его? Или яко внимаеши умом к нему?


18
Или посещение твориши ему по всяко утро и в покои судити его имаши?


19
Доколе не оставиши мене, ниже отпускаеши мя, дондеже поглощу слины моя в болезни?


20
Аще аз согреших, что Тебе возмогу соделати, сведый ум человечь? Почто мя еси положил прекословна Тебе, и есмь Тебе бременем?


21
Почто неси сотворил беззаконию моему забвения, и очищения греха моего? Ныне же в землю отиду, утренюяй же несмь ктому.


Глава 
8


1
Отвещав же Валдад Савхейский, рече: доколе глаголати будеши сия?


2
Дух многоглаголив во устех твоих.


3
Еда Господь обидит судяй? Или вся сотворивый возмятет правду?


4
Аще сынове твои согрешиша пред Ним, посла руку на беззакония их:


5
ты же утренюй ко Господу Вседержителю моляся:


6
аще чист еси и истинен, молитву твою услышит, устроит же ти паки житие правды:


7
будут убо первая твоя мала, последняя же твоя без числа.


8
Вопроси бо рода перваго, изследи же по роду отцев:


9
вчерашни бо есмы и не вемы, сень бо есть наше житие на земли:


10
не сии ли научат тя и возвестят ти и от сердца изнесут словеса?


11
Еда произничет рогоз без воды, или растет ситник без напаяния?


12
Еще сущу на корени, и не пожнется ли? Прежде напаяния всякое былие не изсыхает ли?


13
Тако убо будут последняя всех забывающих Господа: надежда бо нечестиваго погибнет:


14
не населен бо будет дом его, паучина же сбудется селение его.


15
Аще подпрет храмину свою, не станет: емшуся же ему за ню, не пребудет.


16
Влажный бо есть под солнцем, и от тления его леторасль его изыдет:


17
на собрании камения спит, посреде же кремения поживет:


18
аще поглотит место, солжет ему, не видел еси таковая,


19
яко превращение нечестиваго таково, из земли же инаго произрастит.


20
Господь бо не отринет незлобиваго: всякаго же дара от нечестиваго не приимет.


21
Истинным же уста исполнит смеха, устне же их исповедания.


22
Врази же их облекутся в студ: жилище же нечестиваго не будет.


Глава 
9


1
Отвещав же Иов, рече:


2
воистинну вем, яко тако есть: како бо будет праведен человек у Господа?


3
Аще бо восхощет судитися с Ним, не послушает Его, да не преречет ко единому словеси Его от тысящи.


4
Премудр бо есть мыслию, крепок же и велик: кто жесток быв противу Его, пребысть?


5
Обетшаяй горы, и не ведят, превращаяй я гневом:


6
трясый поднебесную из оснований, столпи же ея колеблются:


7
глаголяй солнцу, и не восходит, звезды же печатствует:


8
прострый един небо и ходяй но морю, яко по земли:


9
творяй Плиады и Еспера, и Арктура и сокровища южная:


10
творяй велия и неизследованная, славная же и изрядная, имже несть числа.


11
Аще приидет ко мне, не имам видети: и аще мимоидет мене, никако уразумех.


12
Аще возмет, кто возвратит? Или кто речет Ему: что сотворил еси?


13
Сам бо отвращает гнев, слякошася под Ним кити поднебеснии.


14
Аще же мя услышит, или разсудит глаголы моя?


15
Аще бо и праведен буду, не услышит мене, суду Его помолюся:


16
аще же воззову, и услышит мя, не иму веры, яко услыша глас мой.


17
Да не мглою мя потребит, многа же ми сотрения сотвори всуе,


18
не оставляет бо мя отдохнути, исполни же мя горести.


19
Понеже силен есть крепостию: кто убо суду Его воспротивится?


20
Аще бо буду праведен, уста моя нечестия сотворят: аще же буду непорочен, стропотен буду.


21
Аще бо нечестие сотворих, не вем душею моею: обаче отемлется ми живот.


22
Темже рех: велика и сильна губит гнев.


23
Яко лукавии смертию лютою погибнут, обаче праведным посмеваются.


24
Предана есть земля в руце нечестиваго, лица судий ея покрывает: аще же не Сам есть, кто есть?


25
Житие же мое есть легчае скоротечца: отбегоша и не видеша.


26
Или есть кораблем след пути, или орла летяща, ищуща яди?


27
Аще бо реку: забуду глаголя, приникнув лицем воздохну,


28
трясуся всеми удесы: вем бо, яко не безвинна мя оставиши.


29
Аще же нечестив есмь, почто не умрох?


30
Аще бо измыюся снегом и очищуся руками чистыми,


31
доволно во скверне омочил мя еси, возгнушася же мною одежда моя.


32
Неси бо человек, якоже аз, Емуже противопрюся, да приидем вкупе на суд.


33
О, дабы ходатай нам был, и обличаяй и разслушаяй между обема.


34
Да отимет от мене жезл, страх же Его да не смущает мене:


35
и не убоюся, но возглаголю, ибо тако не вем сам себе.


Глава 
10


1
Труждаюся душею моею, стеня испущу на мя глаголы моя, возглаголю горестию души моея одержимь


2
и реку ко Господеви: не учи мя нечествовати, и почто ми сице судил еси?


3
Или добро Ти есть, аще вознеправдую, яко презрел еси дела руку Твоею, совету же нечестивых внял еси?


4
Или якоже человек видит, видиши? Или якоже зрит человек, узриши?


5
Или житие Твое человеческо есть? Или лета Твоя яко дние мужа?


6
Яко истязал еси беззаконие мое и грехи моя изследил еси.


7
Веси бо, яко не нечествовах: но кто есть изимаяй из руку Твоею?


8
Руце Твои сотвористе мя и создасте мя: потом же преложив, поразил мя еси.


9
Помяни, яко брение мя создал еси, в землю же паки возвращаеши мя.


10
Или не якоже млеко измелзил мя еси, усырил же мя еси равно сыру?


11
Кожею же и плотию мя облекл еси, костьми же и жилами сшил мя еси:


12
живот же и милость положил еси у мене, посещение же Твое сохрани мой дух.


13
Сия имеяй в Тебе, вем, яко вся можеши, и невозможно Тебе ничтоже.


14
Аще бо согрешу, храниши мя, от беззакония же не безвинна мя сотворил еси.


15
Аще бо нечестив буду, люте мне, аще же буду праведен, не могу возникнути: исполнен бо есмь безчестия,


16
ловимь бо есмь аки лев на убиение: паки же преложив, люте убиваеши мя.


17
Обновляяй на мя испытание мое, гнева бо великаго на мя употребил еси и навел еси на мя искушения.


18
Почто убо мя из чрева извел еси, и не умрох, око же мене не видело бы,


19
и бых бы аки не был? Почто убо из чрева во гроб не снидох?


20
Или не мало есть время жизни моея? Остави мене почити мало,


21
прежде даже отиду, отнюдуже не возвращуся, в землю темну и мрачну,


22
в землю тмы вечныя, идеже несть света, ниже видети живота человеческаго.