Глава 
1

Нав.1  с толкованием

1
И бысть по скончании Моисеа раба Господня, и рече Господь Иисусу сыну Навину, служителю Моисеову, глаголя:

Нав.1:1  с толкованием

2
Моисей раб Мой скончася: ныне убо востав прейди Иордан ты и вси людие сии в землю, юже Аз даю им:

Нав.1:2  с толкованием

3
всякое место, по немуже прейдете стопою ног ваших, вам дам е, якоже глаголах Моисею:

Нав.1:3  с толкованием

4
пустыню и Антиливан сей даже до реки великия реки Евфрата, всю землю Ефеоню, и даже до моря последняго: от запада солнца будут пределы ваши:

Нав.1:4  с толкованием

5
не супротивится человек пред вами во вся дни живота твоего, и якоже бех с Моисеом, тако буду и с тобою: и не оставлю тебе, ниже презрю тя:

Нав.1:5  с толкованием

6
крепися и мужайся: ты бо разделиши людем сим землю, еюже кляхся отцем вашым дати им:

Нав.1:6  с толкованием

7
крепися убо, и мужайся зело, хранити и творити, якоже тебе заповеда Моисей раб Мой, и не уклонися от них ни на десно, ни на лево, да смыслиши во всех, яже твориши:

Нав.1:7  с толкованием

8
и да не отступит книга закона сего от уст твоих, и да поучаешися в ней день и нощь, да уразумееши творити вся писанная: тогда благоуспееши и исправиши пути твоя, и тогда уразумееши:

Нав.1:8  с толкованием

9
се, заповедаю тебе: крепися и мужайся, ни ужасайся, ниже убойся: яко с тобою Господь Бог твой во всех, аможе аще пойдеши.

Нав.1:9  с толкованием

10
И заповеда Иисус книгочиям людским, глаголя:

Нав.1:10  с толкованием

11
внидите посреде полка людий и заповедайте людем, глаголюще: уготовайте брашно, яко еще три дни, и вы прейдете Иордан сей, вшедше прияти землю, юже Господь Бог отец ваших дает вам в причастие.

Нав.1:11  с толкованием

12
И Рувиму и Гаду и полуплемени Манассиину рече Иисус:

Нав.1:12  с толкованием

13
помяните слово, еже заповеда вам Моисей раб Господень, глаголя: Господь Бог ваш упокои вас и даде вам землю сию:

Нав.1:13  с толкованием

14
жены ваши и дети ваши и скоти ваши да живут на земли, юже даде вам Моисей у Иордана: вы же прейдете вооружени пред братиею вашею, всяк крепок, и споборствуете им,

Нав.1:14  с толкованием

15
дондеже упокоит Господь Бог ваш братию вашу, якоже и вас, и наследят и сии землю, юже Господь Бог ваш дает им: и отидете кийждо в наследие свое, и наследите е, еже даде вам Моисей об Ону страну Иордана от востоков солнца.

Нав.1:15  с толкованием

16
И отвещавше Иисусу, реша: вся, елика заповеси нам, сотворим, и во всякое место, аможе послеши нас, пойдем:

Нав.1:16  с толкованием

17
по всем, елика слушахом Моисеа, тебе послушаем: токмо да будет Господь Бог наш с тобою, якоже бе с Моисеем:

Нав.1:17  с толкованием

18
человек же, иже аще не покорится тебе и иже не послушает словес твоих, якоже заповеси ему, да умрет: точию крепися и мужайся.

Нав.1:18  с толкованием

Глава 
2

Нав.2  с толкованием

1
И посла Иисус сын Навин из Саттина два юношы соглядати втай, глаголя: взыдите и видите землю и Иерихон. И шедша два юношы внидоста во Иерихон и внидоста в дом жены блудницы, ейже имя Раав: и витаста тамо.

Нав.2:1  с толкованием

2
И поведаша царю Иерихонскому, глаголюще: се, мужие внидоша семо (в сию нощь) от сынов Израилевых соглядати землю.

Нав.2:2  с толкованием

3
И посла царь Иерихонский и рече к Рааве, глаголя: изведи мужы вшедшыя в дом твой нощию: соглядати бо землю приидоша.

Нав.2:3  с толкованием

4
И поемши жена два мужа, сокры их: и рече им, глаголющи: приидоша ко мне мужие, но не вем откуду быша:

Нав.2:4  с толкованием

5
егда же врата затворяху в сумраки, и мужие изыдоша: не вем камо поидоша: пожените скоро вслед их, аще постигнете их.

Нав.2:5  с толкованием

6
Она же возведе я на храмину и сокры я в паздере льняне собранем у нея на храмине.

Нав.2:6  с толкованием

7
И мужие гнаша вслед их путем ко Иордану к преходом, и врата затворены быша.

Нав.2:7  с толкованием

8
И бысть егда изыдоша женущии вслед их, и сии прежде неже уснути им, и она взыде к ним на храмину и рече к ним:

Нав.2:8  с толкованием

9
вем, яко предаде Господь землю (сию) вам: нападе бо страх ваш на ны, и ужасошася вси обитающии на земли от лица вашего:

Нав.2:9  с толкованием

10
слышахом бо, яко изсуши Господь Бог море Чермное пред лицем вашим, егда исхождасте из Египта, и елика сотвористе двоим царем Аморрейским, иже быша об ону страну Иордана, Сиону и Огу, ихже потребисте:

Нав.2:10  с толкованием

11
и слышавше мы ужасохомся в сердцы нашем, и не ста ктому дух ни во единем от нас от лица вашего: яко Господь Бог ваш, Бог на небеси горе и на земли доле:

Нав.2:11  с толкованием

12
и ныне кленитеся мне Господем Богом (вашим), яко аз творю милость вам, да сотворите и вы милость в дому отца моего, и дадите ми знамение истинно:

Нав.2:12  с толкованием

13
и оживите дом отца моего, и матерь мою, и братию мою, и сестры моя, и вся, елика суть им, и измите душы нашя от смерти.

Нав.2:13  с толкованием

14
И рекоша ей мужие: душа наша вместо вас на смерть, аще ныне не объявиши нас. Она же рече: и будет егда предаст Господь вам град (сей), сотворите мне милость и истину.

Нав.2:14  с толкованием

15
И свеси их на верве окном: яко дом ея при стене, и при стене сия живяше:

Нав.2:15  с толкованием

16
и рече им: отидите в гору, да не срящут вас гонящии, и скрыйтеся тамо три дни, дондеже возвратятся гонящии вслед вас: и по сих отидете в путь ваш.

Нав.2:16  с толкованием

17
И реша к ней мужие: неповинни есмы клятве сей твоей, еюже закляла еси нас:

Нав.2:17  с толкованием

18
се, мы входим в часть града, и поставиши знамение, вервь червлену, сию да обяжеши у окна, имже спустила еси нас: отца же твоего и матерь твою, и братию твою и весь дом отца твоего да собереши к себе в дом твой:

Нав.2:18  с толкованием

19
и будет всяк, иже аще изыдет из дверий дому твоего вон, сам себе повинен будет, мы же неповинни (будем) клятве твоей сей: и елицы аще с тобою будут в дому твоем, мы будем повинни, аще рука прикоснется их:

Нав.2:19  с толкованием

20
аще же кто нас обидит, или открыет словеса наша сия, будем неповинни клятве твоей сей, еюже закляла еси нас.

Нав.2:20  с толкованием

21
И рече им: по словеси вашему тако да будет. И отпусти их, и отидоша: и привяза вервь червлену у окна.

Нав.2:21  с толкованием

22
И отидоша, и проидоша в гору, и пребыша тамо три дни, дондеже возвратишася гнавшии. И искаша гонящии по всем путем, и не обретоша.

Нав.2:22  с толкованием

23
И возвратистася два юношы и снидоста с горы: и преидоста (Иордан) ко Иисусу сыну Навину, и поведаста ему вся случившаяся има:

Нав.2:23  с толкованием

24
и реста ко Иисусу: яко предаде Господь Бог наш в руце наши всю землю, и убояшася вси живущии на земли той от нас.

Нав.2:24  с толкованием

Глава 
3

Нав.3  с толкованием

1
И воста заутра Иисус, и воздвигошася из Саттина, и приидоша до Иордана той и вси сынове Израилевы, и сташа тамо прежде неже прейти.

Нав.3:1  с толкованием

2
И бысть по триех днех, проидоша книгочия чрез полк,

Нав.3:2  с толкованием

3
и заповедаша людем, глаголюще: егда узрите кивот завета Господа Бога нашего, и жерцы нашя, и левиты воздвизающыя его, да воздвигнетеся и вы от мест ваших и пойдете вслед его:

Нав.3:3  с толкованием

4
но подалее да будет между вами и оным, елико две тысящы лакот станете: не приближитеся к нему, да увесте путь, по немуже пойдете: не ходисте бо путем тем ни вчера, ни третияго дне.

Нав.3:4  с толкованием

5
И рече Иисус к людем: очиститеся наутрие, яко заутра сотворит в вас Господь чудная.

Нав.3:5  с толкованием

6
И рече Иисус к жерцем: воздвигните кивот завета Господня и предидите пред людьми. И взяша жерцы кивот завета Господня и идоша пред людьми.

Нав.3:6  с толкованием

7
И рече Господь ко Иисусу: в сей день начинаю возвышати тя пред всеми сынми Израилевыми, да уведят, якоже бех с Моисеом, тако буду и с тобою:

Нав.3:7  с толкованием

8
и ныне заповеждь жерцем воздвизающым кивот завета, глаголя: егда внидете на часть воды Иордана, и во Иордане станете.

Нав.3:8  с толкованием

9
И рече Иисус сыном Израилевым: приступите семо, и слышите слово Господа Бога вашего:

Нав.3:9  с толкованием

10
в сих увесте, яко Господь живяй в вас и потребляяй потребит от лица вашего Хананеа и Хеттеа, и Ферезеа и Евеа, и Гергесеа и Аморреа и Иевусеа:

Нав.3:10  с толкованием

11
се, кивот завета Господа всея земли преходит Иордан:

Нав.3:11  с толкованием

12
изберите себе дванадесять мужей от сынов Израилевых, единаго от коегождо племене,

Нав.3:12  с толкованием

13
и будет егда почиют нози жерцев воздвизающих кивот завета Господа всея земли в воде Иордана, вода Иорданова оскудеет, вода же низтекущая станет.

Нав.3:13  с толкованием

14
И бысть егда воздвигнушася людие от кущ своих прейти Иордан, жерцы же воздвигоша кивот завета Господня пред людьми:

Нав.3:14  с толкованием

15
егда же внидоша жерцы воздвижуще кивот завета Господня во Иордан, и нози жерцев воздвизающих кивот завета Господня омочишася в части воды Иордана, Иордан же наполняшеся во вся краи своя, якоже во дни жатвы пшеницы:

Нав.3:15  с толкованием

16
и сташа воды текущыя свыше, ста огустение едино отлучившееся далече зело зело от Адами града даже до страны Кариафиарима: низтекущая же низтече в море Аравско, в море Сланое, дондеже до конца оскуде.

Нав.3:16  с толкованием

17
И людие стояху прямо Иерихону. И сташа жерцы воздвизающии кивот завета Господня на сусе посреде Иордана: и вси сынове Израилевы прехождаху по суху, дондеже скончаша вси людие преходяще Иордан.

Нав.3:17  с толкованием

Глава 
4

Нав.4  с толкованием

1
И егда скончаша вси людие преходяще Иордан, и рече Господь к Иисусу, глаголя:

Нав.4:1  с толкованием

2
поими дванадесять мужей от людий, мужа единаго от коегождо племене,

Нав.4:2  с толкованием

3
повели им, глаголя: возмите от среды Иордана, идеже стояша нози жречестии, готовых дванадесять каменей, и изнесше я с собою, положите в полце вашем, идеже станете тамо в нощи.

Нав.4:3  с толкованием

4
И призвав Иисус дванадесять мужей славных от сынов Израилевых, единаго от коегождо племене, рече им:

Нав.4:4  с толкованием

5
идите предо мною пред лицем Господним в средину Иордана: и взем оттуду кийждо камень един да возложит на рамена своя, по числу племен (сынов) Израилевых:

Нав.4:5  с толкованием

6
да будут вам сии в знамение посреде вас лежаще всегда, да егда вопросит тебе утро сын твой, глаголя: что суть камение сие вам?

Нав.4:6  с толкованием

7
И ты возвестиши сыну твоему, глаголя: яко оскуде Иордан река от лица кивота завета Господа всея земли, егда прехождаше его, и изсяче вода Иорданова: и будут вам камение сие в память сынов Израилевых даже до века.

Нав.4:7  с толкованием

8
И сотвориша тако сынове Израилевы, якоже заповеда Господь Иисусу: и вземше дванадесять каменей от среды Иордана, якоже заповеда Господь Иисусу в скончании прехождения сынов Израилевых, и принесоша их с собою в полк, и положиша их тамо.

Нав.4:8  с толкованием

9
Постави же Иисус и другия дванадесять каменей в самем Иордане на месте, идеже стояху нози жерцев воздвизающих кивот завета Господня, и суть тамо даже до сего дне.

Нав.4:9  с толкованием

10
Стояху же жерцы воздвизающии кивот завета Господня во Иордане, дондеже сконча Иисус вся, елика заповеда Господь Иисусу поведати людем, по всем, елика заповеда Моисей Иисусу: и потщашася людие, и преидоша.

Нав.4:10  с толкованием

11
И бысть егда скончаша вси людие преходити (Иордан), прейде и кивот завета Господня, и камение пред ними.

Нав.4:11  с толкованием

12
И преидоша сынове Рувимли и сынове Гадовы и пол племене Манассиина устроены пред сынми Израилевы, якоже заповеда им Моисей:

Нав.4:12  с толкованием

13
четыредесять тысящ вооружени на рать преидоша пред Господем на брань ко граду Иерихону.

Нав.4:13  с толкованием

14
В той день возвеличи Господь Иисуса пред всем родом Израилевым: и бояхуся его, якоже бояхуся Моисеа, елико время поживе.

Нав.4:14  с толкованием

15
И рече Господь ко Иисусу, глаголя:

Нав.4:15  с толкованием

16
заповеждь жерцем, воздвизающым кивот завета свидения, изступити из Иордана.

Нав.4:16  с толкованием

17
И заповеда Иисус жерцем, глаголя: изыдите из Иордана.

Нав.4:17  с толкованием

18
И бысть егда изыдоша жерцы воздвизающии кивот завета Господня от среды Иордана, и поставиша ноги на сусе, и устремися вода Иорданова на место и пойде якоже вчера и третияго дне по всему краю.

Нав.4:18  с толкованием

19
И людие взыдоша от Иордана в десятый день перваго месяца: и ополчишася сынове Израилевы в Галгалех на стране, яже на восток солнца от Иерихона.

Нав.4:19  с толкованием

20
И дванадесять камения сия, яже взя от Иордана, постави Иисус в Галгалех, и рече к сыном Израилевым, глаголя:

Нав.4:20  с толкованием

21
егда вопросят вас сынове ваши, глаголюще: что суть камение сие?

Нав.4:21  с толкованием

22
Возвестите сыном вашым: яко по суху прейде Израиль Иордан сей,

Нав.4:22  с толкованием

23
изсушившу Господу Богу вашему воду Иорданю пред ними, дондеже преидоша, якоже сотвори Господь Бог ваш Чермному морю, еже изсуши Господь Бог ваш пред вами, дондеже преидохом:

Нав.4:23  с толкованием

24
да уведят вси языцы земнии, яко рука Господня крепка есть, и вы да чтете Господа Бога вашего во всякое время.

Нав.4:24  с толкованием

Глава 
5

Нав.5  с толкованием

1
И бысть егда услышаша царие Аморрейстии, иже бяху об ону страну Иордана, и царие Финическии, иже бяху близ моря, яко изсуши Господь Бог Иордан реку пред сыны Израилевыми, внегда преходити им, и истаяша мысли их, и ужасошася, и не бяше в них смышления ни единаго от лица сынов Израилевых.

Нав.5:1  с толкованием

2
В сие же время рече Господь Иисусу: сотвори себе ножи каменны от камене остраго, и сед обрежи сыны Израилевы второе.

Нав.5:2  с толкованием

3
И сотвори Иисус себе ножи каменны остры и обреза сыны Израилевы на месте нареченнем Холм обрезания.

Нав.5:3  с толкованием

4
И тако обреза Иисус сыны Израилевы: елицы тогда родишася на пути, и елицы тогда не обрезани быша от изшедших из Египта, всех сих обреза Иисус: вси людие изшедшии из Египта мужеска полу, вси мужие ратнии измроша в пустыни на пути, внегда изыдоша из Египта:

Нав.5:4  с толкованием

5
яко обрезани быша вси людие изшедшии, вси же людие, иже родишася в пустыни на пути, егда изыдоша из Египта, не обрезани быша:

Нав.5:5  с толкованием

6
четыредесять бо и два лета хождаше Израиль в пустыни Мавдаритиде: сего ради не обрезани быша мнози от тех воинов изшедших из земли Египетския, не послушавшии заповедий Господних, имже и определи Господь не видети земли, еюже клятся Господь отцем их дати нам землю кипящую медом и млеком:

Нав.5:6  с толкованием

7
вместо же сих постави сыны их, ихже обреза Иисус, яко скончаныя плоти бяху им, яко родишася на пути не обрезани:

Нав.5:7  с толкованием

8
обрезавшеся же покой имяху тамо седяще в полце, дондеже исцелишася.

Нав.5:8  с толкованием

9
И рече Господь Иисусу: в днешний день отях поношение Египетско от вас. И нарече имя месту тому Галгала, даже до сего дне.

Нав.5:9  с толкованием

10
И ополчишася сынове Израилевы в Галгалех и сотвориша Пасху в четвертыйнадесять день месяца от вечера на западе на поли Иерихонстем,

Нав.5:10  с толкованием

11
и ядоша от пшеницы земли оноя опресноки и новая:

Нав.5:11  с толкованием

12
в той день преста манна, повнегда ядоша от пшеницы земли, и ктому не бысть сыном Израилевым манны: но ядоша от плодов земли Финическия в лето оное.

Нав.5:12  с толкованием

13
И бысть егда бяше Иисус у Иерихона, и воззрев очима своима, виде человека стояща пред ним, и мечь его обнажен в руце его. И приступив Иисус, рече ему: наш ли еси, или от сопостат наших?

Нав.5:13  с толкованием

14
Он же рече ему: аз архистратиг силы Господни, ныне приидох (семо). И Иисус паде лицем своим на землю и поклонися ему, и рече: господи, что повелеваеши рабу твоему?

Нав.5:14  с толкованием

15
И рече архистратиг Господень ко Иисусу: иззуй сапог с ногу твоею: место бо, на немже ты стоиши, свято есть. И сотвори Иисус тако.

Нав.5:15  с толкованием

16
Иерихон же заключен и огражден бысть от лица сынов Израилевых: и никтоже из него исхождаше, ниже вхождаше.

Нав.5:16  с толкованием

Глава 
6

Нав.6  с толкованием

1
И рече Господь ко Иисусу: се, Аз предаю тебе в руце Иерихон и царя его, и сущыя в нем, сильны крепостию:

Нав.6:1  с толкованием

2
и обходите град окрест вси мужие крепцыи единою (на день), тако сотворите шесть дний:

Нав.6:2  с толкованием

3
и седмь жерцы да возмут седмь труб рожаных пред кивотом: и в седмый день оыдите град седмижды, и жерцы да вострубят в трубы рожаны:

Нав.6:3  с толкованием

4
и будет егда вострубите трубою рожаною, внегда услышати вам глас трубы, да воскликнут вси людие: и воскликнувшым им, падут сами стены града во основании своем, и внидут вси людие устремившеся кийждо прямо себе во град.

Нав.6:4  с толкованием

5
И вниде Иисус сын Навин к жерцем сынов Израилевых и рече им глаголя: возмите кивот завета Господня, и седмь жерцы да возмут седмь труб рожаных пред лицем кивота Господня.

Нав.6:5  с толкованием

6
И рече им глаголя: повелите людем оыти и окружити град, и воини да предидут вооружени пред кивотом Господним.

Нав.6:6  с толкованием

7
И бысть егда рече Иисус к людем, и седмь жерцы имуще седмь труб священных да предидут такожде пред Господем, и да вострубят доброгласно: и кивот завета Господня вслед по них да идет:

Нав.6:7  с толкованием

8
воини же да предидут напреди, и жерцы трубяще в трубы, и последующии созади кивота завета Господня бяху идуще и трубяще трубами.

Нав.6:8  с толкованием

9
Людем же заповеда Иисус, глаголя: не вопите, ниже да слышит кто гласа вашего, ниже да изыдет из уст ваших слово до дне, в оньже повелю вам сам воскликнути, и тогда воскликните.

Нав.6:9  с толкованием

10
И обшед кивот завета Божия окрест града (единою), абие иде в полк, и ста тамо.

Нав.6:10  с толкованием

11
Во вторый же день воста Иисус заутра, и воздвигоша жерцы кивот завета Господня.

Нав.6:11  с толкованием

12
И жерцы седмь носящии седмь труб предидяху пред кивотом Господним и трубиша трубами, и воини вооружени идяху, и прочии людие вслед кивота завета Господня идуще, и жерцы вострубиша трубами рожаными.

Нав.6:12  с толкованием

13
И обыдоша град в день вторый единою, и поидоша паки в полк: сице творяху шесть дний.

Нав.6:13  с толкованием

14
И бысть в седмый день, восташа в востание утреннее, и обыдоша град в той день седмижды.

Нав.6:14  с толкованием

15
И бысть во обхождении седмем вострубиша жерцы трубами, и рече Иисус к сыном Израилевым: воскликните, предаде бо Господь вам град:

Нав.6:15  с толкованием

16
и будет град сей проклят, и вся, елика суть в нем, Господу сил: токмо Раав блудницу снабдите ю, и вся, елика суть в дому ея, яко сокры прелагатаи, ихже посылахом:

Нав.6:16  с толкованием

17
но вы соблюдитеся от клятвы, да не когда помысливше вы возмете от клятвы, и сотворите полк сынов Израилевых клятву, и потребите ны:

Нав.6:17  с толкованием

18
злато же все и сребро, и медь и железо свято да будет Господу: в сокровище Господне да внесется.

Нав.6:18  с толкованием

19
И вострубиша жерцы трубами: егда же услышаша людие глас трубный, воскликнуша вси купно людие гласом великим и сильным: и падоша вся стены града окрест, и внидоша вси людие во град, кийждо противу себе, и прияша град.

Нав.6:19  с толкованием

20
И прокля и Иисус, и елика быша во граде, от мужеска полу и до женска, от юноши и до старца, и от телца до овцы и до осляте, все под мечь.

Нав.6:20  с толкованием

21
И двоим юношам соглядавшым землю рече Иисус: внидите в дом жены блудницы, и изведите ю оттуду, и вся, елика суть ея, якоже клястеся ей.

Нав.6:21  с толкованием

22
И внидоста два юношы соглядавшии град в дом жены, и изведосте Раав блудницу, и отца ея и матерь ея, и братию ея и все сродство ея, и вся елика быша ей, изведоста и постависта я вне полка Израилева.

Нав.6:22  с толкованием

23
И град сожгоша огнем со всем, еже бе в нем, кроме злата и сребра, меди и железа, яже отдаша в дом Господень внести Господеви.

Нав.6:23  с толкованием

24
И Раав блудницу и весь дом ея отеческий остави живы Иисус, и обитати сотвори во Израили даже до дне сего, понеже сокры прелагатаи, ихже посла Иисус соглядати Иерихона.

Нав.6:24  с толкованием

25
И прокля Иисус в той день, глаголя: проклят человек пред Господем, иже поставит и созиждет град сей Иерихон: на первенце своем оснует его, и на меншем своем поставит врата его. И сице сотвори Азан, иже от Вефиля: на Авироне первенце своем основа и, и на меншем спасенем постави врата его.

Нав.6:25  с толкованием

26
И бяше Господь со Иисусом, и бе имя его по всей земли.

Нав.6:26  с толкованием

Глава 
7

Нав.7  с толкованием

1
И прегрешиша сынове Израилевы прегрешением великим, и взяша от клятвы: взя бо Ахар сын Хармии, сына Замврии, сына Зары, от племене Иудина, от клятвы. И разгневася Господь яростию на сыны Израилевы.

Нав.7:1  с толкованием

2
И посла Иисус мужы от Иерихона в Гай, иже есть противу Вифавн на восток Вефиля, и рече им, глаголя: шедше соглядайте землю. И идоша мужие и соглядаша Гай.

Нав.7:2  с толкованием

3
И возвратишася ко Иисусу и рекоша ему: да не идут вси людие, но яко две тысящы или три тысящы мужей да идут и да воюют Гай: да не ведеши тамо всех людий, мало бо есть их (тамо).

Нав.7:3  с толкованием

4
И идоша от людий тамо, аки три тысящы мужей, и побегоша от лица мужей Гайских:

Нав.7:4  с толкованием

5
и убиша от них мужие Гайстии яко тридесять и шесть мужей, и отгнаша их от врат, дондеже сокрушиша их на стремнине: и ужасеся сердце людий, и бысть яко вода.

Нав.7:5  с толкованием

6
И растерза Иисус ризы своя, и паде на земли на лице свое пред Господем даже до вечера, сам и старцы Израилевы: и посыпаша персть на главы своя.

Нав.7:6  с толкованием

7
И рече Иисус: молюся, Господи Господи, вскую преведе раб Твой люди сия чрез Иордан предати их Аморреом на погубление? От, да быхом пребыли и вселилися у Иордана:

Нав.7:7  с толкованием

8
Господи, что реку? Понеже отврати Израиль выю свою пред враги своими:

Нав.7:8  с толкованием

9
и услышав Хананей и вси живущии на земли обыдут нас и потребят нас от земли: и что сотвориши имени Твоему великому?

Нав.7:9  с толкованием

10
И рече Господь ко Иисусу: востани, вскую ты пал еси на лице твое?

Нав.7:10  с толкованием

11
Согрешиша людие и преступиша завет Мой, егоже завещах к ним, и украдше от клятвы, скрыша в сосудех своих:

Нав.7:11  с толкованием

12
сего ради не могут сынове Израилевы стати пред лицем врагов своих, но хребет обратят пред враги своими, яко клятвою сташася: не приложу ксему быти с вами, аще не измете клятвы от себе самих:

Нав.7:12  с толкованием

13
востав очисти люди и рцы: очиститеся на утро: яко сия глаголет Господь Бог Израилев: клятва есть в вас, не возможете стати пред враги вашими, дондеже измете от себе самих клятву:

Нав.7:13  с толкованием

14
и соберитеся вси заутра по племеном (вашым), и будет племя, еже покажет Господь, да приведете по сонмом: и сонм, егоже покажет Господь, да приведете по домом: и дом, егоже покажет Господь, да приведете по мужем:

Нав.7:14  с толкованием

15
и иже обличится, да сожжется огнем, сам и вся елика суть его, яко преступи завет Господень и сотвори беззаконие во Израили.

Нав.7:15  с толкованием

16
И воста Иисус заутра, и приведе людий по племеном: и обличися племя Иудино.

Нав.7:16  с толкованием

17
И приведеся по сонмом, и обличися сонм Зараин: и приведеся сонм Зараин по мужем, и обличися дом Замвриин.

Нав.7:17  с толкованием

18
И приведеся дом его по мужем, и обличися Ахар сын Хармиин сына Замвриина, сына Зараня, от племене Иудина.

Нав.7:18  с толкованием

19
И рече Иисус Ахару: сыне мой, даждь славу днесь Господу Богу Израилеву, и даждь Ему исповедание, и исповеждь ми, что сотворил еси, и не утай от мене.

Нав.7:19  с толкованием

20
И отвеща Ахар Иисусу и рече: поистинне аз согреших пред Господем Богом Израилевым: сице и сице сотворих:

Нав.7:20  с толкованием

21
видех в плене ризу красну и добру и двести дидрахм сребра, и сосуд един злат, пятьдесят дидрахм вес его: и помыслив на ня взях: и се, сия сокровенна суть в земли в кущи моей, и сребро сокровенно под ними.

Нав.7:21  с толкованием

22
И посла Иисус послы, и идоша в кущу в полк: и сия бяху сокровенна в кущи его, и сребро под ними,

Нав.7:22  с толкованием

23
и изнесоша я из кущи, и принесоша ко Иисусу и к старцем Израилевым, и положиша я пред Господем.

Нав.7:23  с толкованием

24
И взя Иисус Ахара сына Зараня, и сребро и ризу и сосуд златый, и возведе его в дебрь Ахор, и сыны его и дщери его, и телцы его и ослята его и вся овцы его, и кущу его и вся имения его, и весь Израиль по нем: и возведе я (со всем) во емек Ахор.

Нав.7:24  с толкованием

25
И рече Иисус Ахару: почто потребил еси нас? Да потребит тя Господь, якоже и днесь. И побиша его камением весь Израиль, и сожгоша вся огнем, и наметаша их камением,

Нав.7:25  с толкованием

26
и наметаша на нем громаду камения велику. И преста Господь от ярости гнева Своего. Сего ради прозвася имя месту тому емек Ахор даже до дне сего.

Нав.7:26  с толкованием

Глава 
8

Нав.8  с толкованием

1
И рече Господь ко Иисусу: не бойся, ниже ужасайся: поими с собою вся мужы воинския, и востав взыди в Гай: се, предах в руце твои царя Гайска и землю его, и люди его и град его:

Нав.8:1  с толкованием

2
и да сотвориши Гаю и царю его, якоже сотворил еси Иерихону и царю его: и плен его и скоты его да плениши себе: устрой же себе подсаду граду за собою.

Нав.8:2  с толкованием

3
И воста Иисус и вси мужие воинстии, да внидут в Гай: и избра Иисус тридесять тысящ мужей воинских сильных крепостию и посла их нощию,

Нав.8:3  с толкованием

4
и заповеда им, глаголя: вы скрыйтеся за градом: не далече будите от града зело, и будите вси готови:

Нав.8:4  с толкованием

5
аз же и вси людие иже со мною приступим ко граду: и будет егда изыдут живущии в Гаи в сретение нам, якоже и прежде, и побегнем от лица их:

Нав.8:5  с толкованием

6
и егда изыдут вслед нас, отторгнем их от града: и рекут: бежат сии от лица нашего, якоже и прежде:

Нав.8:6  с толкованием

7
вы же востанете от подсады, и пойдете во град, и предаст его Господь Бог наш в руце ваши:

Нав.8:7  с толкованием

8
и будет егда возмете град, запалите его огнем, по словеси сему сотворите: се, заповедаю вам.

Нав.8:8  с толкованием

9
И посла их Иисус, и идоша в подсаду: и седоша между Вефилем и между Гаием, от моря Гаиа.

Нав.8:9  с толкованием

10
И востав Иисус заутра, согляда люди: и взыде сам и старцы Израилтестии пред людьми в Гай.

Нав.8:10  с толкованием

11
И вси людие воинстии с ним взыдоша, и идуще приидоша сопротив града от востоков: и подсады града от моря.

Нав.8:11  с толкованием

12
И ополчишася от севера Гаиа, и (бысть) дебрь между ими и между Гаием. И взя яко пять тысящ мужей, и положи их на подсаду между Вефилем и Гаием от запада Гаиа.

Нав.8:12  с толкованием

13
И поставиша людие весь полк от севера града, а прочая его от моря града. И пойде Иисус в нощь ону посреде дебри.

Нав.8:13  с толкованием

14
И бысть егда увиде царь Гайский, потщася, и воста рано и изыде в сретение им прямо на брань, сам и вси людие его с ним во время, пред лицем подсады: он же не ведяше, яко подсада ему есть за градом (его).

Нав.8:14  с толкованием

15
И увиде, и отиде Иисус и весь люд от лица их, и побеже путем пустыни,

Нав.8:15  с толкованием

16
и укрепися весь люд гнати вслед их, и погнаша вслед сынов Израилевых, и отступиша от града.

Нав.8:16  с толкованием

17
(И) не остася никтоже в Гаи и Вефили, иже не погна вслед Израиля: и оставиша град отверст, и гнаша вслед Израиля.

Нав.8:17  с толкованием

18
И рече Господь ко Иисусу: простри руку твою с копием, еже в руце твоей, на град, зане в руку твою предах его: и подсады востанут вскоре от места своего. И простре Иисус руку свою и с копием на град.

Нав.8:18  с толкованием

19
И подсады восташа скоро от места своего: и изыдоша, егда простре руку, и внидоша во град, и взяша его: и потщавшеся запалиша град огнем.

Нав.8:19  с толкованием

20
И озревшеся обитатели Гайстии вспять себе, узреша дым восходящь от града до небесе, и ктому не имеша камо побегнути, семо или овамо: людие же бегущии в пустыню обратишася на гонящих.

Нав.8:20  с толкованием

21
Иисус же и весь Израиль увидеша, яко взяша подсады град, и яко восходит дым градный до небесе: и обратившеся избиша мужей Гайских.

Нав.8:21  с толкованием

22
И сии изыдоша из града противу им, и быша посреде полка Израилева, сии отсюду и сии отонуду: и избиша их, дондеже не остася ни един от них цел, ни убежа.

Нав.8:22  с толкованием

23
И царя Гайска яша жива, и приведоша его ко Иисусу.

Нав.8:23  с толкованием

24
И бысть егда престаша сынове Израилевы секуще всех сущих в Гаи и сущих на полях и на горе исхода, идеже гониша их, и падоша вси острием меча на ней до конца: и обратися Иисус в Гай и посече их мечем.

Нав.8:24  с толкованием

25
И быша вси падшии в той день от мужеска полу и до женска дванадесять тысящ, вси живущии в Гаи.

Нав.8:25  с толкованием

26
Иисус же не обрати руки своея, юже простре с копием, дондеже прокля всех обитающих в Гаи.

Нав.8:26  с толкованием

27
Кроме скотов (их) и имения, яже во граде онем, вся плениша себе сынове Израилевы по повелению Господню, якоже повеле Господь Иисусу.

Нав.8:27  с толкованием

28
И запали град Иисус огнем: землю необитаему во век положи его даже до сего дне.

Нав.8:28  с толкованием

29
И царя Гайска повеси на древе сугубем: и бяше на древе до вечера: и заходящу солнцу повеле Иисус, и сняша тело его с древа, и повергоша и в ров пред враты града: и насыпа над ним громаду велику камения даже до сего дне.

Нав.8:29  с толкованием

30
Тогда созда Иисус олтарь Господу Богу Израилеву на горе Гевал,

Нав.8:30  с толкованием

31
якоже заповеда Моисей раб Господень сыном Израилевым, и якоже написася в законе Моисеове, олтарь от камений всецелых, на нихже не возложися железо: и вознесе тамо всесожжения Господу и жертву спасения.

Нав.8:31  с толкованием

32
И написа Иисус на камениих вторый закон, закон Моисеов, егоже написа пред сыны Израилевыми.

Нав.8:32  с толкованием

33
И весь Израиль, и старцы их и судии их и книгочия их предходяху сюду и сюду пред кивотом, и жерцы и левити воздвизаша кивот завета Господня, пришелец же и туземец: иже быша половина их близ горы Гаризин, и половина их близ горы Гевал, якоже заповеда Моисей раб Господень благословити людий Израилевых в первых.

Нав.8:33  с толкованием

34
И по сих тако прочте Иисус вся словеса закона сего, благословения и клятвы, по всему написанному в законе Моисеове.

Нав.8:34  с толкованием

35
Не бяше словесе от всех, яже заповеда Моисей Иисусу, егоже не прочте Иисус во уши всего сонма сынов Израилевых, мужем и женам, и детем и пришелцем приходящым ко Израилю.

Нав.8:35  с толкованием

Глава 
9

Нав.9  с толкованием

1
Егда же услышаша вси царие Аморрейстии, иже об ону страну Иордана, иже в горней и иже в равней, и иже во всем примории моря великаго и иже при Антиливане, и Хеттеи и Аморреи, и Гергесеи и Хананеи, и Ферезеи и Евеи и Иевусеи,

Нав.9:1  с толкованием

2
снидошася вкупе сещися со Иисусом и со Израилем единомысленно.

Нав.9:2  с толкованием

3
И живущии в холме в Гаваоне слышаша вся, елика сотвори Господь Иерихону и Гаю,

Нав.9:3  с толкованием

4
и сотвориша и сии с лукавством, и шедше уготоваша брашна и уготовашася: и вземше вретища ветха на ослы своя, и мехи вина ветхи и разседшыяся завязаны:

Нав.9:4  с толкованием

5
и сапоги ветхи и заплачены на ногу их, и ризы обветшаны на них, и хлебы брашна их беша пресохли и сплеснели и сдроблени.

Нав.9:5  с толкованием

6
И приидоша ко Иисусу в полк Израилев в Галгалы, и рекоша ко Иисусу и всему Израилю: от земли дальния приидохом, и ныне завещайте нам завет.

Нав.9:6  с толкованием

7
И рекоша сынове Израилевы к Хоррею: виждь, не посреде ли нас живеши, и како тебе завещаю завет?

Нав.9:7  с толкованием

8
И рекоша ко Иисусу: раби есмы твои. И рече к ним Иисус: откуду есте? И откуду приидосте?

Нав.9:8  с толкованием

9
И рекоша к нему: от дальния земли зело приидохом раби твои во имя Господа Бога твоего: слышахом бо имя Его и вся, елика сотвори во Египте,

Нав.9:9  с толкованием

10
и вся, елика сотвори двоим царем Аморрейским, иже быша об ону страну Иордана, Сиону царю Есевонску и Огу царю Васанску, иже живяше во Астарофе и во Едраине.

Нав.9:10  с толкованием

11
И слышавше рекоша к нам старцы наши и вси живущии на земли нашей, глаголюще: возмите себе брашно на путь и идите противу им, и рцыте к ним: раби есмы ваши, и ныне завещайте нам завет:

Нав.9:11  с толкованием

12
сии хлебы наши, теплыя на путь взяхом их от домов наших, в оньже день изыдохом приити к вам: ныне же пресхоша и быша содроблени:

Нав.9:12  с толкованием

13
и сии меси вина, ихже налияхом новы, и сии разседошася: и ризы нашя сия и обувища наша обетшаша от долгаго пути зело.

Нав.9:13  с толкованием

14
И взяша князи брашно их, а Господа не вопросиша.

Нав.9:14  с толкованием

15
И сотвори Иисус с ними мир, и устави к ним завет, еже снабдети их: и кляшася им князи сонма.

Нав.9:15  с толкованием

16
И бысть по триех днех по завещании к ним завета, услышаша, яко близ их суть и яко посреде их живут.

Нав.9:16  с толкованием

17
И восташа сынове Израилевы и внидоша во грады их в третий день: гради же их (бяху) Гаваон и Кефира, и Вирот и град Иарим.

Нав.9:17  с толкованием

18
И не сотвориша с ними рати (Иисус и) сынове Израилевы, яко кляшася им вси князи сонма Господем Богом Израилевым. И ропташа весь сонм Израилев на князей.

Нав.9:18  с толкованием

19
И рекоша вси князи всему сонму: мы кляхомся им Господем Богом Израилевым, и ныне не возможем коснутися их:

Нав.9:19  с толкованием

20
сие сотворим им, еже живити их, и снабдим их, и не будет на нас гнева клятвы ради, еюже кляхомся им.

Нав.9:20  с толкованием

21
И рекоша им князи: да живут сии, и будут древосечцы и водоносцы всему сонму. И сотвори весь сонм, якоже рекоша им князи.

Нав.9:21  с толкованием

22
И созва их Иисус и рече им, глаголя: почто прельстисте мя, глаголюще: далече есмы от тебе зело? Вы же населницы есте от живущих в нас:

Нав.9:22  с толкованием

23
и ныне прокляти есте: и не оскудеет от вас раб, ниже древосечец, ниже водоносец мне и Богу моему.

Нав.9:23  с толкованием

24
И отвещаша Иисусу, глаголюще: понеже возвестися нам (рабом твоим), елика заповеда Господь Бог твой Моисею рабу Своему, дати вам землю сию и потребити нас и вся живущыя на ней от лица вашего, сего ради убояхомся зело от душах наших от лица вашего, и сотворихом дело сие:

Нав.9:24  с толкованием

25
и ныне, се, мы подручни вам, якоже угодно есть вам, и якоже вам мнится, творите нам.

Нав.9:25  с толкованием

26
И сотвориша им сице: и избави я Иисус в той день от руку сынов Израилевых, и не убиша их.

Нав.9:26  с толкованием

27
И постави я Иисус в той день древосечцы и водоносцы всему сонму и олтарю Божию. Сего ради быша живущии в Гаваоне древосечцы и водоносцы олтарю Божию, даже до днешняго дне, и на месте еже аще изберет Господь.

Нав.9:27  с толкованием

Глава 
10

Нав.10  с толкованием

1
Егда же услыша Адонивезек царь Иерусалимский, яко взя Иисус Гай и потреби его, якоже сотвори Иерихону и царю его, тако сотвори и Гаю и царю его, и яко сами вдашася живущии в Гаваоне ко Иисусу и ко Израилю, и быша в них,

Нав.10:1  с толкованием

2
и убояшася сами в себе зело: ведяху бо, яко град бяше велик Гаваон, яко един от великих градов, и вси мужие иже в нем крепцы.

Нав.10:2  с толкованием

3
И посла Адонивезек царь Иерусалимский к Еламу царю Хевронску и Фераану царю Иеримуфску, и ко Афию царю Лахисску, и к Давиру царю Одолламску, глаголя:

Нав.10:3  с толкованием

4
приидите, взыдите ко мне и помозите ми, да повоюем Гаваона: вдашася бо сами ко Иисусу и к сыном Израилевым.

Нав.10:4  с толкованием

5
И собрашася и взыдоша пять царей Иевусейских: царь Иерусалимский и царь Хевронский, и царь Иеримуфский и царь Лахисский и царь Одолламский, сами и вси людие их, и обседоша Гаваона и воеваша на него.

Нав.10:5  с толкованием

6
И послаша живущии в Гаваоне ко Иисусу в полк Израилев в Галгалы, глаголюще: не отрешай руки твоея от раб твоих: взыди к нам скоро и помози нам, и изми нас: яко собрани суть на ны вси царие Аморрейстии, живущии в горней.

Нав.10:6  с толкованием

7
И взыде Иисус от Галгал, сам и вси людие воинстии с ним, всяк сильный крепостию.

Нав.10:7  с толкованием

8
И рече Господь ко Иисусу: не убойся их, яко в руце твои предах я: не останет от них ни един пред вами.

Нав.10:8  с толкованием

9
И прииде на них Иисус внезапу: всю бо нощь иде от Галгал.

Нав.10:9  с толкованием

10
И ужаси я Господь от лица сынов Израилевых: и сокруши я Господь сокрушением великим в Гаваоне: и погнаша я путем восхода Вифоронска, и сечаху их даже до Азика и до Макида.

Нав.10:10  с толкованием

11
Внегда же бежати им от лица сынов Израилевых до восхода Вифоронска, и Господь верже на ня камение великое града с небесе даже до Азика, и бысть множае умерших от града каменна, неже убиенных от сынов Израилевых мечем на брани.

Нав.10:11  с толкованием

12
Тогда глагола Иисус ко Господу, в оньже день предаде Господь Бог Аморреа под руку Израилеву, егда сокруши их в Гаваоне, и сокрушишася от лица Израилева: и рече Иисус: да станет солнце прямо Гаваону, и луна прямо дебри Елон.

Нав.10:12  с толкованием

13
И ста солнце и луна в стоянии, дондеже отмсти Бог врагом их. Не сие ли есть писано в книгах Праведнаго: и ста солнце посреде небесе и не идяше на запад в совершение дне единаго?

Нав.10:13  с толкованием

14
И не бысть день таковый ниже прежде, ниже последи, еже послушати Богу тако гласа человеча, яко Господь споборствова Израилю.

Нав.10:14  с толкованием

15
И возвратися Иисус и весь Израиль с ним в полк в Галгалы.

Нав.10:15  с толкованием

16
И убегоша пять царие сии и скрышася в пещере яже в Макиде.

Нав.10:16  с толкованием

17
И поведаша Иисусу, глаголюще: обретошася пять царие скрывшиися в пещере яже в Макиде.

Нав.10:17  с толкованием

18
И рече Иисус: привалите камение велие ко устию пещеры и приставите над ними мужы стрещи их:

Нав.10:18  с толкованием

19
вы же не стойте зде, гоняще вслед врагов ваших, и постигните останок их, и не дадите внити им во грады их, предаде бо я Господь Бог наш в руце наши.

Нав.10:19  с толкованием

20
И бысть егда преста Иисус и вси сынове Израилевы секуще их сечением великим зело даже до конца, и уцелевшии от них внидоша во грады тверды.

Нав.10:20  с толкованием

21
И возвратишася вси людие в полк ко Иисусу в Макиду здрави, и не возскомле никтоже от сынов Израилевых языком своим.

Нав.10:21  с толкованием

22
И рече Иисус: отверзите устие пещеры и изведите ко мне пять царей сих из пещеры.

Нав.10:22  с толкованием

23
И сотвориша тако, и изведоша к нему пять царей из пещеры: царя Иерусалимска и царя Хевронска, и царя Иеримуфска и царя Лахисска и царя Одолламска.

Нав.10:23  с толкованием

24
И егда изведоша их ко Иисусу, и созва Иисус всего Израиля и началники воинския ходящыя с ним, глаголя к ним: приступите и наступите ногами вашими на выи царей сих. И приступивше наступиша ногами своими на выи их.

Нав.10:24  с толкованием

25
И рече к ним Иисус: не бойтеся их, ни ужасайтеся: мужайтеся и крепитеся, яко сице сотворит Господь всем врагом вашым, ихже вы повоюете.

Нав.10:25  с толкованием

26
И уби я Иисус, и повеси я на пяти древесех: и быша висяще на древах даже до вечера.

Нав.10:26  с толкованием

27
И бысть при захождении солнца, повеле Иисус, и сняша я с древес, и ввергоша я в пещеру, в нюже вбегоша тамо: и завалиша камением великим пещеру до днешняго дне.

Нав.10:27  с толкованием

28
Взяша же и Макиду в той день, и избиша ю острием меча и царя ея, и потребиша их и все дышущее еже бяше в ней: и не остася никтоже в ней цел и избегший. И сотвориша царю Макидску, якоже сотвориша царю Иерихонску.

Нав.10:28  с толкованием

29
И отиде Иисус и весь Израиль с ним от Макиды в Левну, и облеже Левну.

Нав.10:29  с толкованием

30
И предаде ю Господь в руце Израилю: и взяша ю и царя ея, и избиша ю острием меча, и все дышущее в ней: и не остася в ней ни един цел и избегший. И сотвориша царю ея, якоже сотвориша царю Иерихонску.

Нав.10:30  с толкованием

31
И отиде Иисус и весь Израиль с ним от Левны в Лахис, и облеже его, и воеваше нань.

Нав.10:31  с толкованием

32
И предаде Господь Лахис в руце Израилевы: и взя его в день вторый, и избиша его острием меча (и все дышущее в нем), и потребиша его, якоже сотвориша Левне.

Нав.10:32  с толкованием

33
Тогда взыде Орам царь Газерск, помогаяй Лахису: и порази его Иисус острием меча, и люди его, дондеже не остася от них ни един цел и избегший.

Нав.10:33  с толкованием

34
И отиде Иисус и весь Израиль с ним от Лахиса во Аглон, и облеже и, и воева на него.

Нав.10:34  с толкованием

35
И предаде и Господь в руце Израилю: и взя и в той день, и изби и острием меча, и все дышущее в нем уби, и сотвори ему якоже и Лахису.

Нав.10:35  с толкованием

36
И отиде Иисус и весь Израиль с ним в Хеврон, и обсяде и:

Нав.10:36  с толкованием

37
и взя его, и порази его острием меча, и царя его, и вся веси его, и вся дышущая елика бяху в нем: не бе уцелевый: якоже сотвориша Аглону, потребиша и и все дышущее, елика в нем бяху.

Нав.10:37  с толкованием

38
И обратися Иисус и весь Израиль с ним в Давир: и обседше и,

Нав.10:38  с толкованием

39
взяша его и царя его и вся веси его, и поразиша и мечем, и потребиша и и все дышущее в нем, и не оставиша в нем ни единаго уцелевша: якоже сотвориша Хеврону и царю его, тако сотвориша Давиру и царю его, и якоже сотвориша Левне и царю ея.

Нав.10:39  с толкованием

40
И порази Иисус всю землю горную и Нагев, и равную и Асидоф, и вся цари его: не оставиша в нем ни единаго уцелевша: и все дышущее потребиша, якоже заповеда Господь Бог Израилю.

Нав.10:40  с толкованием

41
И изби их Иисус от Кадис-Варни даже до Газы, и всю землю Госом даже до Гаваона:

Нав.10:41  с толкованием

42
и вся цари сия и землю их взя Иисус единою: яко Господь Бог Израилев помогаше Израилю.

Нав.10:42  с толкованием

43
И возвратися Иисус и весь Израиль с ним в полк в Галгалы.

Нав.10:43  с толкованием

Глава 
11

Нав.11  с толкованием

1
Егда же услыша Иавин царь Асорск, посла ко Иоваву царю Мадонску, и к царю Семеронску и к царю Ахиавску,

Нав.11:1  с толкованием

2
и к царем иже в Сидоне велицем и в горней, и в Араву прямо Хенерефу, и на поляну, и в Нафеддор,

Нав.11:2  с толкованием

3
и к приморским Хананеам от восток, и к приморским Аморреом и Хеттеом, и Ферезеом и Иевусеом, иже на горе, и Евеом, и иже под Аермоном, в землю Массифа.

Нав.11:3  с толкованием

4
И изыдоша сии и царие их с ними, людие мнози, яко песок иже при краи моря множеством, и кони и колесницы многи зело.

Нав.11:4  с толкованием

5
И снидошася вси царие сии, и приидоша вкупе, и ополчишася при воде Маррон воевати на Израиля.

Нав.11:5  с толкованием

6
И рече Господь ко Иисусу: не убойся от лица их, яко заутра в сей час Аз предам их язвенных пред сыны Израилевы: конем их жилы пресечеши и колесницы их да сожжеши огнем.

Нав.11:6  с толкованием

7
И прииде Иисус и вси людие воинстии с ним на них к воде Марронстей внезапу, и нападоша на ня в горней.

Нав.11:7  с толкованием

8
И предаде их Господь под руце Израилевы: и секуще их, прогнаша даже до Сидона великаго и до Масрефоф-Маима и до поль Массифских к востоком: и изсекоша их, дондеже не остася в них ни един цел и избегший.

Нав.11:8  с толкованием

9
И сотвори им Иисус, якоже заповеда ему Господь: конем их жилы пресече и колесницы их сожже огнем.

Нав.11:9  с толкованием

10
И обратися Иисус в то время, и взя Асор, и царя его уби мечем: Асор бо бе прежде обладающий всеми царствы сими:

Нав.11:10  с толкованием

11
и изби все дышущее, еже в нем бысть, острием меча, и потребиша вся, и не остася в нем все дышущее: и Асор запалиша огнем.

Нав.11:11  с толкованием

12
И вся грады царств сих и вся цари их взя Иисус и изби я мечем, и потреби их, якоже повеле им Моисей раб Господень.

Нав.11:12  с толкованием

13
Но вся грады крепки не запали Израиль, точию Асор един запали Иисус.

Нав.11:13  с толкованием

14
И вся корысти их и вся скоты их плениша себе сынове Израилевы: людий же всех потребиша мечем, дондеже погубиша их, и не оставиша от них ни единаго дышущаго.

Нав.11:14  с толкованием

15
Якоже повеле Господь Моисею рабу Своему, тако Моисей заповеда Иисусу: и тако сотвори Иисус, не преступи ни единаго же от всех, яже заповеда Господь Моисею.

Нав.11:15  с толкованием

16
И взя Иисус всю землю горную и всю землю нагев, и всю землю Госомску, и равную, и яже на запад, и гору Израилеву, и поля яже при горе,

Нав.11:16  с толкованием

17
от горы Хелха, и яже восходит к Сеиру, и даже до Валгада, и поле Ливана под горою Аермон: и вся цари их взя и изби.

Нав.11:17  с толкованием

18
И многи дни сотвори Иисус с цари сими брань:

Нав.11:18  с толкованием

19
и не бе ни единаго града, егоже не предаде Господь сыном Израилевым, кроме Евеа обитающаго в Гаваоне: всех взяша бранию:

Нав.11:19  с толкованием

20
яко Господем бысть укрепитися их сердцу, сопротивитися на брани противу Израиля, да потребят их, яко да не дастся им милость, но да потребятся, якоже глагола Господь к Моисею.

Нав.11:20  с толкованием

21
И прииде Иисус в то время, и потреби (вся) Енакимы от горныя, от Хеврона и от Давира и от Анова, и от всея горы Израилевы и от всея горы Иудины, с грады их, и потреби я Иисус:

Нав.11:21  с толкованием

22
не остася ни един Енаким от сынов Израилевых, но точию в Газе и в Гефе и во Асидофе осташася.

Нав.11:22  с толкованием

23
И взя Иисус всю землю, якоже заповеда Господь Моисею: и даде ю Иисус в наследие Израилю, разделением по племеном их. И преста земля воюема быти.

Нав.11:23  с толкованием

Глава 
12

Нав.12  с толкованием

1
И сии царие земли, ихже избиша сынове Израилевы и наследиша землю их об ону страну Иордана, от восток солнца, от дебри Арнонския даже до горы Аермон, и всю землю араву от восток:

Нав.12:1  с толкованием

2
Сиона царя Аморрейска, иже живяше во Есевоне, обладаяй от Ароира, иже есть в дебри Арнонстей от страны дебри, и пол (земли) Галаада даже до Иавока, (идеже) пределы сынов Аммоних:

Нав.12:2  с толкованием

3
и арава даже до моря Хенереф на востоки, и даже до моря арава, моря Солищнаго от восток, путем иже ко Вифсимофу, и от Фемана иже под Асидоф-Фасгою:

Нав.12:3  с толкованием

4
и Ог царь Васанский остася от Исполинов, иже обита во Астарофе и во Едраине,

Нав.12:4  с толкованием

5
обладаяй от горы Аермон, и от Селхи, и всею землею Васан даже до предел Гесури, и Махафи, и пол Галаада до предел Сиона царя Есевонска.

Нав.12:5  с толкованием

6
Моисей раб Господень и сынове Израилевы поразиша я: и даде ю Моисей раб Господень в наследие Рувиму и Гаду и полплемени Манассиину.

Нав.12:6  с толкованием

7
И сии царие Аморрейстии, яже изби Иисус и сынове Израилевы об ону страну Иордана, при мори Валгад на поли Ливана, и даже до горы Алок, восходящих в Сиир: и даде ю Иисус племеном Израилевым в наследие по жребию их,

Нав.12:7  с толкованием

8
на горе и на поли, и во Араве и во Асидофе, и в пустыни и во нагеве, Хеттеа и Аморреа, и Хананеа и Ферезеа, и Евеа и Иевусеа:

Нав.12:8  с толкованием

9
царя Иерихонска и царя Гайска, иже есть близ Вефиля,

Нав.12:9  с толкованием

10
царя Иерусалимска, царя Хевронска,

Нав.12:10  с толкованием

11
царя Иеримуфска, царя Лахисска,

Нав.12:11  с толкованием

12
царя Еглонска, царя Газерска,

Нав.12:12  с толкованием

13
царя Давирска, царя Гадерска,

Нав.12:13  с толкованием

14
царя Ермафска, царя Адерска,

Нав.12:14  с толкованием

15
царя Левнска, царя Одолламска,

Нав.12:15  с толкованием

16
царя Макидска, царя Вефилска,

Нав.12:16  с толкованием

17
царя Апфуска, царя Оферска,

Нав.12:17  с толкованием

18
царя Афекска, царя Хесаромска,

Нав.12:18  с толкованием

19
царя Самвронска, царя Фувска,

Нав.12:19  с толкованием

20
царя Маронска, царя Ахсафска,

Нав.12:20  с толкованием

21
царя Фанахска, царя Магдедонска,

Нав.12:21  с толкованием

22
царя Кедесска, царя Иеконама Хермела,

Нав.12:22  с толкованием

23
царя Адорска Нафеддоря,

Нав.12:23  с толкованием

24
царя Гоимска Гелгеля, царя Ферска. Вси сии царие тридесять един.

Нав.12:24  с толкованием

Глава 
13

Нав.13  с толкованием

1
Иисус же состареся прошед дни. И рече Господь ко Иисусу: ты состарелся еси денми, и земля остася многа в наследие:

Нав.13:1  с толкованием

2
и сия земля оставшаяся: пределы Филистимли, Гесури и Хананей,

Нав.13:2  с толкованием

3
от Необитаемыя, яже от лица Египта даже до предел Аккаронских ошуюю Хананеов, причисляется пятим областем Филистимским: Газеу и Азотию, и Аскалониту и Гетфею, и Аккарониту и Евею:

Нав.13:3  с толкованием

4
от Феман и всей земли Ханаанстей прямо Газе, и Сидонии даже до Афека, даже до предел Аморрейских:

Нав.13:4  с толкованием

5
и всю землю Гавли Филистимлю, и весь Ливан от восток солнца, от Галгал под горою Аермон даже до входа Емаф:

Нав.13:5  с толкованием

6
всяк обитающий в горней от Ливана даже до Масрефофмаима, всех Сидонян Аз потреблю от лица Израилева: но раздай ю во жребий Израилю, якоже заповедах тебе:

Нав.13:6  с толкованием

7
и ныне раздели землю сию в наследие девяти племеном и полплемени Манассиину от Иордана даже до моря великаго, к западу солнца даси ю: море великое предел будет.

Нав.13:7  с толкованием

8
Дву же племеном и полуплемени Манассиину, Рувиму и Гаду, даде Моисей об ону страну Иордана: к востоком солнца даде им Моисей раб Господень,

Нав.13:8  с толкованием

9
от Ароира, иже есть на устии водотечи Арнони, и град иже посреде дебри, и весь Мисор от Медавана:

Нав.13:9  с толкованием

10
вся грады Сиона царя Аморрейска, иже царствова во Есевоне, даже до предел сынов Аммоних:

Нав.13:10  с толкованием

11
и Галаад, и пределы Гесури, и Махафи, всю гору Аермон, и всю Васанитску до Елхи:

Нав.13:11  с толкованием

12
все царство Огово в Васанитиде, иже царствова во Астарофе и во Едраине: сей остася (един) от Исполинов, и уби его Моисей, и потреби.

Нав.13:12  с толкованием

13
И не потребиша сынове Израилевы Гесура и Махафа и Хананеа: и живяше царь Гесури и Махафи в сынех Израилевых даже до сего дне.

Нав.13:13  с толкованием

14
Токмо племени Левиину не дадеся наследие: Господь Бог Израилев, сам наследие их, якоже рече им Господь. И сие разделение, еже раздели Моисей сыном Израилевым (по племеном их) во Аравофе Моавли об ону страну Иордана противу Иерихона.

Нав.13:14  с толкованием

15
И даде Моисей племени сынов Рувимлих по сонмом их:

Нав.13:15  с толкованием

16
и быша им пределы от Ароира, иже есть прямо дебри Арнонския, и град, иже есть в дебри Арнонстей,

Нав.13:16  с толкованием

17
и всю землю Мисорску даже до Есевона, и вся грады иже суть в мисоре, и Девор, и Вамоф-Ваал, и домы Веелмони,

Нав.13:17  с толкованием

18
и Иасса и Кедимофа и Мифааф,

Нав.13:18  с толкованием

19
и Кариафем и Севама, и Сарф и Сиор на горе Енак,

Нав.13:19  с толкованием

20
и Веффогор и Асидоф-Фасга и Вифсимуф,

Нав.13:20  с толкованием

21
и вся грады Мисорски, и все царство Сиона царя Аморрейска, егоже уби Моисей самаго, и старейшины Мадиамли, и Евиа и Рокома, и Сура и Ура и ровека, князи Сиорския, и живущих на земли (той):

Нав.13:21  с толкованием

22
и Валаама сына Веорова волхва убиша мечем сынове Израилевы в сражении.

Нав.13:22  с толкованием

23
Быша же пределы Рувимли, Иордан предел. Сие наследие сынов Рувимлих по сонмом их, грады их и села их.

Нав.13:23  с толкованием

24
Даде же Моисей сыном Гадовым по сонмом их,

Нав.13:24  с толкованием

25
и быша им пределы Иазир: вси гради Галаади и полземли сынов Аммоних до Ароира, иже есть пред лицем Раввафа:

Нав.13:25  с толкованием

26
и от Есевона до Рамофа к Масфе, и Вотаниму, и Манаиму до предел Давировых,

Нав.13:26  с толкованием

27
и во емеке Вифарам и Вифнамра, и Сохоф и Сафон, и прочее царство Сиона царя Есевонска: и Иордан определяет даже до страны моря Хенереф, об ону страну Иордана от восток.

Нав.13:27  с толкованием

28
Сие наследие сынов Гадовых по сонмом их и по градом их и селам их.

Нав.13:28  с толкованием

29
И даде Моисей полуплемени Манассиину по сонмом их,

Нав.13:29  с толкованием

30
и быша пределы их от Манаима, и все царство Васанско, и все царство Ога царя Васанска, и вся веси Иаира, яже суть в Васанитиде, шестьдесят градов:

Нав.13:30  с толкованием

31
и пол Галаада, и во Астарофе, и во Едраине, грады царства Огова в Васанитиде: и дашася сыном Махировым, сыном Манассииным, и половине сынов Махировых по сонмом их.

Нав.13:31  с толкованием

32
Сии суть, имже даде наследие Моисей об ону страну Иордана во Аравофе Моавли, прямо Иерихона на востоки.

Нав.13:32  с толкованием

33
Племени же Левиину не даде Моисей наследия: понеже Сам Господь Бог Израилев наследие Его есть, якоже глагола им.

Нав.13:33  с толкованием

Глава 
14

Нав.14  с толкованием

1
И сии наследовавшии от сынов Израилевых в земли Ханаанстей, имже разделиша ю в наследие Елеазар жрец и Иисус сын Навин и князи отечеств племен сынов Израилевых:

Нав.14:1  с толкованием

2
по жребием наследиша, якоже заповеда Господь Моисеом дати девяти племеном и полплемени (Манассиину),

Нав.14:2  с толкованием

3
даде бо Моисей наследие дву племеном и полплемени Манассиину об ону страну Иордана: левитом же не даде жребия в них:

Нав.14:3  с толкованием

4
занеже быша сынове Иосифовы два племена, Манассиино и Ефремле: и не дадеся части в земли левитом, но токмо грады обитати, и предградия скотом их, и скоты их.

Нав.14:4  с толкованием

5
Якоже заповеда Господь Моисею, тако сотвориша сынове Израилевы и разделиша землю.

Нав.14:5  с толкованием

6
И приидоша сынове Иудины ко Иисусу в Галгалы. И рече к нему Халев Иефонниин Кенезей: ты веси слово, еже глагола Господь к Моисею человеку Божию о мне и о тебе в Кадис-Варни:

Нав.14:6  с толкованием

7
четыредесяти бо лет бех, егда посла мя Моисей раб Господень от Кадис-Варни соглядати землю: и отвещах ему слово по сердцу его:

Нав.14:7  с толкованием

8
братия моя ходившии со мною превратиша сердце людий, аз же приложихся последовати Господеви Богу моему:

Нав.14:8  с толкованием

9
и клятся Моисей в той день, глаголя: земля, на нюже возшел еси, тебе будет в жребий и чадом твоим во век, яко приложился еси последовати Господу Богу моему:

Нав.14:9  с толкованием

10
и ныне препита мя Господь, якоже рече, сие четыредесять и пятое лето, отнележе глагола Господь слово сие к Моисею, и хождаше Израиль в пустыни: и ныне се, ми днесь осмьдесят и пять лет:

Нав.14:10  с толкованием

11
еще есмь днесь могий, якоже егда посла мя Моисей: тако и ныне могу входити и исходити на брань:

Нав.14:11  с толкованием

12
и ныне прошу у тебе горы сея, якоже рече Господь в день он, яко ты слышал еси слово сие в день оный: ныне же Енакими тамо суть, грады тверды и велицы: аще убо будет Господь со мною, потреблю их, якоже рече ми Господь.

Нав.14:12  с толкованием

13
И благослови его Иисус, и даде Хеврон Халеву сыну Иефонниину, сыну Кенезеину в жребий.

Нав.14:13  с толкованием

14
Сего ради бысть Хеврон Халеву Иефонниину Кенезеину в жребий даже до дне сего: понеже возследова повелению Господа Бога Израилева.

Нав.14:14  с толкованием

15
Имя же Хеврону прежде бяше Град Аргов: Митрополь Енакимлян сей. И почи земля от брани.

Нав.14:15  с толкованием

Глава 
15

Нав.15  с толкованием

1
И быша пределы сынов Иудиных по сонмом их, от предел Идумейских, от пустыни Син к ливу даже до Кадис к югу:

Нав.15:1  с толкованием

2
и быша пределы их от полудне до части моря Сланаго, от верха клонящагося к югу,

Нав.15:2  с толкованием

3
и проходят прямо восхождению Акраввим, и обходят Сена, и восходят от юга до Кадис-Варни: и исходят из Есрона, и восходят во Аддару, и исходят на запады Кадис, обходят Аккарки,

Нав.15:3  с толкованием

4
и исходят во Асемону, и преходят даже до дебри Египетския: и будет исход пределов его к морю. Сии суть пределы их от юга.

Нав.15:4  с толкованием

5
И пределы от восток, все море Сланое даже до части Иордана, и пределы их к северу, и от верха моря, и от части Иордански:

Нав.15:5  с толкованием

6
восходят пределы (тии) в Вифаглу и преходят от севера к Вефару, и восходят пределы к камени Веора сына Рувимля,

Нав.15:6  с толкованием

7
и восходят пределы к Девиру дебри Ахоровы, и нисходят до Галгалы, яже есть прямо схождению Адоммин, иже есть к югу дебри, и восходит предел к воде источника Солнечна, и будет исход его источник Рогиль:

Нав.15:7  с толкованием

8
и восходят пределы в дебрь Енном, созади Иевуса от полудне, сей есть Иерусалим: и исходят пределы на верх горы, яже есть пред лицем дебри Енном к морю, яже есть от части земли Рафаин к северу:

Нав.15:8  с толкованием

9
и преходит предел от верха горы ко источнику воды Наффо и преходит к горе Ефрони, и изведет предел в Ваал, сей есть Град Иарим:

Нав.15:9  с толкованием

10
и обыдет предел от Ваала к морю и прейдет в гору Сиир, и прейдет созади града Иарима от севера, сей есть Хасалон: и снидет ко граду Солнечну и прейдет к югу:

Нав.15:10  с толкованием

11
и преходит предел созади Аккарона до севера, и преходят пределы в Сакхарон, и прейдут гору земли Валаани, и преходят ко Иавнилу, и будет исход пределов к морю, и пределы их от моря, море великое определит.

Нав.15:11  с толкованием

12
Сии пределы сынов Иудиных окрест по сонмом их.

Нав.15:12  с толкованием

13
И даде (Иисус) Халеву сыну Иефонниину часть посреде сынов Иудиных повелением Божиим, и даде ему Иисус Град Арвок, отца Енакова: сей есть Хеврон.

Нав.15:13  с толкованием

14
И потреби оттуду Халев сын Иефонниин три сыны Енаковы, Сусиа и Фолмаи и Ахима:

Нав.15:14  с толкованием

15
и взыде оттуду Халев на живущих в Давире: имя же прежде бяше Давиру Град Писмен.

Нав.15:15  с толкованием

16
И рече Халев: иже аще возмет кто Град Писмен и возобладает им, дам ему Асхань дщерь мою в жену.

Нав.15:16  с толкованием

17
И взя его Гофониил сын Кенеза, брата Халевова, юнейший: и даде ему Асхань дщерь свою в жену.

Нав.15:17  с толкованием

18
И бысть внегда отходити ей, и совеща с ним, глаголющи: попрошу у отца моего села. И воззва со осляти. И рече ей Халев: что ти есть?

Нав.15:18  с толкованием

19
И рече ему: даждь ми благословение, яко в землю полуденную отдал еси мя: даждь ми Голаф-Маим. И даде ей Халев Голаф-Маим вышний и Голаф нижний.

Нав.15:19  с толкованием

20
Сие наследие племене сынов Иудиных по сонмом их:

Нав.15:20  с толкованием

21
быша же гради их гради племене сынов Иудиных к пределом едомлим в пустыни, Кавсеил и Едраим и Иагур,

Нав.15:21  с толкованием

22
и Кина и Димона и Адада,

Нав.15:22  с толкованием

23
и Кедес и Асор и Ифнаксиф,

Нав.15:23  с толкованием

24
и Телем и Валоф,

Нав.15:24  с толкованием

25
и Асор Новый и Град Асером (сей есть Асор):

Нав.15:25  с толкованием

26
Амам и Самаа и Модада,

Нав.15:26  с толкованием

27
и Асергадда и Веффалеф,

Нав.15:27  с толкованием

28
и Асарсула и Вирсавее (и села их и предградия их):

Нав.15:28  с толкованием

29
и Ваала и Авим и Асем,

Нав.15:29  с толкованием

30
и Елфолад и Хесил и Ерма,

Нав.15:30  с толкованием

31
и Сикелег и Ведевина и Сансанна,

Нав.15:31  с толкованием

32
и Лавоф и Селеим, и Аин и Реммон: всех градов двадесять и девять, и села их.

Нав.15:32  с толкованием

33
В напольней, Есфаол и Сараа, и Асна (и Рамен),

Нав.15:33  с толкованием

34
и Зано и Ингоним, и Фаффуа и Инаим,

Нав.15:34  с толкованием

35
и Иеримуф и Одоллам, (и Немра) и Сохо и Азика,

Нав.15:35  с толкованием

36
и Сагарим и Адиафаим, и Гадира и села ея: гради четыренадесять и веси их.

Нав.15:36  с толкованием

37
Сеннам и Адаса и Магдалгад,

Нав.15:37  с толкованием

38
и Далаан и Масфа и Иекфаил,

Нав.15:38  с толкованием

39
и Лахис и Васхаф и Еглом,

Нав.15:39  с толкованием

40
и Хаввон и Ламас и Хафлос,

Нав.15:40  с толкованием

41
и Гадироф и Виф-Дагон, и Нома и Макида: гради шестьнадесять и веси их.

Нав.15:41  с толкованием

42
Левна и Афер и Асан,

Нав.15:42  с толкованием

43
и Иеффа и Асенна и Несив,

Нав.15:43  с толкованием

44
и Кеила и Ахзев, и Мариса (и Едом): гради девять и веси их.

Нав.15:44  с толкованием

45
Аккарон и села его и предградия его.

Нав.15:45  с толкованием

46
(И) от Аккарона, иемне и вси елики суть близ Асдофа, и веси их:

Нав.15:46  с толкованием

47
Асдоф и веси его и предградия его: Газа и веси ея и предградия ея, даже до водотечи Египетския, и море великое определяет.

Нав.15:47  с толкованием

48
И в горней, Сафир и Иефер и Сохо,

Нав.15:48  с толкованием

49
и Ренна, Град Писмен (сей есть Давир),

Нав.15:49  с толкованием

50
и Анов и Есфемо и Аним,

Нав.15:50  с толкованием

51
и Госом и Хилуон и Гилон: градов единонадесять и веси их.

Нав.15:51  с толкованием

52
Ерев и Есан и Рума,

Нав.15:52  с толкованием

53
и Ианум и Веф-Фапфуе и Афака,

Нав.15:53  с толкованием

54
и Хаммата и Град Арво (сей есть Хеврон) и Сиор: градов девять и села их.

Нав.15:54  с толкованием

55
Маон и Хермел, и Зиф и Иетта,

Нав.15:55  с толкованием

56
и Иездраель и Иекдаам и Зано,

Нав.15:56  с толкованием

57
Аким и Гаваа и Фамна: гради десять и веси их.

Нав.15:57  с толкованием

58
Алул и Вефсур и Гедор,

Нав.15:58  с толкованием

59
и Мароф и Вефанон и Елфекен: гради шесть и веси их: Феко и Ефрафа (сей есть Вифлеем): и Фагор и Етам, и Кулон и Татами, и Сорис и Карем, и Галлим и Вефир и Манохо: градов единонадесять и веси их.

Нав.15:59  с толкованием

60
Кариаф-Ваал (сей Град Иарим) и Аревва: гради два, и села их и предградия их.

Нав.15:60  с толкованием

61
Ваддаргис и Вифарава, (и) Мадон и Сохоха,

Нав.15:61  с толкованием

62
и Невсан и град Соли и Ингадди: гради шесть и веси их.

Нав.15:62  с толкованием

63
И Иевусей обиташе во Иерусалиме, и не возмогоша сынове Иудины погубити их: и обиташа Иевусее с сынми Иудиными во Иерусалиме даже до дне онаго.

Нав.15:63  с толкованием

Глава 
16

Нав.16  с толкованием

1
И быша пределы сынов Иосифовых от Иордана иже ко Иерихону от восток, и восходят от Иерихона в горную пустыню в Вефиль,

Нав.16:1  с толкованием

2
и исходят от Вефиля в Лузу, и преходят к пределом Ахиатарофа:

Нав.16:2  с толкованием

3
и прейдут к морю к пределом Иефалтимским, даже до предел Вефорона нижняго и даже до Газера, и будет исход их к морю.

Нав.16:3  с толкованием

4
И наследствоваша сынове Иосифовы Ефрем и Манассий,

Нав.16:4  с толкованием

5
и быша пределы сынов Ефремлих по сонмом их: и быша пределы наследия их от восток Атароф и Адар, даже до Вефорона вышняго и Газары,

Нав.16:5  с толкованием

6
и преходят пределы к морю в Махфоф от севера, и идут на восток во Финаф-Силом, и прейдут от восток во Ианоха,

Нав.16:6  с толкованием

7
и от Ианоха снидут во Атароф и в Наарафа и веси их: и приходят ко Иерихону и исходят ко Иордану,

Нав.16:7  с толкованием

8
и от Тапфу пойдут пределы к морю к водотечи Кана, и будет исход его к морю. Сие наследие племене сынов Ефремлих по сонмом их.

Нав.16:8  с толкованием

9
И грады отлученныя сыном Ефремлим посреде наследия сынов Манассииных, вси гради и веси их.

Нав.16:9  с толкованием

10
И не погуби Ефрем Хананеа живущаго в Газере: и обиташа Хананее посреде Ефрема, дающе ему дани до днешняго дне, дондеже взыде фараон царь Египетский, и взя град, и запали его огнем: и Хананеев и Ферезеев и живущих в Газере избодоша: и даде его фараон в вено дщери своей.

Нав.16:10  с толкованием

Глава 
17

Нав.17  с толкованием

1
И быша пределы племене сынов Манассииных, яко сей первенец Иосифу, Махирови первенцу Манассиину, отцу Галаадову, (сей бо бысть муж храбр) в Галаадитиде и Васанитиде.

Нав.17:1  с толкованием

2
И быша сыном Манассииным прочым по сонмом их: сыном Ахиезеровым и сыном Елековым и сыном Есриилевым, и сыном Сехемовым и сыном Семираеловым и сыном Оферовым: сии суть сынове Манассиины, сына Иосифова, мужеск пол по племеном своим.

Нав.17:2  с толкованием

3
И Салпааду сыну Оферову, сына Галаадова, сына Махирова, сына Манассиина, не быша сыны, но токмо дщери: и сия имена дщерем Салпаадовым: Маала и Нуа, и Егла и Мелха и Ферса.

Нав.17:3  с толкованием

4
И сташа пред Елеазаром жерцем и пред Иисусом сыном Навиным и пред князи, глаголющя: Бог заповеда рукою Моисеовою дати нам наследие посреде братии нашея. И дадеся им наследие повелением Господним, жребий в братии отца их.

Нав.17:4  с толкованием

5
И паде жребий Манассию поле лавеково кроме земли Галаадовы и Васани, яже есть об ону страну Иордана,

Нав.17:5  с толкованием

6
понеже дщери сынов Манассииных наследиша жребий посреде братий своих: земля же Галаадова бысть сыном Манассииным прочым.

Нав.17:6  с толкованием

7
И быша пределы сынов Манассииных от Асир-Махфофа, и данаф, яже есть пред лицем Сихема, и идут пределы на Иамин и на Иасиф ко источнику Фаффоф.

Нав.17:7  с толкованием

8
Манассию будет земля Фаффоф: и Фаффоф над пределы Манассииными сыном Ефремлим:

Нав.17:8  с толкованием

9
и снидут пределы к дебри Кана на юг по дебри Иарим: Теревинф Ефрему посреде града Манассиина. И пределы Манассиины к северу на водотечь, и будет исход его море:

Нав.17:9  с толкованием

10
от юга Ефрему, и к северу Манассии, и будет море предел им: и ко Асиру совокупятся к северу, и Иссахару от восток.

Нав.17:10  с толкованием

11
И будет Манассию (предел) между Иссахаром и между Асиром Вефсан и веси их, и Иевлаам и веси его, и живущыя в Доре и веси его, и живущыя в ендоре и веси его, и живущыя в Магедде и веси его, и живущыя в Танахе и веси его, и третия часть Нафефа и веси его.

Нав.17:11  с толкованием

12
И не возмогоша сынове Манассиины потребити градов сих: и нача Хананей жити в земли сей.

Нав.17:12  с толкованием

13
И бысть егда укрепишася сынове Израилевы, и сотвориша Хананеов послушных, потреблением же не потребиша их.

Нав.17:13  с толкованием

14
Противореша же сынове Иосифовы Иисусу, глаголюще: почто наследствовал еси нас жребием единым и ужем единым? Аз же люд мног есмь, и благослови мя Бог (даже доселе).

Нав.17:14  с толкованием

15
И рече им Иисус: аще люд мног еси, взыди в дубраву и отреби себе тамо место в земли Ферезеа и Рафаима, аще утесняет тя гора Ефремля.

Нав.17:15  с толкованием

16
И реша сынове Иосифовы: не доволно нам горы Ефремли: и конь преизбранный и железо всему Хананею живущему в земли емек, в Вефсане и в весех ея, и во юдоле Иезраель.

Нав.17:16  с толкованием

17
И рече Иисус к сыном Иосифовым, Ефрему и Манассию, глаголя: аще люд мног еси и силу велику имаши, не будет ти жребий един:

Нав.17:17  с толкованием

18
зане дубрава будет тебе, понеже дубрава есть, и отребиши ю, и будет тебе, и концы ея, егда потребиши Хананеа, аще конь преизбранный ему есть: (и сам силен,) ты бо пресилиши его.

Нав.17:18  с толкованием

Глава 
18

Нав.18  с толкованием

1
И собрася весь сонм сынов Израилевых в Силом, и водрузиша тамо скинию свидения: и земля одержася от них.

Нав.18:1  с толкованием

2
И осташася сынове Израилевы, иже не наследиша наследия своего седмь племен.

Нав.18:2  с толкованием

3
И рече Иисус сыном Израилевым: доколе вы разслабляетеся внити наследити землю, юже даде вам Господь Бог отец ваших?

Нав.18:3  с толкованием

4
Дайте от вас по три мужы от племене, и послю их, и воставше да пройдут землю и да опишут ю предо мною, якоже есть лепо разделити ю. И приидоша к нему.

Нав.18:4  с толкованием

5
И раздели им на седмь частей: Иуда да поставит предел своим от лива, и сынове Иосифли да поставят предел своим от севера:

Нав.18:5  с толкованием

6
вы же разделите землю на седмь частей, и принесите ко мне семо, и изнесу вам жребий пред Господем Богом вашим:

Нав.18:6  с толкованием

7
несть бо части у вас сыном Левииным, зане жречество Господне часть их: Гад же и Рувим и полплемене Манассиина взяша наследие свое об ону страну Иордана на востоки, еже даде им Моисей раб Господень.

Нав.18:7  с толкованием

8
И воставше мужие поидоша. И заповеда Иисус мужем идущым описати землю, глаголя: идите и обыдите землю, и опишите ю, и приидите ко мне, и изнесу вам зде жребий пред Господем в Силоме.

Нав.18:8  с толкованием

9
И идоша мужие, и обыдоша землю и соглядаша ю, и описаша ю по градом ея на седмь частей в книгу, и принесоша ко Иисусу в полк в Силом.

Нав.18:9  с толкованием

10
И верже им Иисус жребий пред Господем в Силоме: и раздели тамо землю Иисус сыном Израилевым по разделению их.

Нав.18:10  с толкованием

11
И изыде жребий племене сынов Вениаминовых первый по сонмом их: и изыдоша пределы жребия их посреде сынов Иудиных и посреде сынов Иосифовых.

Нав.18:11  с толкованием

12
И быша пределы их от севера: от Иордана взыдут пределы созади Иерихона к северу и взыдут к горе к морю, и будет исход его Мавдарит Вефавн:

Нав.18:12  с толкованием

13
и пройдут оттуду пределы Лузы созади Лузы от юга: сия есть Вефиль: и снидут пределы сии от Атароф-Аддар на горную, яже есть к ливу Вефорон нижний,

Нав.18:13  с толкованием

14
и прейдут пределы, и обыдут к стране зрящи к морю от ливы, от горы к лицу Вефорон Лива, и будет исход его в Кариаф-Ваал: сей есть Кариафиарим, Град сынов Иудиных. Сия есть часть яже к морю.

Нав.18:14  с толкованием

15
И часть яже к ливу от части Кариаф-Ваал: и пройдут пределы морския в Гаин, на источник воды Наффоновы,

Нав.18:15  с толкованием

16
и снидут пределы на страну горы, яже есть пред лицем дубравы, сына Енома, яже есть от части емек Рафаин от севера, и снидут к Геенному созади Иевуса от юга, и снидут на источник Рогиль,

Нав.18:16  с толкованием

17
и пройдут сквозе от севера, и пройдут на источник Самеса, и пройдут на Галилоф, иже есть прямо к восходу Едомим: и снидут на камень Ваан сынов Рувимлих,

Нав.18:17  с толкованием

18
и пройдут созади вефаравы от севера, и снидут ко араве,

Нав.18:18  с толкованием

19
и снидут с Аравы (на) пределы созади Вефагла от севера, и будет исход пределов на холм моря Сланаго от севера в страну Иорданову от ливы. Сии пределы суть от юга: и Иордан определит ю от страны востока.

Нав.18:19  с толкованием

20
Сие наследие сынов Вениаминовых, пределы его окрест по сонмом их.

Нав.18:20  с толкованием

21
И быша грады племене сынов Вениаминовых по сонмом их, Иерихо и Вифагла и Амеккасис,

Нав.18:21  с толкованием

22
и Вефарава и Семрим и Вифил,

Нав.18:22  с толкованием

23
и Авим и Афара, и Афра (и Екарен),

Нав.18:23  с толкованием

24
и Кафираммин и Афни и Гаваа: грады дванадесять и веси их:

Нав.18:24  с толкованием

25
Гаваон и Рама и Вироф,

Нав.18:25  с толкованием

26
и Масфа и Хефира и Амоса,

Нав.18:26  с толкованием

27
и Рекем и Иерфаил и Фарала,

Нав.18:27  с толкованием

28
и Силалеф и Иевус (сей есть Иерусалим), и Гавааф и Град Иарим: грады тринадесять и веси их. Сие наследие сынов Вениаминовых по сонмом их.

Нав.18:28  с толкованием

Глава 
19

Нав.19  с толкованием

1
И изыде вторый жребий Симеону, племени сынов Симеоновых по сонмом их, и бысть наследие их посреде жребия сынов Иудиных.

Нав.19:1  с толкованием

2
И бысть жребий их Вирсавее и Савее и Молада,

Нав.19:2  с толкованием

3
и Асерсуал и Вафул, и Велвола и Асом,

Нав.19:3  с толкованием

4
и Елфулад и Ерма,

Нав.19:4  с толкованием

5
и Секелаг и Вефаммаргасвоф, и Асерсусим

Нав.19:5  с толкованием

6
и Вефалваф, и села их: грады тринадесять и веси их.

Нав.19:6  с толкованием

7
Аин и Реммоф, и Еефер и Асам, грады четыри и веси их:

Нав.19:7  с толкованием

8
и вся предградия, яже окрест градов сих даже до Ваалферирраммоф, идущих во Иамеф к ливу. Сие наследие племен сынов Симеоновых по сонмом их.

Нав.19:8  с толкованием

9
От жребия Иудина наследие племене сынов Симеоновых, яко бысть часть сынов Иудиных болшая нежели их: и наследиша сынове Симеоновы посреде жребия их.

Нав.19:9  с толкованием

10
И изыде жребий третий Завулону по сонмом их: и будут пределы наследия их до Сарида:

Нав.19:10  с толкованием

11
и восходят пределы их к морю и Мариле, и дойдут к Давасефу, и снидутся в дебрь, яже есть к лицу Иекнама,

Нав.19:11  с толкованием

12
и обратятся от Сарида противу от востоков Самес на пределы Хасалоф-Фавор, и пройдут к Даврафу, и взыдут к Иафаги:

Нав.19:12  с толкованием

13
и оттуду обыдут супротив на востоки в Гефаефер, во град Касим, и пройдут на Реммонам Мафарим Аннуа,

Нав.19:13  с толкованием

14
и обыдут пределы к северу на Еннафоф, и будет исход их к Гаю Иеффаил,

Нав.19:14  с толкованием

15
и Каттаф и Наалол, и Семрон и Иадила и Вифлеем: грады дванадесять и веси их.

Нав.19:15  с толкованием

16
Сие наследие племене сынов Завулоновых по сонмом их, грады их и веси их.

Нав.19:16  с толкованием

17
И Иссахару изыде жребий четвертый, сыном Иссахаровым по сродством их,

Нав.19:17  с толкованием

18
и быша пределы их Иезраель и Ахаселоф и Сунам,

Нав.19:18  с толкованием

19
и Аферарим и Сиан, (и Ренаф) и Анахареф,

Нав.19:19  с толкованием

20
и Раввоф и Кесион и Аеме,

Нав.19:20  с толкованием

21
и Рамаф и Инганним, и Инадда и Веффасис:

Нав.19:21  с толкованием

22
и снидутся пределы к Фавору и к Сасимафу к морю, и вефсмас, и будет его исход предел Иордан: грады шестьнадесять и веси их.

Нав.19:22  с толкованием

23
Сие наследие племене сынов Иссахаровых по сонмом их, грады и предградия их.

Нав.19:23  с толкованием

24
И изыде жребий пятый племене сынов Асировых по сонмом их,

Нав.19:24  с толкованием

25
и быша пределы их Хелкаф и Ооли, и Ватне и Ахсаф,

Нав.19:25  с толкованием

26
и Елимелех и Амад и Масал: и приближатся к Кармилу к морю, и Сиору и Лаванафу,

Нав.19:26  с толкованием

27
и обратятся от восток солнца в Виф-Дагон, и приближатся к Завулону, и в Гай Иеффаил к северу, (и внидут пределы Асафа) в Виф-Аемек, и да идут по долине Аниила, и пройдут в Хавол ошуюю,

Нав.19:27  с толкованием

28
и Ахран и Роов, и Аммон и Кана, даже до Сидона великаго:

Нав.19:28  с толкованием

29
и возвратятся пределы в Раму, и даже до града тверда Тириан, и возвратятся пределы до Сусы, и будет исход его море, и от ужа в Ахзиф,

Нав.19:29  с толкованием

30
и Амма и Афек и Раов: грады двадесять два и веси их.

Нав.19:30  с толкованием

31
Сие наследие племене сынов Асировых по сонмом их, грады их и веси их.

Нав.19:31  с толкованием

32
И Неффалиму изыде жребий шестый, сыном Неффалимлим по сонмом их,

Нав.19:32  с толкованием

33
и быша пределы их Меелеф и Милон, и Весенаним и Арме, и Накев и Иавнил, даже до Лаккун: и быша исходи их Иордан:

Нав.19:33  с толкованием

34
и возвратятся пределы к морю в Азаноф-Фавор, и пройдут оттуду во Икок, и приткнутся к Завулону от юга, и Асиру приближатся к морю, и ко Иуде Иордан от восток солнца.

Нав.19:34  с толкованием

35
И грады ограждени Тириан, Тир и Амаф, и Реккаф и Хенероф,

Нав.19:35  с толкованием

36
и Адами и Рама и Асор,

Нав.19:36  с толкованием

37
и Кедес и Едраи и источник Асор,

Нав.19:37  с толкованием

38
и Иарион и Магдалиил, Оран и Вефанаф и Фасмус: грады девятьнадесят и веси их.

Нав.19:38  с толкованием

39
Сие наследие племене сынов Неффалимлих по сродству их, грады и предградия их.

Нав.19:39  с толкованием

40
И Дану и племени сынов Дановых по сонмом их изыде жребий седмый,

Нав.19:40  с толкованием

41
и быша пределы их Сараа и Есфаол и грады Самес,

Нав.19:41  с толкованием

42
и Саламинь и Еалон и Иефла,

Нав.19:42  с толкованием

43
и Елон и Фамна и Аккарон,

Нав.19:43  с толкованием

44
и Елфеко и Гавафон и Ваафоф,

Нав.19:44  с толкованием

45
и Иуф и Ваниварак и Гефреммон,

Нав.19:45  с толкованием

46
и от моря Иераконска, и Ираккон, предел близ Иоппы, и изыде предел сынов Дановых от них.

Нав.19:46  с толкованием

47
И изыдоша сынове Дановы и воеваша Ласем, и взяша его и поразиша его острием меча: и обиташа в нем, и нарекоша имя его Ласендан, по имени Дана отца своего. И Аморрей остася жити во Еломе и в Саламине: и отяготе рука Ефремля на них, и быша им данницы.

Нав.19:47  с толкованием

48
Сие наследие племене сынов Дановых по сонмом их, грады их и веси их. И не истребиша сынове Дановы Аморреа озлобляющаго их на горе, и не даяху им Аморрее исходити на юдоль, и утесниша от них предел части их.

Нав.19:48  с толкованием

49
И совершиша разделяти землю в пределех ея: и даша сынове Израилевы жребий Иисусу сыну Навину повелением Господним среде себе,

Нав.19:49  с толкованием

50
и даша ему град, егоже проси, Фамнаф-Сараи, иже есть в горе Ефраим: и созда град, и вселися в нем.

Нав.19:50  с толкованием

51
Сия разделения, яже разделиша Елеазар жрец и Иисус Навин и князи отечеств в племенех Израилевых по жребиям в Силоме пред Господем, у дверий скинии свидения. И скончаша делити землю.

Нав.19:51  с толкованием

Глава 
20

Нав.20  с толкованием

1
И рече Господь ко Иисусу, глаголя:

Нав.20:1  с толкованием

2
рцы сыном Израилевым, глаголя: дадите грады убежений, яже рекох к вам Моисеом:

Нав.20:2  с толкованием

3
убежище убийце поразившему душу неволею: и будут вам грады убежище, и не умрет убийца от ужика крове, дондеже предстанет пред сонмом на суд.

Нав.20:3  с толкованием

4
И (аще кто) убегнет во един от градов сих, и станет во вратех града, и исповесть во уши старцем града того словеса своя: и приимут его сонм к себе, и дадят ему место жити с ними:

Нав.20:4  с толкованием

5
и егда поженет ужик крове вслед его, и не дадут убившаго в руце его: яко не ведый уби ближняго своего и не ненавидя той его от вчера и третияго дне:

Нав.20:5  с толкованием

6
и да вселится в той град, дондеже станет пред лицем сонма на суд, и дондеже умрет жрец великий, иже будет в тыя дни: тогда да обратится убийца, и внидет во град свой и в дом свой, и во град, отнюдуже избеже.

Нав.20:6  с толкованием

7
И отделиша Кедес в Галилеи, в горе Неффалимли, и Сихем в горе Ефремли, и Град Арво (сей есть Хеврон) в горе Иуде:

Нав.20:7  с толкованием

8
и об ону страну Иордана ко Иерихону на восток, даша Восор в пустыни в поли от племене Рувимля, и Рамоф в Галааде от племене Гадова, и Голан в Васанитиде от племене Манассиина:

Нав.20:8  с толкованием

9
сии грады избраны быша всем сыном Израилевым и пришелцу прилежащему в них, еже убежати тамо всякому убивающему душу неволею, да не умрет от руку ужика крове, дондеже станет пред сонмом на суд.

Нав.20:9  с толкованием

Глава 
21

Нав.21  с толкованием

1
И приидоша старейшины отечеств сынов Левииных к Елеазару жерцу и ко Иисусу сыну Навину и к старейшинам отечеств от племен сынов Израилевых,

Нав.21:1  с толкованием

2
и реша к ним в Силоме в земли Ханаани, глаголюще: заповеда Господь рукою Моисеовою дати нам грады еже обитати, и окрестная их предградия скотом нашым.

Нав.21:2  с толкованием

3
И даша сынове Израилевы левитом от участий своих по повелению Господню грады сия и окрестная предградия их.

Нав.21:3  с толкованием

4
И изыде жребий сонму Каафову, и бысть сыном Аароним жерцем левитом от племене Иудина и от племене Симеоня и от племене Вениаминя по жребием грады тринадесять:

Нав.21:4  с толкованием

5
и сыном Каафовым оставшымся от (сродства) племене Ефремова и от племене Данова и от полуплемене Манассиина по жребию грады десять:

Нав.21:5  с толкованием

6
и сыном Гирсоним от племене Иссахарова и от племене Асирова, и от племене Неффалимля и от полуплемене Манассиина (еже) в Васане, по жребию грады тринадесять:

Нав.21:6  с толкованием

7
и сыном Мерариным по сонмом их, от племене Рувимля и от племене Гадова и от племене Завулоня, по жребию грады дванадесять.

Нав.21:7  с толкованием

8
И даша сынове Израилевы левитом грады сия и окрестная их, якоже заповеда Господь Моисею, по жребию.

Нав.21:8  с толкованием

9
И даде племя сынов Иудиных и племя сынов Симеоновых и племя сынов Вениаминовых грады сия: и нарекоша по имени.

Нав.21:9  с толкованием

10
И быша сыном Аароновым от сонма Каафова сынов Левииных, яко сим бысть жребий первый.

Нав.21:10  с толкованием

11
И даде им Кариафарвок, Митрополь сынов Енаковых (сей есть Хеврон в горе Иудине), и окрестная их.

Нав.21:11  с толкованием

12
И села града (сего) и веси его даде Иисус Халеву сыну Иефонниину во обдержание его.

Нав.21:12  с толкованием

13
И сыном Аарона жерца даде град убежище убившему Хеврон и отлученная яже к нему:

Нав.21:13  с толкованием

14
и Левну и отлученная яже к ней: и Иефер и отлученная яже к нему: и Есфемо и отлученная яже к нему:

Нав.21:14  с толкованием

15
и Олон и отлученная яже к нему: и Давир и отлученная яже к нему:

Нав.21:15  с толкованием

16
и Аин и отлученная ему: и Иетта и отлученная ему: и Вефсамис и отлученная ему: грады девять от дву племен сих.

Нав.21:16  с толкованием

17
И от племене Вениаминя Гаваон и отлученная ему: и Гавее и окрестная его:

Нав.21:17  с толкованием

18
и Анафоф и окрестная его: и Алмон и окрестная его: грады четыри.

Нав.21:18  с толкованием

19
Вси грады сынов Аароновых жерцев, грады тринадесять и окрестная их.

Нав.21:19  с толкованием

20
И сонмом сынов Каафовых левитом, оставлшымся от сынов Каафовых, и бысть град пределов их от племене Ефремова.

Нав.21:20  с толкованием

21
И даша им град убежище убившему Сихем и окрестная его в горе Ефремли: и Газер и окрестная его:

Нав.21:21  с толкованием

22
и Кавсаим и окрестная его: и Вефорон и окрестная его: грады четыри.

Нав.21:22  с толкованием

23
И от племене Данова Елфеко и окрестная его: и Гавефон и окрестная его:

Нав.21:23  с толкованием

24
и Елон и окрестная его: и Гефреммон и окрестная его: грады четыри.

Нав.21:24  с толкованием

25
И от полуплемене Манассиина Фаанах и окрестная его: и Вефсам и окрестная его: града два.

Нав.21:25  с толкованием

26
Вси грады десять и окрестная их сонмом сынов Каафовых оставлшымся.

Нав.21:26  с толкованием

27
И сыном Гирсоним сродником левитским, от полуплемене Манассиина, грады отлученныя убившым, Голан в Васанитиде и окрестная его: и Веесфера и окрестная его: града два.

Нав.21:27  с толкованием

28
И от племене Иссахарова Кисион и окрестная его: и Девраф и окрестная его:

Нав.21:28  с толкованием

29
и Иермоф и окрестная его: и Источник Писмен и окрестная его: грады четыри.

Нав.21:29  с толкованием

30
И от племене Асирова Масаал и окрестная его: и Авдон и окрестная его:

Нав.21:30  с толкованием

31
и Фелкаф и окрестная его: и Роов и окрестная его: грады четыри.

Нав.21:31  с толкованием

32
И от племене Неффалимова град определенный убившему Кедес в Галилеи и окрестная его: и Емафдор и окрестная его: и Ноеммон и отлученная его: грады три.

Нав.21:32  с толкованием

33
Вси грады Гирсоновы по сонмом их, грады тринадесять и отлученная их.

Нав.21:33  с толкованием

34
И сонму сынов Мерариных левитом прочым, от племене сынов Завулоних, Иекнаам и окрестная его: и Карфа и окрестная его:

Нав.21:34  с толкованием

35
и Дамна и окрестная его: и Наалол и окрестная его: грады четыри.

Нав.21:35  с толкованием

36
И об ону страну Иордана ко Иерихону от племене Рувимова даде град убежище убившему Восор в пустыни Мисор и окрестная его: и Иазир и окрестная его:

Нав.21:36  с толкованием

37
и Гедсон и окрестная его: и Масфа и окрестная его: грады четыри.

Нав.21:37  с толкованием

38
И от племене Гадова град убежища убившему Рамоф в Галааде и окрестная его: и Манаим и окрестная его:

Нав.21:38  с толкованием

39
и Есевон и окрестная его: и Иазир и окрестная его: грады четыри.

Нав.21:39  с толкованием

40
Вси грады сыном Мерариным по сонмом их, оставлшихся от племене Левиина, и быша пределы их грады дванадесять.

Нав.21:40  с толкованием

41
Вси грады левитстии посреде обдержания сынов Израилевых четыредесять и осмь градов и окрестная их, окрест градов сих:

Нав.21:41  с толкованием

42
град и окрестная окрест града: тако всем градом сим. И соверши Иисус разделивый землю в пределех ея: и даша сынове Израилевы часть Иисусу повелением Господним: даша ему град, егоже проси: Фамнасахар даша ему на горе Ефремове. И созда Иисус град, егоже проси, и вселися в нем. И взя Иисус ножы каменныя, имиже обрезова сыны Израилевы, родившыяся на пути в пустыни, яко не обрезашася в пустыни, и положи я во Фамнасахаре.

Нав.21:42  с толкованием

43
И даде Господь Израилю всю землю, юже клятся дати отцем их: и наследиша ю и вселишася в ней.

Нав.21:43  с толкованием

44
И упокои Господь их окрест, якоже клятся отцем их: не воста никтоже противу им от всех врагов их: и вся враги их предаде им Господь в руки их.

Нав.21:44  с толкованием

45
Не оскуде слово (ни едино) от всех глаголгол благих, яже рече Господь сыном Израилевым: вся собышася.

Нав.21:45  с толкованием

Глава 
22

Нав.22  с толкованием

1
Тогда созва Иисус сыны Рувимли и сыны Гадовы и полплемене Манассиина, и рече им:

Нав.22:1  с толкованием

2
вы слышасте вся, елика заповеда вам Моисей раб Господень, и послушасте гласа моего, по всему елика заповедах вам:

Нав.22:2  с толкованием

3
не остависте братии вашея в сия дни и множайшыя, даже до дне сего: сохранисте заповедь Господа Бога вашего:

Нав.22:3  с толкованием

4
ныне же упокои Господь Бог ваш братию вашу, якоже рече им: ныне убо возвратившеся отидите в домы вашя и в землю обдержания вашего, юже даде вам Моисей раб Господень об ону страну Иордана:

Нав.22:4  с толкованием

5
но сохраните зело творити заповеди и закон, егоже заповеда вам Моисей раб Господень, любити Господа Бога вашего и ходити во всех путех Его, хранити заповеди Его и прилежати Ему и служити Ему от всего сердца вашего и от всея души вашея.

Нав.22:5  с толкованием

6
И благословив их Иисус отпусти их: и отидоша в домы своя.

Нав.22:6  с толкованием

7
И полу (племене) Манассиину даде Моисей (обдержание) в Васане, и половине даде Иисус с братиею их у Иордана к морю. И егда отпусти их Иисус в домы их, и благослови их:

Нав.22:7  с толкованием

8
и со имением многим отидоша в домы своя: и скоты многи зело, и сребро и злато, и медь и железо, и ризы многи зело, и разделиша плен врагов своих с братиею своею.

Нав.22:8  с толкованием

9
И возвратившеся отидоша сынове Рувимли и сынове Гадовы и полплемене Манассиина от сынов Израилевых, от Силома земли Ханаани, отити в землю Галаадску, в землю обдержания своего, юже наследиша по повелению Господню рукою Моисеовою.

Нав.22:9  с толкованием

10
И приидоша в Галилоф Иорданск, иже есть в земли Ханаани: и создаша сынове Рувимли и сынове Гадовы и полплемене Манассиина тамо олтарь у Иордана, олтарь велик еже видети.

Нав.22:10  с толкованием

11
И услышаша сынове Израилевы глаголющих: се, создаша сынове Рувимли и сынове Гадовы и полплемене Манассиина олтарь у пределов земли Ханаани, в галилофе у Иордана об ону страну сынов Израилевых.

Нав.22:11  с толкованием

12
И услышаша сынове Израилевы, и собрашася вси сынове Израилевы в Силон, еже возшедше воевати их.

Нав.22:12  с толкованием

13
И послаша сынове Израилевы к сыном Рувимлим и к сыном Гадовым и к полуплемени Манассиину в землю Галаадску Финееса сына Елеазара, сына Аарона жерца,

Нав.22:13  с толкованием

14
и десять князей с ним: князь един от дому отечества, от всех племен сынов Израилевых: мужие князи домов отечеств их, иже суть тысященачалницы Израилевы.

Нав.22:14  с толкованием

15
И приидоша к сыном Рувимлим и к сыном Гадовым и к полуплемени Манассиину в землю Галаадову, и реша к ним, глаголюще:

Нав.22:15  с толкованием

16
сия глаголет весь сонм Господень: кое прегрешение сие, имже согрешисте пред Господем Богом Израилевым, отвратитися днесь от Господа Бога Израилева, создавше себе требище, еже отступником вам быти днесь от Господа?

Нав.22:16  с толкованием

17
Еда мал вам грех Фогоров, яко не очистихомся от него даже до сего дне? И бысть язва в сонме Господни:

Нав.22:17  с толкованием

18
и вы отвратистеся днесь от Господа: и будет егда отступите днесь от Господа, и заутра на всем Израили будет гнев Господень:

Нав.22:18  с толкованием

19
и ныне аще мала вам земля обдержания вашего, прейдите вы в землю обдержания Господня, идеже пребывает скиния Господня, и наследите среде нас, и не будите отступницы от Господа, и от нас не отступите, за еже создати вам требище кроме олтаря Господа Бога нашего:

Нав.22:19  с толкованием

20
не се ли Ахар сын Заранов прегрешением прегреши от проклятия, и бысть на весь сонм Израилев гнев? Аще и един бяше, но не един умре грехом своим.

Нав.22:20  с толкованием

21
И отвещаша сынове Рувимли и сынове Гадовы и полплемене Манассиина, и реша тысященачалником Израилевым, глаголюще:

Нав.22:21  с толкованием

22
Бог бог, Господь есть, и Бог бог Господь Сам весть, и Израиль сам познает, аще во отступлении прегрешихом пред Господем, да не избавит нас во днешний день:

Нав.22:22  с толкованием

23
и аще создахом себе требище, еже отступити нам от Господа Бога нашего, или вознести нам нань жертву всесожжений, или еже сотворити на нем жертву спасения, Сам Господь взыщет:

Нав.22:23  с толкованием

24
но ради благоговения глагола сотворихом сие, глаголюще: да не рекут заутра чада ваша чадом нашым, глаголюще: что вам и Господеви Богу Израилеву?

Нав.22:24  с толкованием

25
И пределы постави Господь между вами и нами, сынове Рувимли и сынове Гадовы, Иордан, и несть вам части Господни: и отчуждят сынове ваши сынов наших, яко да не служат Господу:

Нав.22:25  с толкованием

26
и рекохом сотворити сице, еже создати требище сие, не приношений ради, ниже жертв ради,

Нав.22:26  с толкованием

27
но да будет свидетелство сие между вами и нами и между роды нашими по нас, еже служити службу Господеви пред ним в приношениих наших и в жертвах наших и в жертвах спасений наших: и да не рекут чада ваша заутра чадом нашым: несть вам части Господни.

Нав.22:27  с толкованием

28
И рекохом: аще будет когда, и возглаголют к нам или к родом нашым заутра и рекут: зрите подобие жертвенника Господня, егоже сотвориша отцы наши, не приношения ради, ниже жертв ради, но свидетелство есть между нами и между вами и между сыны нашими:

Нав.22:28  с толкованием

29
да не будет убо нам отступити от Господа, еже отвратитися во днешний день от Господа, еже сотворити нам жертвенник приношением и жертвам саламин и жертве спасения, кроме олтаря Господа Бога нашего, иже есть пред скиниею Его.

Нав.22:29  с толкованием

30
И услышавше Финеес жрец и вси князи сонма, и тысященачалницы Израилевы, иже быша с ним, словеса сия, яже глаголаша сынове Рувимли и сынове Гадовы и полплемене Манассиина, и угодно им бысть сие.

Нав.22:30  с толкованием

31
И рече Финеес жрец сыном Рувимлим и сыном Гадовым и полуплемени Манассиину: днесь познахом, яко с нами есть Господь, иже не погрешисте пред Господем прегрешения, но днесь избависте сыны Израилевы от руки Господни.

Нав.22:31  с толкованием

32
И возвратися Финеес жрец и князи отечеств от сынов Рувимлих и от сынов Гадовых и от полуплемене Манассиина от земли Галаадовы в землю Ханааню к сыном Израилевым: и отвещаша им словеса сия.

Нав.22:32  с толкованием

33
И угодно бысть слово сие сыном Израилевым, и благословиша Бога сынове Израилевы и рекоша: ктому да не изыдем к ним на брань потребити землю сынов Рувимлих и сынов Гадовых и полуплемене Манассиина. И вселишася на ней.

Нав.22:33  с толкованием

34
И нарече Иисус требище сынов Рувимлих и сынов Гадовых и полуплемене Манассиина и рече: яко свидение есть между ими, яко Господь бог Бог их есть.

Нав.22:34  с толкованием

Глава 
23

Нав.23  с толкованием

1
И бысть по днех мнозех, егда упокои Господь Бог Израиля от всех врагов его иже окрест, и Иисус состареся прошед дни.

Нав.23:1  с толкованием

2
И созва Иисус вся сыны Израилевы и старейшины их, и князи их и судии их и книгочия их, и рече к ним: аз состарехся и проидох дни:

Нав.23:2  с толкованием

3
вы же видесте вся, елика сотвори Господь Бог ваш всем языком сим от лица вашего, зане Господь Бог наш споборствовавый нам:

Нав.23:3  с толкованием

4
видите, яко низвергох вам языки оставшыяся вам сия во жребиих племеном вашым, от Иордана вся языки потребих, и от моря великаго, еже определит на запад солнца:

Нав.23:4  с толкованием

5
Господь же Бог ваш Сам потребит их от лица вашего, дондеже погибнут, и послет на ня звери дивия, дондеже потребит их и цари их от лица вашего, и наследите землю их, якоже глагола вам Господь Бог ваш:

Нав.23:5  с толкованием

6
укрепитеся убо зело хранити и творити вся написанная в книгах закона Моисеова, да не уклонитеся от него на десно или на лево:

Нав.23:6  с толкованием

7
яко да не внидете во языки оставшыяся сия, и имена богов их да не возименуются в вас, ниже да кленетеся ими, ниже да послужите им, ниже поклонитеся им:

Нав.23:7  с толкованием

8
но токмо Господу Богу вашему прилепитеся, якоже твористе до сего дне:

Нав.23:8  с толкованием

9
и потреби Господь от лица вашего языки велики и сильны, и никто противоста вам до сего дне:

Нав.23:9  с толкованием

10
един от вас прогна тысящы, яко Господь Бог ваш споборствоваше вам:

Нав.23:10  с толкованием

11
и сохраните зело любити Господа Бога вашего:

Нав.23:11  с толкованием

12
аще бо отвратитеся и приложитеся ко оставшымся языком сим, иже с вами, и браки сотворите с ними, и смеситеся с ними, и они с вами,

Нав.23:12  с толкованием

13
ведением уведите, яко не приложит Господь потребити языки сия от лица вашего: и будут вам в сети и в соблазны, и в гвоздия в пятах ваших и в стрелы во очесех ваших, дондеже погибнете от земли благия сея, юже даде вам Господь Бог ваш:

Нав.23:13  с толкованием

14
аз же днесь отхожду в путь, якоже и вси иже на земли: и познаете всем сердцем вашим и душею вашею, яко ни едино слово отпаде от всех словес благих, яже рече Господь Бог ваш к вам: вся приходят вам, и не разнствова от них ни едино слово:

Нав.23:14  с толкованием

15
и будет, имже образом приходят на вас вся словеса добрая, яже глагола Господь Бог к вам, тако наведет Господь на вы вся словеса злая, дондеже потребит вы от земли благия сея, юже даде вам Господь Бог ваш:

Нав.23:15  с толкованием

16
внегда преступите завет Господа Бога вашего, егоже заповеда вам, и шедше послужите богом иным и поклонитеся им: и разгневается яростию Господь на вы, и погибнете скоро от земли благия, юже даде Господь вам.

Нав.23:16  с толкованием

Глава 
24

Нав.24  с толкованием

1
И собра Иисус вся племена Израилева в Сихем, и созва старейшины Израилевы и князи их, и судии их и книгочия их, и сташа пред Господем Богом.

Нав.24:1  с толкованием

2
И рече Иисус ко всем людем, глаголя: сия глаголет Господь Бог Израилев: об ону страну реки жиша отцы ваши исперва, Фара отец Авраамов и отец Нахоров, и служиша богом иным:

Нав.24:2  с толкованием

3
и поях отца вашего Авраама от об ону страну реки, и водих его во всей земли Ханаанстей: и умножих семя его, и дах ему Исаака:

Нав.24:3  с толкованием

4
Исааку же дах Иакова и Исава и дах Исаву гору Сиир наследие ему: Иаков же и сынове его снидоша во Египет, и быша тамо в язык велик и крепок и мног, и озлобиша их Египтяне:

Нав.24:4  с толкованием

5
и послах Моисеа и Аарона, и поразих Египта во знамениих, яже сотворих в них, и по сем изведох вас,

Нав.24:5  с толкованием

6
и изведох отцы вашя из Египта, и внидосте в море Чермное: и погнаша Египтяне вслед отец ваших на колесницах и на конех в море Чермное:

Нав.24:6  с толкованием

7
и возопихом ко Господу, и даде облак и мглу между нами и между Египтяны, и наведе на них море, и покры их: и видеша очеса ваша, елика сотвори Господь в земли Египетстей: и бысте в пустыни дни многи:

Нав.24:7  с толкованием

8
и приведе вас в землю Аморреов живущих об ону страну Иордана, и ополчишася на вы: и предаде я Господь в руки вашя, и наследисте землю их, и потребисте их от лица вашего:

Нав.24:8  с толкованием

9
и воста Валак сын Сепфоров, царь Моавль, и ополчися противу Израиля, и послав призва Валаама сына Веорова кляти вас:

Нав.24:9  с толкованием

10
и не восхоте Господь Бог погубити тя, но благословением благослови вас и избави вас от рук их:

Нав.24:10  с толкованием

11
и преидосте Иордан и приидосте во Иерихон, и бишася с вами живущии во Иерихоне, Аморрей и Ферезей, и Хананей и Хеттей, и Гергесей и Евей и Иевусей, и предаде их Господь в руки вашя:

Нав.24:11  с толкованием

12
и посла пред вами шершни, и изгна от лица вашего два царя Аморрейска, не оружием твоим, ниже луком твоим,

Нав.24:12  с толкованием

13
и даде вам землю, о нейже не трудистеся на ней, и грады, ихже не создасте, и пожисте в них, и винограды и масличие, ихже не насадисте вы, ядосте:

Нав.24:13  с толкованием

14
и ныне убойтеся Господа, и послужите Ему в правде и правоте: и отвержите боги чуждыя, имже служиша отцы ваши об ону страну реки и во Египте, и служите Господеви:

Нав.24:14  с толкованием

15
аще же не угодно вам служити Господеви, изберите сами себе днесь, кому послужите, или богом отец ваших, иже быша об ону страну реки, или богом Аморрейским, в нихже вы живете на земли их: аз же и дом мой служити будем Господеви, яко свят есть.

Нав.24:15  с толкованием

16
И отвещавше людие, реша: не буди нам оставити Господа, еже служити богом иным:

Нав.24:16  с толкованием

17
Господь бо Бог наш Той Бог есть, Той изведе нас и отцы нашы от земли Египетския, от дому работы, иже сотвори пред очима нашима знамения велия, и сохрани нас во всем пути, по немуже идохом, и во всех языцех, ихже сквозе проидохом:

Нав.24:17  с толкованием

18
и изгна Господь вся языки и Аморреа живущаго на земли от лица нашего: но и мы послужим Господеви, Сей бо есть Бог наш.

Нав.24:18  с толкованием

19
И рече Иисус к людем: не возможете служити Господеви Богу, яко Бог свят есть и ревнитель сей: не оставит грех ваших и беззаконий ваших:

Нав.24:19  с толкованием

20
егда оставите Господа и послужите богом чуждим, и пришед озлобит вас и потребит вас, вместо еже благо сотвори вам.

Нав.24:20  с толкованием

21
И рекоша людие ко Иисусу: ни, но Господеви послужим.

Нав.24:21  с толкованием

22
И рече Иисус к людем: свидетели вы сами на ся, яко вы избрасте служити Господеви Самому. И рекоша: свидетели мы.

Нав.24:22  с толкованием

23
И ныне отвержите боги чуждыя, иже суть в вас, и исправите сердца ваша ко Господу Богу Израилеву.

Нав.24:23  с толкованием

24
И рекоша людие ко Иисусу: Господеви Богу нашему послужим, и гласа Его послушаем.

Нав.24:24  с толкованием

25
И завеща Иисус завет к людем в день он, и даде им закон и суд в Сихеме, пред скиниею Господа Бога Израилева.

Нав.24:25  с толкованием

26
И вписа Иисус словеса сия в книгу закона Божия: и взя камень велий, и постави его под теревинфом, иже есть пред Господем.

Нав.24:26  с толкованием

27
И рече Иисус к людем: се, камень сей будет вам во свидение: яко сей слыша вся глаголголанная от Господа, елика глагола к вам днесь, и сей будет вам во свидение в последния дни, и егда солжете Господеви Богу вашему.

Нав.24:27  с толкованием

28
И отпусти Иисус люди, коегождо в места своя.

Нав.24:28  с толкованием

29
И послужи Израиль Господеви во вся дни Иисусовы и во вся дни старцев, иже препроводиша время со Иисусом и иже видеша вся дела Господня, елика сотвори Израилю.

Нав.24:29  с толкованием

30
И бысть по сих, и умре Иисус сын Навин раб Господень, (пожив) сто и десять лет.

Нав.24:30  с толкованием

31
И погребоша его в пределех жребия его во Фамнасахаре, в горе Ефремли, от севера горы Гаасовы, и положиша тамо с ним во гробе, в немже погребоша его, ножы каменныя, имиже обреза сыны Израилевы в Галгалех (Иисус), егда изведе их из Египта, якоже повеле Господь: и тамо суть даже до дне сего.

Нав.24:31  с толкованием

32
И кости Иосифовы изнесоша сынове Израилевы из Египта и закопаша их в Сихемех, в части села, еже притяжа Иаков от Аморрей живущих в Сихемех стом агниц, и даде ю Иосифу в часть.

Нав.24:32  с толкованием

33
И бысть по сих, и Елеазар сын Ааронов архиерей скончася: и погребен бысть в Гаваафе Финееса сына своего, егоже даде ему в горе Ефремове.

Нав.24:33  с толкованием

34
В той день вземше сынове Израилевы кивот Божий, обношаху с собою: и Финеес жречествова вместо Елеазара отца своего, дондеже умре и погребеся в Гаваафе своем.

Нав.24:34  с толкованием

35
Сынове же Израилевы отидоша кийждо в место свое и в свой град.

Нав.24:35  с толкованием

36
И почитаху сынове Израилевы Астарту и Астарофа и боги языков сущих окрест их. И предаде их Господь в руки Еглому царю Моавлю, и облада ими лет осмьнадесять.

Нав.24:36  с толкованием