Глава 
21

1Цар.21  с толкованием

1
И прииде Давид в Номву ко Авимелеху иерею: и ужасеся Авимелех о пришествии его и рече ему: что яко ты един, и никтоже с тобою?

1Цар.21:1  с толкованием

2
И рече Давид иерею: царь заповеда ми глагол днесь и рече ко мне: никтоже да уразумеет глагола, егоже ради аз посылаю тя и о немже аз заповедаю ти: и отроки оставих на месте глаголемем еммоним:

1Цар.21:2  с толкованием

3
и ныне аще суть у тебе пять хлебы, даждь ми елико имаши.

1Цар.21:3  с толкованием

4
И отвеща иерей Давиду и рече: не суть хлебы прости у мене, но точию хлебы у мене священнии: аще сохранени отроцы суть токмо от жены, снедят.

1Цар.21:4  с толкованием

5
И отвеща Давид иерею и рече ему: и (мы) от жен воздержахомся вчера и третияго дне: отнележе изыдох аз на путь, быша вси отроцы очищени, и сей путь нечист, но освятится днесь сосуд ради моих.

1Цар.21:5  с толкованием

6
И даде ему Авимелех иерей хлебы предложения, яко тамо не бе хлеба, но токмо хлебы лица, иже взяты от лица Господня, еже предложитися хлебу теплому, в оньже день взя их.

1Цар.21:6  с толкованием

7
И бе тамо един от отрок Сауловых в день он удержан пред Господем, и имя ему Доик Сирин, (старейшина от пастырь Сауловых,) пасый мски Сауловы.

1Цар.21:7  с толкованием

8
И рече Давид ко Авимелеху: виждь, аще есть зде у тебе копие или мечь, яко меча моего и оружия моего не взях с собою, яко царево повеление внезапу ми бысть.

1Цар.21:8  с толкованием

9
И рече иерей: се, мечь Голиафа иноплеменника, егоже ты убил еси во юдоли Ила, и той обвит бяше в ризу за ефудом: аще той хощеши взяти, возми себе, несть бо инаго зде кроме сего. И рече Давид: се, несть якоже той: даждь ми его. И даде его ему.

1Цар.21:9  с толкованием

10
И воста Давид, и убеже в той день от лица Саулова, и прииде Давид ко Анхусу царю Гефску.

1Цар.21:10  с толкованием

11
И реша отроцы Анхусовы к нему: не сей ли Давид царь земли? Не сему ли изыдоша (жены) ликующыя, глаголющя: победи Саул с тысящами своими, и Давид со тмами своими?

1Цар.21:11  с толкованием

12
И положи Давид глаголы сия в сердцы своем, и убояся зело от лица Анхуса царя Гефска.

1Цар.21:12  с толкованием

13
И измени лице свое пред ним, и притворися в день той, и бияше во врата града, яко в тимпан, и падаше на руки своя, и паде у врат града, и слины своя точаше по браде своей.

1Цар.21:13  с толкованием

14
И рече Анхус ко отроком своим: се, видесте мужа неистова, почто его введосте ко мне?

1Цар.21:14  с толкованием

15
Еда не имею аз неистовых, яко введосте его, да беснуется предо мною? Сей да не внидет в дом мой.

1Цар.21:15  с толкованием

Глава 
22

1Цар.22  с толкованием

1
И отиде Давид оттуду, и спасеся, и прииде в пещеру Одолламску: и слышавше братия его и дом отца его, приидоша к нему тамо.

1Цар.22:1  с толкованием

2
И собрашася к нему всяк иже в нужде, и всяк должник, и всяк печальный душею, и бе ими обладаяй, и бяше с ним яко четыреста мужей.

1Цар.22:2  с толкованием

3
И отиде Давид оттуду в Массифаф Моавитский и рече к царю Моавитску: да будут ныне отец мой и мати моя у тебе, дондеже познаю, что сотворит мне Бог.

1Цар.22:3  с толкованием

4
И умоли лице царя Моавитска, и пребываху у него по вся дни, сущу Давиду во области той.

1Цар.22:4  с толкованием

5
И рече Гад пророк к Давиду: не седи во области сей: иди, и да внидеши в землю Иудину. И иде Давид и пришед седе в граде Сарих.

1Цар.22:5  с толкованием

6
И слыша Саул, яко познан бысть Давид, и мужие иже с ним: и Саул седяше на холме под дубравою яже в Раме, и копие в руку его, и вси отроцы его предстояху ему.

1Цар.22:6  с толкованием

7
И рече Саул ко отроком своим предстоящым ему: слышите ныне, сынове Вениаминовы, аще воистинну всем вам даст сын Иессеев села и винограды и поставит вас всех в сотники и тысящники:

1Цар.22:7  с толкованием

8
яко вси согласистеся на мя, и несть открываяй во ухо мое, егда положи завет сын мой с сыном Иессеовым, и несть от вас ни един боляй о мне и возвещаяй во ушы мои, яко воздвиже сын мой раба моего на мя врага, якоже день сей?

1Цар.22:8  с толкованием

9
И отвеща Доик Сирин приставленый над мсками Сауловыми и рече: видех сына Иессеева пришедша в Номву ко Авимелеху сыну Ахитову иерею:

1Цар.22:9  с толкованием

10
и вопрошаше о нем Бога, и брашно вдаде ему, и мечь Голиафа иноплеменника вдаде ему.

1Цар.22:10  с толкованием

11
И посла царь призвати Авимелеха сына Ахитова, и вся сыны отца его иереи от Номвы. И приидоша вси к царю.

1Цар.22:11  с толкованием

12
И рече Саул: слыши ныне, сыне Ахитов. И рече: се, аз, глаголи, господине.

1Цар.22:12  с толкованием

13
И рече ему Саул: почто совещался еси на мя ты и сын Иессеев, яко вдал еси ему хлеб и мечь, и вопрошал еси о нем Бога положити его на мя во врага, якоже день сей?

1Цар.22:13  с толкованием

14
И отвеща Авимелех царю и рече: и кто во всех рабех твоих верен якоже Давид, и зять царев, и князь всем заповедем твоим, и славен в дому твоем?

1Цар.22:14  с толкованием

15
Еда днесь начах вопрошати о нем Бога? Никако: да не возложиши, царю, на раба твоего словесе сего, и на весь дом отца моего, яко не ведяше раб твой во всех сих словесе мала, или велика.

1Цар.22:15  с толкованием

16
И рече царь Саул: смертию умреши, Авимелех, ты и весь дом отца твоего.

1Цар.22:16  с толкованием

17
И рече царь скороходцем предстоящым пред ним: приведите и избийте иереи Господни, яко рука их с Давидом, и понеже познаша, яко бежит той, и не возвестиша во ушию моею. И не хотяху отроцы царевы возложити рук своих на иереи Господни.

1Цар.22:17  с толкованием

18
И рече царь Доику: обратися ты, и устремися на иереи. И обратися Доик Сирин, и уби иереев Господних в той день, триста пять мужей, всех носящих ефуд:

1Цар.22:18  с толкованием

19
и Номву град иерейский погуби острием оружия от мужеска полу и до женска, от отрока и до ссущаго, и телца и осла и овчате.

1Цар.22:19  с толкованием

20
И угонзе един сын Авимелеха сына Ахитова, имя ему Авиафар, и бежа вслед Давида.

1Цар.22:20  с толкованием

21
И возвести Авиафар Давиду, яко изби Саул вся иереи Господни.

1Цар.22:21  с толкованием

22
И рече Давид ко Авиафару: ведях в день той, яко тамо бе Доик Сирин, яко возвещая возвестит Саулу: аз есмь виновен о душах дому отца твоего:

1Цар.22:22  с толкованием

23
седи со мною, не бойся, яко идеже аще взыщу души моей место, взыщу и души твоей, яко сохранен будеши ты у мене.

1Цар.22:23  с толкованием

Глава 
23

1Цар.23  с толкованием

1
И возвестиша Давиду, глаголюще: се, иноплеменницы облегоша Кеиль, и расхищают и попирают плоды.

1Цар.23:1  с толкованием

2
И вопроси Давид Господа, глаголя: аще пойду и избию иноплеменники сия? И рече Господь: иди, и победиши иноплеменники сия, и спасеши Кеиль.

1Цар.23:2  с толкованием

3
И реша мужие Давидовы к нему: се, мы зде во Иудеи боимся, и како будет, аще идем в Кеиль, в плен иноплеменников внидем?

1Цар.23:3  с толкованием

4
И приложи еще Давид вопросити Господа. И отвеща ему Господь и рече ему: востани и сниди в Кеиль, яко Аз предаю иноплеменники в руце твои.

1Цар.23:4  с толкованием

5
И иде Давид и мужие его с ним в Кеиль, и брашася со иноплеменники: и бежаша (иноплеменницы) от лица его, и взя скоты их, и порази их язвою великою, и спасе Давид живущыя в Кеиле.

1Цар.23:5  с толкованием

6
И бысть егда бежа Авиафар сын Авимелехов к Давиду, и той с Давидом в Кеиль сниде, имый ефуд в руце своей.

1Цар.23:6  с толкованием

7
И возвестися Саулу, яко прииде Давид в Кеиль. И рече Саул: предаде его Бог в руце мои, яко заключися вшед в град (имущь) врата и вереи.

1Цар.23:7  с толкованием

8
И заповеда Саул всем людем на брань снити в Кеиль, яти Давида и мужы его.

1Цар.23:8  с толкованием

9
И уведе Давид, яко не премолкает злобы о нем Саул, и рече Давид ко Авиафару жерцу: принеси ефуд Господень.

1Цар.23:9  с толкованием

10
И рече Давид: Господи Боже Израилев, слышав услыша раб Твой, яко ищет Саул приити на Кеиль растлити град мене ради:

1Цар.23:10  с толкованием

11
аще заключится? И ныне аще снидет Саул, якоже слыша раб Твой? Господи Боже Израилев, возвести рабу Твоему. И рече Господь: заключится.

1Цар.23:11  с толкованием

12
И рече Давид: аще предадят мя иже в Кеиле, и мужы моя в руки Саули? И рече Господь: предадят.

1Цар.23:12  с толкованием

13
И воста Давид и мужие его с ним, яко четыреста, и изыдоша из Кеилы, и идоша, аможе хотяху. И возвестиша Саулу, яко угонзе Давид из Кеилы: и остави ити.

1Цар.23:13  с толкованием

14
И седе Давид в Масереме в пустыни во узинах, и седяше в пустыни на горе Зиф, в земли знойне: и искаше его Саул во вся дни, и не предаде его Бог в руце его.

1Цар.23:14  с толкованием

15
И виде Давид, яко исходит Саул искати его: и Давид бяше на горе знойне, в дубраве Зиф.

1Цар.23:15  с толкованием

16
И воста Ионафан сын Саулов и иде к Давиду в дубраву, и утверди руце его во Господе,

1Цар.23:16  с толкованием

17
и рече к нему: не бойся, яко не имать обрести тебе рука отца моего Саула, и ты имаши царствовати во Израили, и аз буду по тебе другий, и Саул отец мой уведа тако.

1Цар.23:17  с толкованием

18
И положиста оба завет пред Господем: и седяше Давид в дубраве, а Ионафан отиде в дом свой.

1Цар.23:18  с толкованием

19
И изыдоша Зифее от знойныя земли к Саулу на холм, глаголюще: не се ли Давид скрыся у нас в Мессаре во узинах в дубраве на холме Ехелатсте, иже одесную Иесемона?

1Цар.23:19  с толкованием

20
И ныне все еже по души цареве ко исхождению, да снидет (убо) к нам: заключиша бо его в руки царевы.

1Цар.23:20  с толкованием

21
И рече им Саул: благословени вы Господеви, яко поболесте о мне:

1Цар.23:21  с толкованием

22
идите ныне, и уготовите еще, и познайте место его, идеже будет нога его вскоре, тамо идеже ресте, да не како прехитрит:

1Цар.23:22  с толкованием

23
и видите и уразумейте о всех местех, идеже той крыется, и возвратитеся ко мне на готово, и иду с вами: и будет, аще есть на земли, изыскати имам его во всех тысящах Иудиных.

1Цар.23:23  с толкованием

24
И восташа Зифее, и идоша пред Саулом: Давид же и мужие его бяху в пустыни Маон к западу одесную Иесемона.

1Цар.23:24  с толкованием

25
И иде Саул и мужие его искати Давида. И возвестиша Давиду, и сниде ко каменю иже в пустыни Маон. И услыша Саул, и погна вслед Давида в пустыню Маон.

1Цар.23:25  с толкованием

26
И идяше Саул и мужие его от страны горы отсюду, Давид же бе и мужие его от страны горы отонуду: и бе Давид укрываяся ити от лица Сауля, а Саул и мужие его ополчишася на Давида и на мужы его яти их.

1Цар.23:26  с толкованием

27
И прииде вестник к Саулу глаголя: потщися и иди, яко нападоша иноплеменницы на землю твою.

1Цар.23:27  с толкованием

28
И возвратися Саул не гнати вслед Давида, и иде противу иноплеменником: сего ради наречеся место оно Камень Разделенный.

1Цар.23:28  с толкованием

Глава 
24

1Цар.24  с толкованием

1
И воста Давид оттуду и седе во узинах Енгадди.

1Цар.24:1  с толкованием

2
И бысть егда возвратися Саул вспять от иноплеменник, и возвестиша ему, глаголюще: се, Давид в пустыни Енгадстей.

1Цар.24:2  с толкованием

3
И взя Саул с собою три тысящы мужей избранных от всего Израиля и иде искати Давида и мужей его прямо лицу саддеем:

1Цар.24:3  с толкованием

4
и прииде до стад пасомых на пути, и бе тамо вертеп: и Саул вниде испразднитися, Давид же и мужие его во внутренних вертепа седяху.

1Цар.24:4  с толкованием

5
И реша мужие Давидовы к нему: се, день сей, о немже рече Господь тебе предати врага твоего в руце твои, и сотвориши ему якоже угодно пред очима твоима. И воста Давид, и отреза воскрилие одежды Саули отай.

1Цар.24:5  с толкованием

6
И бысть по сих, и вострепета Давиду сердце его, яко отреза воскрилие одежды Саули:

1Цар.24:6  с толкованием

7
и рече Давид к мужем своим: никакоже ми от Господа, аще сотворю глагол сей господину моему христу Господню, еже нанести руку мою нань, яко христос Господень есть сей.

1Цар.24:7  с толкованием

8
И увеща Давид мужы своя словесы и не даде им воставшым убити Саула. И воста Саул, и сниде на путь.

1Цар.24:8  с толкованием

9
И изыде Давид вслед его из вертепа: и возопи Давид вслед Саула, глаголя: господине царю. И озреся Саул вслед себе, и преклонися Давид лицем своим до земли, и поклонися ему.

1Цар.24:9  с толкованием

10
И рече Давид к Саулу: почто слушаеши словес людий глаголющих: се, Давид ищет души твоея?

1Цар.24:10  с толкованием

11
Се, днесь видеста очи твои, яко предаде тя Господь днесь в руце мои в вертепе, и не восхотех убити тебе, и пощадех тя, и рех: не нанесу руки моея на господа моего, яко помазанник Господень сей есть:

1Цар.24:11  с толкованием

12
и се, воскрилие одежды твоея в руце моей, аз отях воскрилие одежды твоея, и не убих тебе: и уразумей, и виждь днесь, яко несть злобы в руце моей, ниже нечестия и презорства, ниже согреших к тебе, а ты ищеши души моея изъяти ю:

1Цар.24:12  с толкованием

13
да судит Господь между мною и тобою, и да защитит мя Господь от тебе: рука же моя не будет на тя,

1Цар.24:13  с толкованием

14
якоже глаголется притча древняя: от беззаконник изыдет преступление: рука же моя не будет на тя:

1Цар.24:14  с толкованием

15
и ныне ты, царю Израилев, вслед кого исходиши? Кого ты гониши? Вслед ли пса умерша и вслед блохи единыя?

1Цар.24:15  с толкованием

16
Да будет Господь судия и отмститель между мною и тобою, да видит Господь и судит суд мой, и осудит мя от руки твоея.

1Цар.24:16  с толкованием

17
И бысть, егда сконча Давид глаголы сия, глаголя к Саулу, и рече Саул: твой ли глас сей, чадо Давиде? И воздвиже Саул глас свой и восплакася.

1Цар.24:17  с толкованием

18
И рече Саул к Давиду: праведен еси ты паче мене, яко ты воздал ми еси благая, аз же тебе воздах злая:

1Цар.24:18  с толкованием

19
и ты возвестил ми еси днесь, яже сотворил ми благая, яко заключи мя Господь в руки твоя днесь, и не убил мя еси:

1Цар.24:19  с толкованием

20
и якоже аще кто обрел бы врага своего в печали, и отпустил бы его в путь благ, и Господь воздаст ему благая, якоже ты сотворил еси днесь:

1Цар.24:20  с толкованием

21
и ныне се, аз вем, яко царюя царствовати имаши, и стати имать в руце твоей царство Израилево:

1Цар.24:21  с толкованием

22
и ныне кленися ми Господем, яко не искорениши семене моего по мне и не погубиши имене моего от дому отца моего.

1Цар.24:22  с толкованием

23
И клятся Давид Саулу. И отиде Саул на место свое, Давид же и мужие его взыдоша в мессеру тесную.

1Цар.24:23  с толкованием

Глава 
25

1Цар.25  с толкованием

1
И умре Самуил, и собрашася весь Израиль, и плакашася его, и погребоша его в дому его во Армафеме. И воста Давид, и сниде в пустыню Маоню.

1Цар.25:1  с толкованием

2
И бе человек в Маоне и стада его на Кармиле, и человек велик зело: и сему овец три тысящы и коз тысяща: и бысть егда стрижаше стада своя на Кармиле:

1Цар.25:2  с толкованием

3
имя же человеку Навал и имя жене его Авигеа: и жена его блага смыслом и добра взором зело, муж же ея человек жесток и лукав в начинаниих и человек зверонравен.

1Цар.25:3  с толкованием

4
И услыша Давид в пустыни, яко стрижет Навал на Кармиле стада своя.

1Цар.25:4  с толкованием

5
И посла Давид десять отроков и рече отроком: взыдите на Кармил и идите к Навалу и вопросите его именем моим с миром,

1Цар.25:5  с толкованием

6
и рцыте сия: здрав ли еси ты и дом твой, и вся твоя здрава ли суть?

1Цар.25:6  с толкованием

7
И ныне се, услышах, яко стригут тебе ныне пастуси твои, иже беша с нами в пустыни, и не возбранихом им, и не повелехом им ничесоже во вся дни, егда беша на Кармиле:

1Цар.25:7  с толкованием

8
вопроси отроков твоих и возвестят ти: и да обрящут отроцы твои благодать пред очима твоима, яко в день благ приидохом: даждь убо ныне еже обрящет рука твоя отроком твоим и сыну твоему Давиду.

1Цар.25:8  с толкованием

9
И приидоша отроцы Давидовы и глаголаша словеса сия к Навалу, по всем глаголом сим именем Давидовым.

1Цар.25:9  с толкованием

10
И возскочи Навал и отвеща отроком Давидовым и рече: кто Давид? И кто сын Иессеов? Днесь умножени суть раби отходяще кийждо от лица господина своего:

1Цар.25:10  с толкованием

11
и возму ли хлебы моя и вино мое и закланая моя, яже заклах стригущым моя овцы, и дам ли оная мужем, ихже не вем откуду суть?

1Цар.25:11  с толкованием

12
И возвратишася отроцы Давидовы путем своим, и возвращшеся приидоша и возвестиша Давиду по глаголом сим.

1Цар.25:12  с толкованием

13
И рече Давид мужем своим: препояшитеся кийждо оружием своим. И препоясашася оружием своим, и сам Давид препоясася мечем своим, и идоша вслед Давида, яко четыреста мужей, а двести их осташася у сосудов.

1Цар.25:13  с толкованием

14
И Авигеи жене Навалове поведа един отрок, глаголя: се, присыла Давид послы от пустыни благословити господина нашего, он же отвратися от них:

1Цар.25:14  с толкованием

15
мужие же блази (беша) нам зело, не возбраняху нам, ниже повелеваху нам что во вся дни, в няже бехом с ними:

1Цар.25:15  с толкованием

16
и сущым нам на селе, аки стена беша окрест нас, и в нощи и во дни, по вся дни в няже бехом с ними пасуще стада:

1Цар.25:16  с толкованием

17
и ныне разумей и виждь ты, что сотвориши, яко совершися злоба на господина нашего и на дом его, и сей сын губитель, и не возможно глаголати к нему.

1Цар.25:17  с толкованием

18
И потщася Авигеа, и взя двести хлебов и два сосуда вина и пять овец устроеных и пять мер муки чистыя и кошницу гроздия и двести вязаниц смоквей, и возложи на ослята,

1Цар.25:18  с толкованием

19
и рече ко отроком своим: поидите предо мною, и се, аз вслед вас иду. Мужу же своему не возвести.

1Цар.25:19  с толкованием

20
И бысть, вседшей ей на ослицу и сходящей в подгорие, и се, Давид и мужие его идяху сопротиву ея, и срете их.

1Цар.25:20  с толкованием

21
И рече Давид: воистинну всуе вся навалова сохраних в пустыни, и ничесоже повелех взяти от всех яже его, и воздаде ми злая за благая:

1Цар.25:21  с толкованием

22
сия да сотворит Бог Давиду и сия да приложит, аще до утра оставлю от всех Наваловых даже до мочащагося к стене.

1Цар.25:22  с толкованием

23
И увиде Авигеа Давида, и потщася и скочи со осляте, и паде пред Давидом на лице свое, и поклонися ему до земли,

1Цар.25:23  с толкованием

24
и паде на ноги его и рече: во мне, господине мой, неправда моя: да глаголет ныне раба твоя во ушы твои, и послушай словес рабы твоея:

1Цар.25:24  с толкованием

25
да не возложит ныне господин мой сердца своего на человека гибелнаго сего, яко по имени своему той есть: Навал имя ему, и безумие с ним: аз же раба твоя не видех отроков господина моего, ихже послал еси:

1Цар.25:25  с толкованием

26
и ныне, господине мой, жив Господь и жива душа твоя, якоже возбрани тебе Господь еже не приити на кровь неповинну и спасти тебе руку твою: и ныне да будут якоже Навал врази твои и ищущии господину моему зла:

1Цар.25:26  с толкованием

27
и ныне возми благословение сие, еже принесе раба твоя господину моему, и даждь отроком предстоящым господину моему:

1Цар.25:27  с толкованием

28
отими ныне неправду рабы твоея, яко творя сотворит Господь дом верен господину моему, яко на брани господина моего Господь споборет, и злоба не обрящется в тебе никогдаже:

1Цар.25:28  с толкованием

29
и аще востанет человек гоняй тя и ищай души твоея, и будет душа господина моего привязана соузом жизни у Господа Бога, и душу врагов твоих поразиши пращею посреде пращи:

1Цар.25:29  с толкованием

30
и будет егда сотворит Господь господину моему вся, елика глаголаше благая о тебе, и повелит тебе Господь (быти) вождем во Израили,

1Цар.25:30  с толкованием

31
и не будет тебе сие мерзость и соблазн сердцу господина моего, еже излияти кровь неповинную туне и спасти руку свою себе: и да благо сотворит Господь господину моему, и воспомянеши рабу твою, еже благосотворити ей.

1Цар.25:31  с толкованием

32
И рече Давид ко Авигеи: благословен Господь Бог Израилев, иже посла тя днесь на сретение ми,

1Цар.25:32  с толкованием

33
и благословен совет твой, и благословена ты удержавшая мя в день сей ити на пролитие крове, и спасти ми руку мою:

1Цар.25:33  с толкованием

34
обаче жив Господь Бог Израилев, иже возбрани ми днесь зло сотворити тебе: зане аще бы не потщалася и не пришла еси на сретение мне, тогда рех: аще останется Навалу до утренняго света мочащийся к стене.

1Цар.25:34  с толкованием

35
И прия Давид от руку ея вся, яже принесе ему, и рече ей: иди с миром в дом свой: виждь, послушах гласа твоего и приях лице твое.

1Цар.25:35  с толкованием

36
И прииде Авигеа к Навалу: и се, у него пир в дому его, яко пир царев: и сердце навалово весело в нем, и той пиян до зела. И не возвести Авигеа Навалу глагола ни велика ни мала до света утренняго.

1Цар.25:36  с толкованием

37
И бысть заутра, егда истрезвися Навал от вина, поведа ему жена его вся глаголы сия, и умре сердце его в нем, и той бысть яко камень.

1Цар.25:37  с толкованием

38
И бысть яко десять дний, и порази Господь Навала, и умре.

1Цар.25:38  с толкованием

39
И услыша Давид и рече: благословен Господь, иже суди суд поношения моего от руки Навали, и раба Своего удержа от руки злых, и злобу Навалю обрати Господь на главу его. И посла Давид и глагола ко Авигеи пояти ю себе в жену.

1Цар.25:39  с толкованием

40
И приидоша отроцы Давидовы ко Авигеи в Кармил, и реша ей, глаголюще: Давид посла нас к тебе, да тя поймет себе в жену.

1Цар.25:40  с толкованием

41
И воста и поклонися до земли лицем и рече: се, раба твоя в рабыню умывати ноги отроком твоим.

1Цар.25:41  с толкованием

42
И воста Авигеа, и вседе на осля, и пять девиц идяху вслед ея, и пойде вслед отроков Давидовых, и бысть ему в жену.

1Цар.25:42  с толкованием

43
И Ахинааму поят Давид от Иезраеля, и бесте ему обе жены.

1Цар.25:43  с толкованием

44
Саул же даде Мелхолу дщерь свою жену Давидову Фалтию сыну Амисову иже от Роммы.

1Цар.25:44  с толкованием