Глава 
43


1
И ныне сице глаголет Господь Бог сотворивый тя, Иакове, и создавый тя, Израилю: не бойся, яко избавих тя, прозвах тя именем твоим: Мой еси ты.


2
И аще преходиши сквозе воду, с тобою есмь, и реки не покрыют тебе: и аще скозе огнь пройдеши, не сожжешися, и пламень не опалит тебе,


3
яко Аз Господь Бог твой, Святый Израилев, Спасаяй тя: сотворих премену твою Египет и Ефиопию, и Соину за тя.


4
Отнелиже честен был еси предо Мною, прославился еси, и Аз тя возлюбих, и дам человеки за тебе и князи за главу твою.


5
Не бойся, яко с тобою есмь: от восток приведу семя твое и от запад соберу тя:


6
реку северу: приведи: и ливу: не возбраняй, приведи сыны Моя от земли дальния и дщери Моя от краев земных,


7
всех, елицы нарицаются именем Моим: во славе бо Моей устроих его и создах его и сотворих и.


8
И изведох люди слепы, и очи суть такожде слепы, и глуси ушы имущии.


9
Вси языцы собрашася вкупе, и соберутся князи от них. Кто возвестит сия? Или яже исперва кто возвестит вам? Да приведут свидетели своя и оправдятся, и да услышат и да рекут истину.


10
Будите Ми свидетелие, и Аз свидетель, глаголет Господь Бог, и отрок Мой, егоже избрах, да увесте и веруете Ми и уразумеете, яко Аз есмь: прежде Мене не бысть ин Бог, и по Мне не будет.


11
Аз Бог, и несть разве Мене Спасаяй.


12
Аз возвестих и спасох, укорих, и не бе в вас чуждий: вы Мне свидетелие, и Аз свидетель, глаголет Господь Бог,


13
еще от начала, и несть изимаяй от руку Моею: сотворю, и кто отвратит е?


14
Тако глаголет Господь Бог, Избавляяй вас, Святый Израилев: вас ради послю в Вавилон и воздвигну вся бежащыя, и Халдее в кораблех свяжутся.


15
Аз Господь Бог Святый ваш, показавый Израиля Царя вашего.


16
Сице глаголет Господь, даяй путь по морю и по воде сильне стезю:


17
изводяй колесницы и кони и народ силен: но успоша и не востанут, угасоша аки лен угашен.


18
Не поминайте первых, и ветхих не помышляйте,


19
се, Аз творю новая, яже ныне возсияют, и увесте я: и сотворю в пустыни путь и в безводней реки.


20
Возблагословят Мя зверие селнии, сирини и дщери струфовы: яко дах в пустыни воду и реки в безводней, напоити род Мой избранный,


21
люди Моя, яже снабдех, добродетели Моя поведати.


22
Не ныне призвах тебе, Иакове, ниже трудитися сотворих тя, Израилю.


23
Не принесл еси Мне овец твоих всесожжения твоего, ни в жертвах твоих прославил Мя еси, не поработих тя в жертвах, ниже утруждена сотворих тя в Ливане:


24
не купил еси Мне на сребро фимиама, ниже тука треб твоих возжелах, но во гресех твоих стал еси предо Мною и в неправдах твоих.


25
Аз есмь, Аз есмь заглаждаяй беззакония твоя Мене ради и грехи твоя, и не помяну.


26
Ты же помяни, и да судимся: глаголи ты беззакония твоя прежде, да оправдишися.


27
Отцы ваши первии согрешиша, и князи ваши беззаконноваша на Мя.


28
И оскверниша князи святая Моя, и дах погубити Иакова и Израиля во укоризну.