Глава 
11


1
Премудрость смиреннаго вознесет главу его и посреде вельмож посадит его.


2
Не похвали человека во красоте его, и не буди ти мерзок человек видением своим.


3
Мала есть в пернатых пчела, и начаток сладостей плод ея.


4
Во одеянии риз не похвалися и в день славы не превозносися: яко дивна дела Господня и тайна дела Его пред человеки.


5
Мнози мучителие седоша на земли, нечаемый же увязеся венцем.


6
Мнози сильнии укорени быша зело, и славнии предани быша в руки инех.


7
Первее неже испытаеши, не порицай, уразумей прежде и тогда запрещай.


8
Прежде неже услышиши, не отвещавай, и не влагайся в среду беседы.


9
О вещи, яже ти несть на потребу, не тяжися, и на суде грешников не седай.


10
Чадо, деяния твоя да не будут о мнозе: аще умножиши, не будеши неповинен, и аще се гониши, не постигнеши, и не утечеши бежащь.


11
Есть труждаяйся и потяся и тщася, и толико паче лишается.


12
Есть слаб и требуяй заступления, лишаяйся силы, и нищетою изюбилует:


13
и очи Господни призреста ему во благая, и воздвиже и от смирения его, и вознесе главу его, и дивишася о нем мнози.


14
Благая и злая, живот и смерть, нищета и богатство от Господа суть.


15
Даяние Господне пребывает благочестивым, и благоволение Его благопоспешится во век.


16
Есть богатяйся удержанием и скупостию своею, и сия часть мзды его,


17
внегда рещи ему: обретох покой и ныне ям от благ моих.


18
И не весть, кое время приидет, и оставит я инем, и умрет.


19
Стой в завете твоем и пребывай в нем, и в деле твоем обетшай.


20
Не дивися делом грешника, веруй же Господеви и пребывай в труде твоем:


21
яко удобно есть пред очима Господнима внезапу обогатити нищаго.


22
Благословение Господне на мзде благочестиваго, и в час скор процветет благословение Его.


23
Не рцы: кая ми потреба есть, и кая отныне будут ми благая?


24
Не рцы: доволна ми суть, и чим отселе озлоблен буду?


25
В день благих забвение злых, в день же злых не воспомянутся благая:


26
яко удобно есть пред Богом, в день смерти воздати человеку по делом его.


27
Озлобление времене забытие творит сладости, и в скончании человека открытие дел его.


28
Прежде смерти не блажи ни когоже, и в чадех своих познан будет муж.


29
Не всякаго человека вводи в дом твой: многи бо суть козни льстиваго.


30
Якоже рябка уловленая в клетце (обглядает), тако сердце гордаго, и якоже соглядник назирает падения:


31
доброе бо на зло обращая, подсаду творит и на добрыя детели возложит порок.


32
От искры огненныя умножается углие, и человек грешник на кровь приседит.


33
Блюдися от злодея, зло бо содевает, да не когда порок даст ти во век.


34
Всели чуждаго в дом твой, и развратит тя мятежем и чужда тя сотворит от твоих ти.


Глава 
12


1
Аще добро твориши, разумей, кому твориши, и будет благодать благим твоим.


2
Добро сотвори благочестивому, и обрящеши воздаяние, и аще не от него, то от Вышняго.


3
Не будет добро прилежащему во злых и не подающему милостыни.


4
Даждь благочестивому и не заступай грешника.


5
Добро сотвори смиренному и не даждь нечестивому: возбрани хлебы твоя и не даждь ему, да не теми тя преможет:


6
сугуба бо зла обрящеши во всех благих, яже аще сотвориши ему: яко и Вышний возненавиде грешники и нечестивым воздаст месть.


7
Даждь благому и не заступай грешника.


8
Не познан будет во благих друг и не скрыется во злых враг.


9
Егда во благих будет муж, врази его во печали суть, во злых же его и друг разлучится.


10
Не ими веры врагу твоему во веки: якоже бо медь ржавеет, тако и злоба его:


11
и аще смирится и пойдет поникнув, настави душу твою и хранися от него, и будеши ему яко очищено зерцало, и уразумееши, яко не до конца оторжаве:


12
не постави его при себе, да не когда изринув тя станет на месте твоем: не посади его одесную себе, да не поищет когда седалища твоего, и на последок уразумееши словеса моя и о глаголех моих умилишися.


13
Кто помилует обаянника змием усекнена и всех приступающих ко зверем? Такожде ходящаго с мужем грешником и примешающагося грехом его:


14
час с тобою пребудет, и аще уклонишися, не стерпит.


15
Устнама своима усладит враг, и много пошепчет и речет добро глаголя: очима своима прослезится, а сердцем своим усоветует вринути тя в ров, и егда обрящет время, не насытится крове.


16
Аще срящут тя злая, ту обрящеши его первее себе,


17
и яко помагаяй подсечет пяту твою:


18
покивает главою своею и восплещет рукама своима, и много пошепчет и изменит лице свое.


Глава 
13


1
Касаяйся смоле очернится, и приобщаяйся гордому точен ему будет.


2
Бремене паче себе не воздвижи, и крепльшу и богатейшу себе не приобщайся.


3
Кое причастие горнцу с котлом? Сей приразится, и той сокрушится.


4
Богатый обиду сотвори, и сам приразгневася: нищий же обидимь бысть, и сам приумолится.


5
Аще потребен будеши, употребляет тя: аще же лишен будеши, оставит тя.


6
Аще имаши, поживет с тобою и истощит тя, сам же не поболит.


7
Аще востребует тя, прельстит тя и возсмееттися и даст ти надежду, возглаголет ти добре


8
и речет ти: есть ли ти что потребно? И посрамит тя брашном своим, дондеже истощит тя дващи или трищи, и на последок поругаеттися.


9
Потом узрит тя и оставит тя и главою своею покивает на тя.


10
Внимай, да не заблудиши


11
и да не смиришися во веселии твоем.


12
Егда тя сильный призовет, отступай, и толико паче призовет тя.


13
Не приближайся, да не отриновен будеши, и не стой отдалече, да не забвен будеши.


14
Не належи беседовати с ним и не веруй множайшым словесем его: многою бо беседою искусит тя и яко смеяся испытает тайная твоя.


15
Немилостив есть не соблюдаяй словес и не пощадит (ослабити) озлобления твоего и уз.


16
Блюдися и внимай зело, яко с падением твоим ходиши:


17
слышай сия во сне твоем, бодрствуй.


18
Во всем житии люби Господа и призывай Его во спасение твое.


19
Всяко животно любит подобное себе, и всяк человек искренняго своего:


20
всяка плоть по роду собирается, и подобному себе прилепится муж.


21
Кое общение волку со агнцем? Тако грешнику со благочестивым.


22
Кий мир гиене со псом? И кий мир богатому со убогим?


23
Лов львов онагри в пустыни, такожде пажити богатым убозии.


24
Мерзость гордому смирение, сице мерзость богатому нищий.


25
Богат колебляйся подтверждается от другов: убогий же падый отреян будет от другов.


26
Богату поползнувшуся мнози заступницы, возглагола нелепая, и оправдаша его:


27
убогий поползнуся, и воспретиша ему, провеща разум, и не даша ему места.


28
Богатый возглагола, и вси умолчаша и слово его вознесоша даже до облак:


29
убогий возглагола, и реша: кто сей есть? И аще преткнется, низвратят его.


30
Добро есть богатство, в немже несть греха, и зла есть нищета во устех нечестиваго.


31
Сердце человеческо изменяет лице его, или на добро или на зло.


32
След сердца во благих лице веселое, и изобретение притчей размышление со трудом.


Глава 
14


1
Блажен муж, иже не поползнуся устнама своима и не уязвися печалию греха.


2
Блажен, емуже не зазре душа его, и иже не спаде от надежды своея.


3
Мужеви скупому не лепо есть богатство, и человеку завидливу на что имение?


4
Собираяй от души своея инем собирает, и во благих его инии насладятся.


5
Иже себе зол, кому добр будет? И не возвеселится во имении своем.


6
Завидящаго себе самому несть злейша: и сие воздаяние злобы его.


7
Аще и добро творит, в забытии творит и на последок изявит злобу свою.


8
Лукав (есть) завидяй оком, отвращаяй лице и презираяй душы.


9
Око лихоимца не насыщается части, и обида лукаваго изсушает душу.


10
Око лукаво завидливо и о хлебе, и на трапезе своей скудно.


11
Чадо, якоже имаши, добро твори себе, и приношения Господеви достойно приноси:


12
помяни, яко смерть не замедлит, и завет адов не показан ти бысть.


13
Прежде неже умреши ты, добро твори другу и по силе твоей простри и даждь ему.


14
Не лишися от дне добра, и часть желания блага да не прейдет тебе.


15
Не инем ли оставиши притяжания твоя и труды твоя, в разделение жребия?


16
Даждь и возми, и освяти душу твою:


17
яко несть во аде взыскати сладости.


18
Всяка плоть яко риза обетшает, завет бо от века: смертию умреши.


19
Яко лист расплощаяся на древе часте, ов убо спадает, другий же прозябает: такожде и род плоти и крови, ов убо умирает, ов же родится.


20
Всякое дело гниющее изчезает, и делаяй е с ним отидет.


21
Блажен муж, иже во премудрости умрет и иже в разуме своем поучается святыни:


22
размышляяй пути ея в сердцы своем, и в сокровенных ея уразумится.


23
Изыди вслед ея яко изследник и на путех ея приседи.


24
Приницаяй сквозе оконца ея и при дверех ея послушает.


25
Обитаяй близ дому ея и вбиет кол в стены ея, поставит скинию свою вскрай ея и обитати будет во обители благих,


26
положит чада своя в покрове ея и под ветвьми ея водворится,


27
покрыется ею от зноя и во славе ея обитати будет.


Глава 
15


1
Бояйся Господа сотворит сие, и держайся закона постигнет ю.


2
И срящет его яко мати, и яко жена девства приимет и:


3
ухлебит его хлебом разума и водою премудрости напоит и:


4
утвердится на ней и не преклонится, и до нея пристанет и не постыдится:


5
и вознесет его паче искренних его и посреде церкве отверзет уста его:


6
веселие и венец радости и имя вечно наследит.


7
Не постигнут ея человецы неразумивии, и мужие грешнии не узрят ея:


8
далече есть от гордыни, и мужие лживии не имут помянути ея.


9
Не красна похвала во устех грешника, яко не от Господа послана бысть:


10
премудростию бо речена будет хвала, и Господь благопоспешит ей.


11
Не рцы, яко Господа ради отступих: ихже бо возненавиде, да не сотвориши.


12
Не рцы, яко Сам мя прельсти: не требует бо мужа грешника.


13
Всяку мерзость возненавиде Господь, и несть любезна боящымся Его.


14
Сам из начала сотвори человека и остави Его в руце произволения его:


15
аще хощеши, соблюдеши заповеди и веру сотвориши благоволения.


16
Предложил ти огнь и воду, и на неже хощеши, простреши руку твою.


17
Пред человеком живот и смерть, и еже аще изволит, дастся ему.


18
Яко многа премудрость Господня: крепок силою и видяй вся:


19
и очи Его на боящихся Его, и Той познает всяко дело человеческо.


20
Не заповеда ни единому же нечествовати и не даде ослабы ни единому не согрешати.